26
Imi na na bɔbɔnlɛ woni,ndee nyiɛ paan see yirɛ kun nyjila,
a yi kee n tnu ni kre,
pan chɔɔ na mu jijuo kaan buuro,
tnu n wa ki nu.
2 Na mu n kala pe,
suŋgɔ wa jaa mu yii,
pan ki nyi na hanyiɛlɛ nyisee nya,
mu yiri na shie mna pe chaa.
3 Imi na pe krafi leni soo,
ndee bubnɔ nyu na mbe u gbun,
mbe u chiin sɛ kre,
pan ki fna pra jijuo pini.
4 Maa muyɛ pe jijuo,
mbra jijiele kee nyu woni.
5 Na ndro mu wie jijiere kee,
u nyu wɔ jijiere ni,
kre we chin na u n yaka chin.
6 Na mu jijuo tun na kala ni,
pan ki nyi na mu jeelee
mu knumu mu wa,
ŋgi na hin?
Kala we chaa mu ŋga.
7 Imi na fna jeelee na ja
mu ya u na kre,
pan jijuo yomɛɛlɛ nyi.
8 Na mu vuŋmbɔ dnɛ pɔ
mu mbra ki lam,
na chaa mbe ki wa,
pan ki nyi na
mu jijuo kaan buuro.
9 Na jijuo chaa mbe kachindɛ
kee ŋga wa yo fa yo,
pan ki nyi to,
na gbɔgbɔɔ chaa,
mbe wuuro wɔ u kandala.
10 Na mu jijuo wru,
na u tnumu tun mu pan,
pan ki nyi na ndro yire kolo,
na leele mblɛ pe tro waari
snimi ni.
11 Imi na nyukuan we ndru mbe sɛ,
u tuuroe lala na kre,
pan chɔɔ jijuo ndru yi
mbe sɛ jijiere kee pe na.
12 Jijuo damatii prɔ,
ndro ŋmba u jawa na u kala chin,
a u n yaka chin na.
13 Yira ŋgi ki tia gbashiafun,
na yili katoo wo, jira u fiɛ ree?
14 Na gbashiafun sni,
yiri la na u ta,
pan u kna dɛŋglɛ na,
imi na nyuŋgo krɔ viŋge,
na shie na paan kre.
15 Leele plɛɛ wa,
a pee gbashia ni chiin mu tro,
hali imi pie pe,
mbe sro kuun le nyuu kuraa,
ki pe bɔ.
16 Na leele kɔɔnashin
jawalaa nunu kee na,
gbashiafun jawala yi na,
u chin mu wɛ pe na kro.
17 Kala ŋga ki n pe mu kee,
a mu sɛ nyu le ki nu kre,
pan ki nyi na mu nyukuan yii
u ndiile na.
18-19 Ndro ŋmba we na u ŋmbrɔ fana,
mbra yuu na,
“Kaha ni lii kre.”
Pan u fun nyi na tɔɔlɔfun,
ŋmba u yire ndoo ka nu,
na chombo na snimi waari
imi na u ta yi.
20 Na kejenyi n wa gbunu,
kanhun we fii,
pan chɔɔ na kroyoo n wa,
kakrɔ n wa.
21 Imi na kaanlɛɛ paan
na naŋgua ni,
a kejenyi na paan
na kanhun muŋgo ni kre,
pan kakɔtuŋu chɔmbɔ
leni kee nu.
22 Imi suulee tri lɛɛ
mbe tna lewo pan kre,
pan kroyoo loo tna
ki loofun ndie.
23 Na jawala fɔɔn wa mu nu,
a mu je na nyutnamu yuu,
pan ki nyi na pe chɔ faanri,
mu ki krɔ san.
24 Yiɛnyumufun u nyutnamu teeri,
mbe prara ŋga kii wa u nu kre tɔ.
25 Kee nyjɛ we yo kro we tna ndie,
la, maa shia u shɔɔ li,
ŋgi na hin? Prara kii wa u nu.
26 We jaa pe na u u prara kre ndra,
la, ndro kro we ki chin.
27 Ndro ŋmba we pɛlɛ pɛɛri
u ŋmbrɔ na kre,
kie knaa u yii.
A na mu chaa
mbe dnɛ gbilaa wa u na,
kie knaa mu fɛɛri.
28 Nyu ŋga kraa kpra yo kre,
ki keyira yuu ŋmba ki pra wre na,
a pan chɔɔ nyutnamu ja
na ndro klai.