Solomon Yomɛɛlɛ Yire Yɛ Yi Kre
25
Ŋunu Solomon yomɛɛlɛnyjɛ Judae ŋunu Hezekiah,
leele na le mna yi nyunɔ,
mu tɛɛ yire yi kre.
2 O Nyiɛkpɔɔ kaan mɛɛ
na u kaalɛɛ yo mu ndra,
a o o ŋulo kaan mɛɛ,
na kaalɛɛ nyjɛ yi ndra yire,
pe yi woni fimi na.
3 Imi na nyjeeri haale,
a epo lam juo kre,
pan chɔɔ ŋunu jawala kee nyi.
4 Swa fiŋge nɛɛrɛ wɔ ki nu,
kre fiireefun we jaa ki tɛɛ,
mbe tnumu ŋga ki nyu tun.
5 Sisaapefun ŋmba u paara
na ŋunu nyina wre ni u lawee,
kre kie ti pe u nya,
na u ŋunumu lii kpra ni.
6 Maashia muyɛ kpɔɔ,
ndee mbra kpɔɔmu lawee
chaa ŋunu yiɛ.
7 Ki nyu na mu ti pe mu ŋga
kpɔɔmu tnihaa,
mu wɛ na mu kluu tni wa,
mbe pe ki shɔ mu pan,
mbe ŋmba u wɛ mu na ŋga.
8 Maashia fiɛlɛ mbe sɛ
kee ŋga mu nya kro ni kala lihaa.
Ŋgi na hin? Na dansiɛfun waa pan,
mu yo na pan ma ki nyi,
kena mni mu pe hin?
9 Na ŋu na mu ŋmbrɔ ta,
e eyɛ lalaa gbeele,
mbe yaa eyɛ nɔɔ wɔ fimi na,
10 na kre ma,
leele we e nya
na yaa jaa tɔ eyɛ na,
nyifɛɛrɛ we e gbo.
11 Na ndro kee ŋga ki fna yo,
pan ki nyi na pe swafiŋge le,
swanyiɛ yira nu.
12 Na kachiŋu mu yiɛ kee
yo mu pan, a mu ki loo,
ki nyu mu wɛ swanyiɛ,
ndee swanyiɛ lagboo jlɔnyi na.
13 Bituŋu ŋmba na mu ja
mbe kaan wre,
u kee gbunyiŋge ni,
na mu nyumu nyiŋge ta,
mu gbɔ tla nyjila.
14 Na ndro yo we ndro kɛ yira,
mu ki tɛɛ na uyɛ kpɔɔri,
na u n shia ja mu ki pe,
kena pan ufun nyi na nyiɛ woo,
mbra fuflɛ gbuun,
a kia jaa pan yi.
15 Na muu frɔ ni,
mu jaa jaŋgafun lɛɛ kee kna,
mbe jaa kee shelee nyu gbo.
16 Maashia srɛ tnamu le,
mbe u li mbe wɛ,
imi na mu jaa li na.
Na mu u li nɛɛrɛ mu tro,
kie jaa ti mu tuuru.
17 Maashia ti mu jele pe nyaanyaa,
mu ŋmbrɔ katoo kolo mbe tro,
na kre ma mu kee we kɔɔ u bin,
mbe u kɔɔ mu pra.
18 Imi na snimi ndee chombo,
ndee van ja na ndro kuu kre,
pan lewo ŋmba u kafinɛ dansiɛrɛ lii,
na u ŋmbrɔ taanla wre nyi.
19 Na mu muyɛ wru mu taa,
ndro ŋmba wra kpra li na,
mu kanyana nyjila nu kre,
pan ki nyi na mu ŋgaala gbɔŋgɔi,
ndee mu jele mu yaa,
a mna see ki na yi.
20 Na ndro fooro kpɔɔ lii,
a mna mɛɛ koni na u nyina,
pan ki nyi na mu yoŋgo laa ndro na,
weere nyjila,
ndee mu weŋge tre mu le
ndro kla nu.
21 Na klo mu loŋgo ta,
u ŋga sro mbe u li,
a na gbɔɔ u ta,
u ŋga nyumu mbe u gbɔ.
22 Na mu pe ma,
kie ti mbe nyifɛɛrɛ u gbo,
a o Tafun Nyiɛkpɔɔ
we mu ŋga fɔtɔɔrɔ chichie.
23 Imi na fuflɛ ŋga ki yiri
nyiɛ nɔɔ na paan nyiɛ ni kre,
pan chɔɔ kroyoo paan
na krɔkuɔn ni.
24 Na mu tni zio ndra na prɔ,
ŋga ŋu na chlɔ kakɔtuŋu,
we chaa mbe tni katoo nunu nu.
25 Na mu ketaan loo,
mu yiri haalee,
pan ki nyi na mu nyumu nyiŋge ta,
mu gbɔ tla nyjila.
26 Na lewo chichuo uyɛ wru,
mu le sisaapefun kɛɛ,
pan ki nyi na pe blo nyumu tɔɔn,
ndee mu tuwe sisaa le
kɔlɔ nyumu nu.
27 Imi na na mu srɛ li kpɔɔ,
kia nyu mbe mu lɛɛ ŋga kre,
pan chɔɔ na mu muyɛ kpɔɔri
mu tro ki n nyu.
28 Na ma jaa muyɛ yii kee na,
pan ki nyi na pe buŋgo sin,
mu chia fɛ mu kun,
a ki juari mu wo mu ki ti.