20
Simi gbɔntoo ndro pini jijuo,mbe ti wra gble,
ki tia ki pe jijiere kee,
na mu simi gbɔɔ to.
2 Na ŋunu krɔkun,
u fuuru pe na na blɛkpɔɔ wi,
kena ŋmba u tia u krɔ na kuun kre,
uyɛ ŋmaa wa jenyje.
3 Jijuo u kakra nɔɔ hle yi,
na mu muyɛ shɔnli,
mu muyɛ wɔ mbe yili
kakra kee nu.
4 Gbashiafun ŋmba u n fali,
fali nyjila kre,
na pe see yirɛ kuun
wa yɛ taa kun.
5 Lewo lɛɛ kee pe na nyumu
ŋga kii wa kɔlɔ jijuom nu yi.
Kachiŋu u ja na ki koori.
6 Leele tataara yuu na,
kprafɛɛnlɛ lɛ,
la, kprafun titi taara sheli.
7 Lewo ŋmba u fraka,
u tnimu nu kre,
u biile dwamu taa.
8 Na ŋunu kprafun kala lii,
mna sisam kee nyi kpan,
we ki nya.
9 Kena ndro ŋmbi uu wa,
mbe jaa yo na,
“Mi loloŋgo pe chasi,
a ni pe cheche,
a sisam ka n wa ni nu hin?”
10 O Tafun Nyiɛkpɔɔ n na,
dnumufun kee chaa.
11 Pɔ kepele ni pe u chini,
na we pe kprafun mbe fraka.
12 Nyiɛkpɔɔ o ŋga nyiɛlɛ,
mbe o na nyaa na yi ni,
mu o ŋga ndiile
mbe o na ndru na yi ni.
13 Na mu tia ŋunumu tna
mu pan nyjila kro nu,
shian kie mu yii.
Kena tnumu tun kpɔɔ,
kre mu sro ta mbe li.
14 Yirɛ lɔfun u taanri na,
“Yirɛ ndrɔ sheli.”
A na waa krɔ kna,
mbe u sɛ na uyɛ kpɔɔri
na u yili abuuri na.
15 Swanyiɛ, na saanrɛɛ
chichielee wa,
a yi ndrɔ sheli,
la, ndile ŋga ki kachindɛ kee yuu,
ki taa sheli mu wɛ yi na.
16 Na mu daŋga mu yire fɔlɔ nyu na,
mu krɔyira ni mu kɔɔ ki fɔlɔ tɔ.
17 Na mu tro dnumu kolo na,
mu sro ta, ki tna kpa,
la, ki li n kɔ haa kre,
pan kie pe na tanyiɛ mu kaa.
18 Jawala chichie shɔ ndro pan,
mu kee kro we nyu.
Ki fna mu jawala shɔ,
mbe chiin sɛ ŋunu.
19 Ma jaa ndra ndra kee yo,
kaa lifun tataara pan,
kena muyɛ kun mu laa u na.
20 Lewo ŋmba we u lo,
na u lɛ sun kre,
kumu ki fna na u ni.
21 Na krɔlie n da mu na,
a mu ki li jaŋga na, kia mu nafa.
22 Maashia sisam tɛɛ,
mbe sisam fɔlɔ tɔ,
ki ti mu o Tafun Nyiɛkpɔɔ shie,
mbe u ki yo mbe mu ŋga.
23 O Tafun Nyiɛkpɔɔ n na,
yirɛ krayira dnumu wo chaa,
leele mblɛ pe ma pini pre,
u pe fun.
24 Ŋga lewo shie na paan ŋga,
o Tafun Nyiɛkpɔɔ u u le,
lewo wa jaa dɔɔta uyɛ.
25 Na mu nyu yo na mu yira ka pe,
mbe Nyiɛkpɔɔ ŋga,
ki jawa chiriri tun,
na kre ma mu kɔɔ
ndachiɛn nyɛni.
26 Ŋunu kachiŋu
u sisampefɛɛnlɛ nyaa,
na pe ndie tinii.
27 Ŋumu ŋmba lewo nu wre wi,
o Tafun Nyiɛkpɔɔ kania,
ŋga ki lewo lam kee kro nyaa.
28 Koroo na kpra lie ki tii
mbe ŋunu ŋunumu lie sɛ yiɛ.
29 Nyanyjɛble yɛnyiŋge yi u faŋga,
a nyjofinyi yi blɛlɔɔ nyɔɔ.
30 Na mu ndro gbun
mu tlo tɛɛ u na,
kie jaa ti mbe u keesɛɛ pee ti.