17
Na mu sro waara li,a ndie nyjii mu na,
ki nyu mu wɛ na kaara we bɔ mu na,
katoo ŋga nu kakrɔ nyi nu.
2 Tnu ŋmba u kala chin wre,
u jaŋga taa u tafun pɔ lawee,
mbe jaa yire ki na
mbe u tafun wre krɔ yira ta.
3 Kanhun ni pe swanyiɛ,
na swafiŋge pini mbe ki nyu,
a o Tafun Nyiɛkpɔɔ
u lewo pini na le mbe u nyu.
4 Sisaapefun ndie teeri sisam kee na,
a kafnu na kafinɛ kee ndru.
5 Na mu shianfun pini na tɛɛ,
kena Nyiɛkpɔɔ ŋmba u u wa
wre mu tɛɛlɛ.
Ŋmba yiɛ ki shɔ
ndra pɛɛnrɛfun kee na kre,
we ndie tiniɛ ta.
6 Imi na biile pe lɛɛlɛ teeri
na peyɛ kpɔɔri kre,
pan blɛlɛɛlɛ pe nanae teeri
na peyɛ kpɔɔri na.
7 Lewo ŋmba pe kaan buuro
wre na kala fnɛ,
a jijuo na kala chichie ta mu yo.
8 Plɛ jawa na dɔlɔɔ pe na
dobodobo wɔɔ yi,
a pe ki shɔnli na kie jaa
kala kro pe.
9 Na mu chaa
mbe leele na mu kee chaa,
na pe punu mu na,
ta tii mna pe kee.
Na ndro mu pe sisaa,
a mu kro na ki jawa,
kie ŋu na wre nɔɔlɔ kla.
10 Na mu kachiŋu yiɛ kee yo u pan,
u ki teeri na kee tuan tataara,
mu wɛ na mu daŋgo gbun
gbee lafaa na.
11 Sisaapefun ŋmba u kanyaa leni,
katala nyjila kre we ndie tiniɛ ta.
12 Na mu sisire ŋmba biile
pe gbo fni,
ki prɔ na mu jijuo ŋmba u u
jijiere prɛ na tro fni.
13 Na mu sisaa tɛɛ mu chichie fɔlɔ tɔ,
sisam kee na la mu katoo fio.
14 Pan kakrɔ nɔɔ hlehaa nyi na,
pe lɔɔ bɛni a kraa paan mbe wali,
kena na kakrɔ paan,
ki nyu nyiŋge mbe ki chiin kpɔɔ.
15 Ŋmba u tam lifun gbun pimi ni,
mu sisaapefun ti a u sɛ kre,
u fɔɔn pe Nyiɛkpɔɔ yiɛ.
16 Na jijuo n na chaa mbe yaka tuan,
kena ŋgi kie ti,
mbe mu swa kla u na hin?
Na u n jawala ni.
17 Lewo na u nunu,
imi na ki nyi kpan nɔɔlɔ lɛ,
la, kee nunu ki sele nunu leele lii.
18 Lewo ŋmba u n jawala ni,
u yire u ŋmbrɔ fɔlɔ nyu na.
19 Kakrɔ chaa kpan,
sisaapefun wi,
a ŋmba u uyɛ kpɔɔri kre,
u kala chaa na uyɛ kaan.
20 Lewo ŋmba jawala ki n nyu kpan,
wa jaa nyu u tnimu nu,
a na lewo kala fnɛ
wra mu mbe kala ta.
21 Pɔ jijuo na u lɛ ŋga yaka,
na yɛjeere na foorolie bɔkɔ.
22 Yɛshɔɔrɔ lewo kaan faŋga,
la, fooro lie sisaa ka kuun
lewo faŋga na.
23 Kalalifun denyjuufun
u dɔlɔɔ shio,
mbe kpra kaari kafinɛ.
24 Jawalafun u kachindɛ kee
jawa mbe pe,
la, jijuo jawala n wa titɛɛ.
25 Pɔ jijuo u tii mbe u lɛ fooro li,
mbe u lo ndachiɛn nyɛni.
26 Na ndro n chin kefɔɔn pee nu,
ki n fna pe u ndie tini,
a na maa nya a pe frakafun ndie tini,
kena kpra ndra pe kna mu soo.
27 Lewo ŋmba u uyɛ shɔnli,
wraa paara tataara,
a lewo frɔfun u hachila taa.
28 Na jijuo frɔ u nyu na, a u n paara,
pe u jawa kachiŋu.