27
Maashia baŋga tɛɛmbe muyɛ kpɔɔ, ŋgi na hin?
Lewo n nyisee kee chin.
2 Maashia muyɛ ŋga mɛɛ,
kee ŋga mu pini na,
la, na leele chin kee ŋga mu pini,
mu mu ŋga ki mɛɛ, ki nyu.
3 Dnɛ sna, a tablɔ sna,
la, kee ŋga ni jijuo paan kre,
ki sna mu wɛ yi kro shiin na.
4 Na ndro krɔ kun kii fiɛrɛ ni,
a keyirafun n ka prɔ.
5 Namu ndro yiɛ kee yo u pan,
ki nyu mu wɛ,
na mu ti wra jawa na,
mu kee ka ma na u ni na.
6 Na mu nunu mu tɔɔra kee
na ki prɔ,
la, na mu loŋgo waa kɛ le
mu lagboo u dɔɔta.
7 Na mu li mu yɔɔ mu kɔ,
srɛ kee kuraa mu bin,
la, na klo mu ta,
yira susrom kuraa tna.
8 Na ndro yili u katoo to,
pan u nyi na hanyini ŋmba,
u yili mu u zeere ti yi.
9 Tlade na simi nyjɛ ndiom yi tna,
we jaa ti mbe ndro yiɛshɔ,
la, kanyana kee we ti
mbe mu jawala fun.
10 Maashia mu nɔɔlɔ,
ndee mu lɛ nɔɔlɔ kee fɛɛ,
a na mu kala ta,
maashia yo mu nyjɔ,
ŋmba haa ki le pan na u ya mu na,
mu tnifun ŋmba u mbra mu na wre,
we jaa ya mu na mbe wɛ mu nyjɔ,
ŋmba haa ki le na mu ni wre na.
11 Ni pɔ, kala chin,
kre kie ti mbe ni yiɛ shɔ,
a kie ti mbe ni jaa,
mblɛ pe kee nyjɛ yi n fna
yuu ni na pre nyu wɔ.
12 Kachiŋu u katala kee nyaa,
na ki paan mbe u ki klɛ,
la, jijuo we sɛ le ki nu,
mbe chiin na ndachiɛn nyɛni.
13 Na mu daŋga
mu yire fuŋu fɔlɔ nyu na,
mu krɔyira ni mu kɔɔ tɛɛ
mbe ki fɔlɔ tɔ.
14 Na mu gble le,
mu mu tnifun shaari bnimi,
pie kɔɔ ki jawa na suŋgɔ yi.
15 Pan chlɔ kakɔtuŋu nyi,
imi nyiɛ we na paan,
mbra nuni suwi,
kia kun kre yi.
16 Kee ŋgi mu jaa pe,
mbe u nyu tɔ hin?
Na mu ja mbe fuflɛ tɔ kolo,
mbe kia gbun,
ndee mbe simi bibre kna
mbe le kɛɛ, mbe ki yire kre,
kena mu jaa ti
mbe chlɔ kakɔtuŋu u kakrɔ ti.
17 Imi na pe tɔɔnrɔ ka teeri
na ka nyu liɔ kre,
pan chɔɔ lewo tuan u ŋmbrɔ pan.
18 Na mu tiŋge li wo le chichie,
mu ki sɛŋgɛ taa li.
Sumifun ŋmba u u tafun
le chichie kre,
we mɛɛ ta u pan.
19 Na mu yire lɔɔ mbɛɛ na,
imi na mu nyi,
pan mu muyɛ nyaa ki nu.
Pan chɔɔ imi mu nyi,
pan mu muyɛ nyaa mu lɛɛ.
20 Imi na kuulo ndoo wa,
na leele shio na teeri kre,
pan lewo niŋge yira nyi,
na u ŋga ta,
u ŋga chaa mbe ya.
21 Kanhun ni pe teeri na swanyiɛ,
na swafiŋge titi chini,
la, lewo pni nɛɛ ni
pe teeri na u pini na le.
22 Mu jaa jijuo gbun gboo na,
la, ma jaa u gbun
mbe u jijiere kre yili u nu.
23 Mu mbaala, na mu nui le chichie,
24 ŋgi na hin?
Yɛtaara na kro ma nyjila kro nu.
Pan chɔɔ ŋunumu lie
na kro ma nyjila kro nu.
25 Na mu nyaa chieri
nyua mbɛɛ na mu tɛɛ
mbe yurɛ kɔɔ taa ka tla nyjila.
Yɛ we ndruu fun
yi titɛɛ mbe pe taa ka.
26 A mu mbaala yooro ta,
mbe yonyi tin,
mbe sikaala ta mbe prɛ,
mbe swa ta mbe tra lɔ.
27 A mu sikaala pre nɔnɔ ta,
mbe ŋu na mu sele leele le,
mbe yɛ ta
mbe mu sumifɛɛnlɛ pɔɔri.