24
Maashia ti mbe mu yiɛ nyina,sisampefɛɛnlɛ na,
a maashia pe wru nɔɔlɔ.
2 Katala kee bribri pe jawa,
a jiɛnlɛ kee pe yuu.
3 Kachiŋu u katoo sin,
a u jawala we ti mbe ki yire.
4 Katoo ŋga nu kachindɛ nyi,
pe ki nyinyi sani,
yirɛ nyjɛ ndrɔ yi sheli ni.
5 Na mu kala chin,
mu jaŋga kpɔɔ,
a jawalafun kee shian,
mu wɛ faŋgafun na.
6 Ŋgi na hin?
Na kachiŋu shie ŋunɔ,
we tni mbe jawa tun,
mbe chiin sɛ,
a na mu paaranyinaa ndru,
mu wi mbe yili.
7 Kachindɛ sna jijuo pan,
na we ki nɔɔloo,
a na pe kee titi yuu,
wa ka ta mbe yo.
8 Na mu sisaa jawa nyjila kro nu,
pie kɔɔ mu yeeri kefuɛn pefun.
9 Jijiere kee ŋga lewo jawa kro,
ki pe sisaa,
a ŋmba u leele pini na tɛɛ kre,
u kee na tna leele pan.
10 Na mu kɛ waa gblɛ katala nyjila,
chin na fɔɔnrɔfun wi ŋu.
11 Na mu ndro nya,
a u kanyana na shie na u ni
kumu nu kre,
u shɔ mu wa,
12 maashia yo na mu kee ka ma,
Nyiɛkpɔɔ mu jawala,
na mu kepele kro chin,
a u mu nyaa,
a kee ŋga mu pe we le,
mbe mu ŋga ki fɔtɔɔrɔ.
13 Ni pɔ, ta srɛ lii, u nyu,
imi na na srɛ wa zezee nu,
u tna ndile na kre,
14 pan kachindɛ tna mu nyiɛ pan,
kena na mu kachindɛ ta,
mu baŋga we nyu.
15 Maashia pe na lewo sisaapefun,
ŋmba u lewo frakafun toni,
mbe u ju dnumu kolo na,
mbe u katoo shɔ mbe ta wre wi.
16 Na lewo frakafun to
gbee kɔɔnashin,
we ndru mbe yiri na,
la, kee nunu chom da
mbe sisaapefun chan,
mbe wa jaa yiri na.
17 Na mu loŋgo to,
maa ti mbe ki tna mu pan,
a na u gbro,
maa ti mbe mu yiɛshɔ.
18 Na mu tia mu yiɛshɔ
u gbrontoo na,
o Tafun Nyiɛkpɔɔ we ki chin,
a kie ti mbe wa u ndie tini na.
19 Maa ti mbe sisampefɛɛnlɛ,
taara na mu yaa,
ndee mbe mu yiɛ nyina pe na.
20 Ŋgi na hin? Sisaapefun n wa,
na kaan haa ni baŋga,
a wa yaka ta.
21 Ni pɔ, o Tafun Nyiɛkpɔɔ fiɛ,
mu ŋunu ŋga buuro,
leele mblɛ pie yiri mbe ŋunu,
ndee mbe Nyiɛkpɔɔ taan kre,
ŋu na pre waa chaa mbe yaka pe.
22 Ŋgi na hin? Nyiɛkpɔɔ ndee,
ŋunu we jaa ti
mbe pe klaa pe fo,
a ŋmbi we jaa kee ŋga
kie pe ŋga chin hin?
23 Kaalɛɛ nyjɛ kachimblɛ yo
mu tɛɛ mbo,
“Ki n nyu na mu na kala lii,
mbe ndro yiɛ le,
mbe chiin kpra yo.”
24 Ndro ŋmba we yo
pimi lifun pan na,
u tam li kre,
u kee we leele bin,
mbe pe u sun.
25 A kala lifɛɛnlɛ mblɛ
pe pimi lifɛɛnlɛ ndie tinii kre,
pie dwamu ta.
Pe kee kro we nyu mbe pe ŋga.
26 Ndro ŋmba u kala nyu woni
kpra ni wre,
ki nyina na nunu chichuo wi.
27 Mu see fali mu yirɛ luu,
mu chin mu jawa na
mu mu katoo sin.
28 Maashia dansiɛrɛ waa li,
mbe mu ŋmbrɔ taan finfin,
ndee mbe kala taa u na.
29 Maashia yo mu ŋmbrɔ pan na,
kee ŋga u ni pe ŋga,
mbe u pe ka,
ndee ŋga u ni pe kre,
mbe ki fɔlɔ tɔ u na.
30 Ki ble ka ndaa tro,
gbashiafun jawalafun
wa see mbɛɛ na.
31 Wuuro na nyaa na see kre,
shɔ mu ta poŋgo.
Dnɛ nyjɛ ni wra buŋgo sin,
mu ki fɛ mu kun kro,
na juari mu wo.
32 Bawa ndaa yire,
mu see kre le komm,
mna kala ka tuan,
mu yili kre see kre nu.
33 Na mu yo mu sni
mbe ŋunu chiɛri,
mbe kɛnyi pɔ gbun na,
mbe wuu chiɛri,
34 shian we mu yii,
mbe mu pe na ndro sni,
a juo pan mu u tɔ,
mu u yirɛ koli.