19
Na mu shian mu frakamu tnimu nu ki nyu,
mu wɛ ŋga mu na jijiere
denyjuu lii na.
2 Na lewo kala chaa pemu,
a u n jawala ni, ki n nyu,
a ŋmba u fiɛlɛ kee na sisaa kre,
wraa mu mbe kala cha
mbe uyɛ ŋga.
3 Lewo jijiere ja na u klai,
mbe u kna mbra ki baa,
o Tafun Nyiɛkpɔɔ na.
4 Swafun nɔɔlɔ pe nɛɛi,
la, shianfun na u nunu lalaa
na mu mbe kla.
5 Lewo ŋmba u kala fnɛ kala lihaa,
wre ndie pe tinii,
praa u ti mbe u u yɛ wru mbe li.
6 Lewo ŋmba u uyɛ ta,
wre lenɛɛrɛ duuri,
a ŋmba u leele kee,
wre nɔɔlɔ pe nɛɛi.
7 Na mu shian, mu sele wolo kee
ka ma, na mu ni.
Pan yi chɔɔ mu nɔɔlɔ wa mu wru,
mbe pe yaka.
Mu kee ŋga mu chin kro pe,
mbe sɛ pra,
ma nɔɔlɔ ta fio.
8 Lewo kachiŋu uyɛ kori,
a ŋga u kee nɔɔ ndru kre ndra na,
we nyu u tnimu nu.
9 Lewo ŋmba u kala fnɛ
kala lihaa kre,
pie u ndie tini.
A u kafinɛ kre,
we ti u dɔɔya.
10 Yɛtaara n fna jijuo ni,
a tnu n fna mbe ŋunumu li.
11 Kachindɛ ki ndro kaan frɔ,
na ndro u pe kefɔɔn,
a u nyiɛlɛ ka mu wa ki na,
ki u kaan yɛnyiŋge.
12 Na ŋunu krɔkun,
u fuuru pe na blɛkpɔɔ wi,
la, na u yiɛshɔ pan ki nyi na,
mɛŋɛ wo nyaa na.
13 Pɔ jijuo u lɛ leni dɔɔya nu,
a chlɔ kakɔtuŋu pe na nyiɛ ŋga,
ki paan mu kro na nuni yi.
14 Ndro we jaa u sefɛɛnlɛ krɔ li,
la, Nyiɛkpɔɔ u lewo kaan
chlɔ kachiŋu.
15 Gbashia ki paan na ŋunumu ni,
a gbashiafun u sni klo.
16 Na mu li Nyiɛkpɔɔ mbra na,
mu ŋmaa we tnu,
a na mu ndie wɔ mbra yire na
mu ku.
17 Na mu pɔlɛfun pe chichie,
o Tafun Nyiɛkpɔɔ mu jin ki yi,
we mu ŋga ki fɔtɔɔrɔ.
18 Mu biile pɔɔri chichie,
nyjila ŋga nu pee fiɛnfiɛn ŋga,
na kre ma,
mu ya pe na mbe pe kla.
19 Na ndro krɔ kuun nyaanyaa,
na waa kala ta ti mbe ki u li,
na kre ma na maa u shɔ ka nu,
pan mu na u shio suwi,
na wa krɔ sisaa ti.
20 Na mu ndie tɛɛ paaranyinaa na,
na chaa mbe kee tuan,
kie ti mu kala chin kpɔɔ.
21 Lewo jawala kee nɛɛ tataara,
la, ŋga o Tafun Nyiɛkpɔɔ chaa
kre kie pe.
22 Kee ŋga ki shian yi na,
mu leele kori,
a na mu shian ki nyu mu wɛ,
ŋga mu pe kafnu na.
23 O Tafun Nyiɛkpɔɔ wre fiɛrɛ,
ki lewo kaan ŋmaa,
a ki fun wre wa fiɛ,
a keesaa wa u da fio.
24 Wa gbashia tii,
mbe u sro kuun le nyuu mbe pra.
25 Kplɛndɛlɛfun ndie pe tinii,
mbe ki ti hamblɛ u le mbe tuan.
A kachiŋu pe fraka,
mbe u ki tɛɛ mbe tuan.
26 Pɔ nyifɛɛrɛ lafun we u lɛ
krɔ shɔ u kɛɛ jaŋga na,
mbe u lo gbun mbe ni katoo.
27 Ni pɔ, na mu n na chaa
mbe pe mu fraka,
mu fun jawala kee na.
28 Denyjuu dansiɛrɛ lie wa ti,
mbe pe jaa kee kpra kun chichie.
29 Kplɛndɛlɛfun we ndie tiniɛ ta,
a daŋgo u fna na gbɔɔn ni.