28
Sisampefun feni, nyjila ŋga nundro n na u nini,
a lewo kprafun rɛ,
wree gbun ni na jira wi.
2 Na waŋgra ka leele sisam nɛɛ,
ki tii mbe ki ŋulo nɛɛ.
La, na maa nya a waŋgra yire
ki jeelee na mu faŋga ta,
kena ki yɛkulo pe kachimblɛ.
3 Ndro ŋmba kɛɛ jaŋga nyi,
wra leele mblɛ
pee wa u jaara fiŋge kre,
pan ufun nyi na nyiɛ
ŋga ki paan kpɔɔ,
na see yirɛ klai yi.
4 Ndro ŋmba u n na chaa mbe pe
mbra le wre na sisampefɛɛnlɛ
jawalaa nunu,
la, na ndro lii mbra na,
kena mu sisampefɛɛnlɛ taan.
5 Sisampefɛɛnlɛ n chin,
yira ŋga pe yeeri kpra lie,
la, mblɛ pe Nyiɛkpɔɔ haa chaa pre,
ki nɔɔloo chasi.
6 Ki nyu na mu pe
shianfun kpralifun,
mu wɛ ŋga mu pe
swafun denyjuufun na.
7 Nyanyjɛble ŋmba u lii mbra na,
wre wi kachiŋu.
A ŋmba u lewaala wru nɔɔlɔ,
we ti nyifɛɛrɛ u lɛ gbo.
8 Na mu yire tnu tataara,
na dnumu lie na
mu muyɛ ta kre,
mu krɔyirɛ we kɔɔ sɛ li,
ŋmba na foorochiɛn nyi pan.
9 Na mu n na lii mbra na,
mu nyiɛtalaa pe Nyiɛkpɔɔ
pan afuŋgo kee.
10 Na mu frakafun fana
a u sisaa pe,
ŋu titi pɛlɛ ŋga mu pɛɛri
kie knaa mu yii, la,
kprafɛɛnlɛ we fɔtɔɔrɔ chichie ta.
11 Swafun jawala yi na,
u kala chin uyɛ pan
nyjila kro nu,
la, shianfun ŋmba
u kala nɔɔ ndru wre,
u chin na swafun n yaka chin.
12 Na ndro chichuo jaŋga ta,
leele kro yiɛ shio,
la, na ndro sisaa jaŋga ta,
leele kro ndra haa chaa.
13 Na mu mu sisam ndra,
ma nyu mu tnimu nu fio,
nyu nyaa mu yi yo,
mu yi pee ti,
kre Nyiɛkpɔɔ we mu fooro le.
14 Lewo ŋmba u o Tafun Nyiɛkpɔɔ
fiɛ wre wo yi dwamu,
la, ŋmba we ndikana pe
we to kala nu.
15 Yɛklo ŋmba u pɔlɛfɛɛnlɛ
fiŋge wre kee fiɛrɛ ni
na jira ŋmba u jlo na tro,
ndee sisire ŋmba klo ta wi.
16 Ŋunu ŋmba u n jawala ni kre,
u ndra sheli u leele na.
A ŋmba u dnumu fun kre,
we ŋunumu li mbe mu.
17 Lewo linkufun jawala we u tɔɔra,
mbe sɛ na u ni kumu nu,
kena maashia tɔ ufun na.
18 Lewo kprafun we yili katala nu,
la, pie denyjuufun kla.
19 Falifun ŋmba
u tnumu tuni kpɔɔ wre,
wraa sro la.
La, mblɛ pe pe nyjila klai kre,
pie shian nyjila kro nu.
20 Lewo kprafun dwamu nɛɛ,
la, ŋmba u chaa
mbe uyɛ ta nyaanyaa kre,
Nyiɛkpɔɔ we u ndie tini.
21 Na mu lewo yiɛ le,
mu chin mu kala pe ki n nyu,
la, leele plɛɛ wa a pe ja na pe dɔli,
yira fiɛn titi ka ni kple.
22 Jajaarafun chaa nyaanyaa
mbe uyɛ ta,
a u n chin na shian wa
mu na u sri kolo.
23 Na mu lewo yiɛ kee yo u pan,
mbakɔ, u yiɛ we shɔ ki na,
mbe wɛ ŋga mu nyutnamu tɛɛ
mbe u fana na.
24 Na mu mu lɛ na mu lo juu,
na jawa na sisaa ma mu pini,
pan mu nyi na linkufun wi.
25 Jajaarafun u paan na kala ni,
la, ŋmba u kaan o Tafun
Nyiɛkpɔɔ na wre we nyu.
26 Jijuo u wre nunu jawala teeri
na tnumu tuni,
la, na mu taa kachiŋu kee na
mu wuu.
27 Na mu shianfɛɛnlɛ kee yirɛ,
yaka wa mu shian fio,
la, na mu yiɛ woni pe na,
suŋgɔ mu chaa na muyɛ kaan.
28 Na sisam pefun jaŋga ta,
mbe lenɛɛrɛ na peyɛ ndrai,
la, na sisampefun to,
frakafɛɛnlɛ we yiri.