22
Mɛɛ chichie nyu mu wɛ,wejiyirɛ taara na,
a na muu wa na yɛnyiŋge ni,
ki nyu mu wɛ swa na.
2 Shianfun na swafun kro nunu,
o Tafun Nyiɛkpɔɔ
ŋmba u pe wa wre yiɛ.
3 Na kala paan, kachiŋu we ki nya,
mbe uyɛ wɔ ki nu.
La, jijuo we nyaari jukajuka
mbe sɛ to ki nu,
mbe kɔɔ na ndachiɛn nyɛni.
4 Na mu muyɛ nyjii,
mu na o Tafun Nyiɛkpɔɔ fiɛ,
we ti mu buuro ta,
mbe wejiyirɛ ta,
mbe ŋmatitnɔmu ta.
5 Na mu ŋmaa chaa,
muyɛ wɔ mu yili sisampefɛɛnlɛ,
kooloe nyjɛ na pe tro nu,
wuuro na pɛɛlɛɛ wa pe kooloe,
nyjɛ na pe nyaari na tro yire na.
6 Pɔ nyina kolo chichie
ŋga na ki fna u tro,
na waa lɛ, wa ki wa.
7 Swafɛɛnlɛ tinlɛ lɛ shianfɛɛnlɛ,
la, na mu swa jin ndro pan,
we mu kaari tnu.
8 Na ndro sisaa luu,
jini we kun,
a u leele fiŋgee nyu we to.
9 Na ndro lɛɛ tna,
a wra pɔlɛfɛɛnlɛ kaan sro kre,
Nyiɛkpɔɔ u kaa dwamu
10 Na mu kplɛndɛlɛfun ni lawee,
kakralie na kakrɔ nyu we to.
11 Ndro ŋmba jawala ki nyu,
a u nyu kee tna kre,
we ŋunu ta nunu.
12 O Tafun Nyiɛkpɔɔ yiɛ wa,
kpra kee na nyjila kro nu,
la, wa ti mbe kafnu uyɛ ta.
13 Gbashiafun u yuu na,
na ni yili fimi na,
jira we ni yii mbe ka,
ki tia wa yili.
14 Tiɛrɛɛ pe na pɛlɛ yi,
a mblɛ ni Nyiɛkpɔɔ krɔkun kre,
pre pe tuuri ki nu.
15 Pɔ ŋmba u ja
na jijiere kee pini kre,
fwa ki ki woni u kɛɛ.
16 Ŋmba u shianfun dnumu,
mbe yire ki na mbe uyɛ ta kre,
we kɔɔ shian,
a ŋmba u swafun kee swa kre,
we kɔɔ shian.
Kachindɛ Kee Fulo Na Kɛ Yire
17 Ndie tɛɛ ni pan,
mbe ni mu nyina kee nyjɛ,
kachimblɛ yo mu tɛɛ.
Kee nyjɛ pe nyina yire tuan,
18 na mu jaa yi sɔɔnri
mbe yi yo kre, ŋu titi yiɛ we shɔ.
19 Ni chaa mbe mu dankna,
o Tafun Nyiɛkpɔɔ na,
kre ki tia ndaa chaa,
mbe yi yo mu pan fuŋgaami.
20 Ni kachindɛ kee fulo na kɛ,
nyunɔ mu tɛɛ mu pan,
hachila na paaranyinaa kee yi.
21 A yie mu nyina kpra titi kre,
mbe ki ti na pe mu tun ki pan,
mbe mu ki nya
mbe paan mandiɛ bɔ.
22 Maashia shianfun pe
imi na ki n fna,
ŋga u shian kre ndra na,
ndee mbe u gbun pimi ni
kala lihaa.
23 O Tafun Nyiɛkpɔɔ we u kala li
mbe u ŋga,
a na ndro u jawa sisaa ni,
wa ufun ti.
24 Maashia ndro ŋmba uu pɔɔrɔ ni,
a u krɔ na mu mu kun wru nunu,
25 na kre ma mu kɔɔ u kepele tuan,
a ma jaa chinɛ.
26 Maashia yire ndro fɔlɔ nyu na,
27 na kre ma,
na mu n shia ja mu fɔlɔ kre tɔ,
pie mu sniyira kuraa shɔ
mu pan,
28 Sam ŋga mu tolɛɛlɛ kun
mu tro kre,
maashia ki wɔ ki lawee.
29 Na mu ndro chin,
a wra tnumu tuni imi na ki fna,
wre fun wre u nyu mu fna ŋulo yiɛ,
a wa pe tnu fio.