21
Imi o Tafun Nyiɛkpɔɔ ja na,lafolo nyumu kna kra tro
mna u chaa kre,
pan u ja na ŋunu jawala kna,
wra ŋga u chaa pini.
2 Lewo kee ŋga u pini kro,
u jawa na ki fraka,
la, Nyiɛkpɔɔ u lɛɛ kee kro chin.
3 Nyiɛkpɔɔ yiɛ shɔ kefrakaa pee na,
mu wɛ ŋga mu srawɔ,
mbe u ŋga na.
4 Yɛkpɔɔmu na mɛchaara
pe sisam.
5 Tnumu ŋga mu tun jawa chichie,
mu chin mu ki pe,
kre kie nyu mbe mu ŋga,
la, fiɛlɛɛ sisaa ndro leni shian nu.
6 Na mu kala fnɛ mu muyɛ ta,
kia mu nafa,
a kie sɛ na mu ni kumu nu.
7 Sisampefɛɛnlɛ pɔɔrɔ ki pe klai,
ŋgi na hin? Pe chichie pee je.
8 Lewo sisaapefun,
u kepele ni pe teeri na u chini,
a frakafun frakaa ni pe u chini.
9 Ki nyu na mu sni kagbala,
mu wɛ ŋga ŋu na chlɔ,
kakɔtuŋu we chaa
mbe sni nyuŋgo nu.
10 Kefuɛn sisaapefun jawa,
mbe pe nyjila kro nu,
a ndro fooro n wa u na.
11 Na pe kplɛndɛlɛfun ndie tini kre,
jijuo damatii kachindɛ tuan,
a na mu kachiŋu nyina kee
u ki chini.
12 Nyiɛkpɔɔ ŋmba u fraka wre,
u chin kee nyjɛ yi pini,
sisaapefun katoo,
a we u kla.
13 Na mu krɔ kna mu wa
shianfun nyɛnɛɛ na,
na ŋu titi waa na nyɛni,
ndro wa loo mu pan.
14 Na ndro krɔkun na mu ni,
a mu ju brɛmm mu sɛ u ŋga yaka,
kie jaa u krɔ nyiŋge.
15 Kpralie tii mbe ŋmba u fraka
yiɛshɔ,
la, kie ti mbe sisaapefun yiɛ je.
16 Ndro ŋmba wraa kachindɛ wru,
mu pe kala kre,
we sɛ kumu nu.
17 Na mu yiɛshɔ waŋgra sigbɔɔrɔ,
na sro tɛɛn liire tataara na,
shian nu yie sɛ na mu ni.
18 Kanyana ŋga sisaapefun chaa,
mbe ki frakafun nya kre,
ki kna na tuuri u na.
19 Na mu tni tablɔ tra waara,
ŋga nu ndro n wa nu,
ki prɔ ŋga ŋu na chlɔ kakɔtuŋu,
ŋmba u taanri we chaa tni na.
20 Kachiŋu u taa na uyɛ nyu lii,
la, na jijuo swa ta we ki li,
nyaanyaa mbe ki kɔ u kɛɛ.
21 Na mu kpra lii, na latam pini,
mu ŋmaa we tnu,
a leele we mu ŋga buuro,
mbra mu pini chichie.
22 Kachiŋu nunu chom we jaa,
chia na ki faŋgafɛɛnlɛ tɔ,
mbe ki buŋgo ŋga pe sin,
mu ki fɛ mu kun,
na kaan ki na kre juari.
23 Lewo ŋmba u ja na frɔ
u nyu na kre,
uyɛ woni katala nu.
24 Lewo ŋmba u kpɔɔrɔm
nyina tataara kre,
u leele pini na tɛɛ.
25 Niŋge ki gbashiafun kuu,
ŋgi na hin? Na u kɛ wa taa
yaka na mbe u tnumu tun.
26 A u yiɛ nyinai yira na kpɔɔ,
la, lewo ŋmba u fraka
u lɛɛ woni na kee.
27 Nyiɛkpɔɔ afuŋgo yi na,
sisaapefun we srawɔ mbe u ŋga,
a ŋga ki u bin kuraa yi na,
na waa jawala fɔɔn le.
28 Na kafnu dansiɛrɛ li,
praa u shɔ mu li,
la, ndro ŋmba u kala jawa
na shie yiɛ kpan,
na u kala yo, pe ki shio na lii.
29 Sisaapefun gbuntitirem teeri
na kala pini,
mbra uyɛ pini na u nyu,
la, ŋmba u fraka wre jawa
mbe chiin kee pe.
30 Kachindɛ, ndee jawala,
ndee paaranyinaa kee ka n wa,
mbe jaa da Nyiɛkpɔɔ wo ni.
31 Mu jaa soolo san mbe sɛ ŋunɔ,
la, na mu wi mbe yili,
o Tafun Nyiɛkpɔɔ kɛɛ ki nyi.