18
Ndro ŋmba u uyɛ wonileele nu wre,
uyɛ yiɛ nyi,
a ŋga lenɛɛmu yii kre,
wa ki wru fio.
2 Lewo jijuo na ndie tɛɛ kala na,
mbe ki nɔɔloo mbe kɔ,
la, u chaa mbe paara,
mbe pe yo u kala chin.
3 Sisaapee ki tii mbe pe lewo le fiɛn,
a nyifɛɛrɛ ki paan mbe ndro fomi.
4 Kachiŋu paaraa, ki nyina
imi na u jawala juo mu da.
5 Ki n nyu na mu pimi lifun ŋga tam,
mbe tam lifun gbun na pimi ni.
6 Jijuo nyu kee ki paan kakrɔ ni,
a kre ki u leni kala nu.
7 Jijuo nyu kee ki lawee klai,
a u nyu kee kre chɔɔ ni
u uyɛ peerii pɛlɛ.
8 Yaka n wa mu tna,
mu da na kroyoo ni,
a pan ki loo tna.
9 Gbashiafun pe lewo sisaa,
na lewo klafun wi.
10 O Tafun Nyiɛkpɔɔ wi o fɛnkaari,
u jaara frakafun shie mbe u u shɔ.
11 Swafun jawa na u yirɛ,
we jaa kɛ tɔ u na,
imi na pe mboo siin,
mbe chia fɛ mbe kun kre.
12 Yɛkpɔɔmu ki ndro klai,
a yɛnyjiimu ki ndro kaan buuro.
13 Ndro ŋmba wraa ndie tɛɛ kala na,
mbe chiin ki nyu wɔ kre,
jijuo wi,
a ki pe nyifɛɛrɛ kee mu u ŋga.
14 Yaŋu jawala ŋga u taa,
ja na u saanla,
la, na mu yaa,
na kawa na ma yiri,
ki ka kuun mu na.
15 Kachiŋu u uyɛ kna
nyjila kro nu mbe tuan.
16 Na mu chaa mbe lekpɔɔ
ya mu na,
klu mu sɛ u kɛ yaka tun,
kie kolo nyaa mu pan.
17 Na ndro na u ŋmbrɔ ta,
a pe sɛ na kee kre ni kala lihaa,
na jle wo wre paara,
u jawala kro yi na u tam li,
fɔna shiinwo wre waa paara.
18 Na kala pan pɔɔrɔfɛɛnlɛ,
shiin lalaa mu sheli,
pie jaa kɛɛn tɛɛ,
mbe yire ki na
mbe pe lalaa gbeele.
19 Mu ŋmbrɔ pe chichie,
we yire mu kro
na buŋgo ŋga pe sin,
mu chia fɛ mu kun yi,
la, na mu tun na u ni,
ma u lɛɛ kee chin.
20 Lewo nyu kee chichie,
tii mbe ndro yɔɔ, na sro u li.
21 Lewo nyu kee we jaa u ŋga ŋmaa,
a pan chɔɔ kie jaa u le kumu nu.
Kena kala ŋga mu ta,
mu paaraa nu kpan,
ki wru ma.
22 Ŋmba u chlɔ ta
wre yira chichie ta,
ŋgi na hin?
Nyiɛkpɔɔ u lewo blɔ kee chlɔ.
23 Shianfun u paara buuro ni,
a swafun na paara pɔɔrɔ ni.
24 Nɔɔlɔ plɛ na ya ndro na,
la, nɔɔlɔ chichie ka prɔ
lobiile plɛ na.