23
Na ŋu na lekpɔɔ tni mbe li,ki fna mbe mu u kpɔɔmu
kre jawa.
2 Na fuŋgofun wi ŋu,
mbe mu muyɛ dɔɔta.
3 Maashia u sro kre tnamu le
mbe li jajaara ni,
na kre ma,
aada u mu dɔɔtaa.
4 Maashia muyɛ tɔɔra tataara,
swa chaara na.
5 Mu jaa swa ta mbe ki yili mu kɛɛ,
mbe ki mu fo,
kie jaa fun mu nu,
mbe pe na kuɛn ki ta,
na nyuu wi mu yiri mu sɛ.
6 Ŋu na pɛɛnrɛfun waashia chaa
mbe u sro li,
ndee mbe ti u sro taan,
ŋga u lii kre niŋge mu yii.
7 We mu yeeri na,
“Pan mbe o li.”
U mu yeeri woi,
ande u lɛɛ kee ma.
U jajaara kre tia,
kee ŋga u yuu, ma u pini.
8 Na maa u sro kre ka le nyuu,
mu ki tuuru peii,
mbe ki ti mɛɛ chichie,
ŋga mu na u ŋga kre,
fun mu nu.
9 Maashia jawala kee yo jijuo pan,
ŋgi na hin? Wa ndie tɛɛ mu pan.
10 Maashia tra samu ŋga pe
kun mu tɛɛ lɛɛ kre flo ki titɛɛ,
ndee mbe bijro tra shɔ u kɛɛ,
11 ŋgi na hin? O Tafun Nyiɛkpɔɔ,
Jaŋgafun wre wi u lefun,
a we u kala yo mbe u ŋga.
12 Ndie tɛɛ mu nyinafun kee
na chichie,
mu kachindɛ kee yii,
mu le mu jawala nu.
13 Na mu pɔ ndie tini we chinɛ,
Ŋgi na hin? Fwa wa pɔ gbo.
14 Na mu pɔ ndie tini,
kie jaa u nyina ŋmaa kolo.
15 Ni pɔ, na mu kala chin,
kie ti mbe ni yiɛ shɔ.
16 Na ni loo a mna
kachindɛ kee yuu kre,
kie ti mbe ni ndra kpɔɔ ni na.
17 Maashia ti mbe mu yiɛ nyina
sisampefɛɛnlɛ na.
Ti mbe o Tafun Nyiɛkpɔɔ
wre fiɛrɛ pe mu pan keshian.
18 Na ki pe ma kre,
mu baŋga we nyu mbe mu ŋga.
19 Ni pɔ, ndie tɛɛ mu loo,
mu mu tnimu jawa chichie.
20 Ŋu na gbɔgbɔɔlɔ,
ndee liliolo waa na nyaari.
21 Gbɔgbɔɔlɔ na liliolo pre,
shian na mu mbe pe yii.
Na kee ŋga mu ja na pini
kro yi na, mu li mbe sni waa,
kena mu wo yi yɔɔlɛɛ tɔɔ.
22 Mu lɛ nyu kee loo,
na wre ma kaa mu n wa.
A na mu lo lɛ chalɔ,
maashia u le fiɛn.
23 Kpralie, na hachila,
na yira twan, na jawala,
na mu fɔlɔ gbun yi ka na,
fɔlɔ waa ma,
a imi yi ndrɔ sheli mu da kre na,
maashia ka prɛ.
24 Na mu pɔ fraka,
ki mu kaan yɛshɔɔrɔ.
A na mu pɔ kala chin,
mu jaa muyɛ kpɔɔ na u ni.
25 Ti mbe mu lɛ na mu lo,
mu tɛɛ mbe peyɛ kpɔɔ,
a ti mbe pe yiɛshɔ mu na.
26 Ni pɔ, ndie tɛɛ ni pan chichie,
mu ni kepele le mu ni tuan.
27 Chlɔ tɛtiɛrɔɔ pe na
wee jijuom pɛlɛ yi,
a chlɔ ŋmba u yilii u plɔ kro wre
pe na kɔlɔ foo,
ŋga nu mu le mbe jira,
a ma jaa yili na yi.
28 Pan pe bilɛ sri,
na kokɔɔn ndro sri mbe u ju,
a pe tia bilɛ tataara,
n na kpra li, na pe chiɛlɛ ni.
29-30 Ni nyina lewo gbɔgbɔɔ,
mbe mu nyina na,
wre u kala nyaa,
na fooro lii kpɔɔ,
kakɔtuŋu ŋmba u taanri kee na,
wre na klɛ na mu mbe to,
mbe nyimi yire u nyiɛlɛ na.
31 Maashia ti mbe imi simi
yiɛ nyinai,
gbɔyira nu mbra kani,
na mu ki kna mu le nyuu,
mbe ki tii brɛmm kre mu fana.
32 Na mu ki gbɔ a nyiŋge se,
mbe kra mu wii,
na wɔɔ sisaa titi wi.
33 Na ki pan ma,
yirɛ nyjɛ mu nyaa kro pe fɔnyi,
a ma jaa jawa chiriri,
a ma jaa paara chichie.
34 A kie mu pe na,
lewo ŋmba uu wa krɔ nu,
a epo na u viŋge na shie,
na paan yi.
35 Mu fna mbe kna mbe yo na,
ki pe na pe ni gbun na yira ni,
ndee mu ni frɔ,
a ni n chin ki nyjila nu,
a ki n na ni yaa,
mbe yiri mbe sɛ simi,
ka chaa gbɔ mbe ya.