16
Lewo jawala wrui kala na,la, Nyiɛkpɔɔ u kala kro
taa haa chin.
2 Lewo kepele kro nyu u pan,
la, Nyiɛkpɔɔ u lewo lɛɛ
kee titi chin.
3 Mu jawala kee kro yo
o Tafun Nyiɛkpɔɔ pan,
kre kie nyu mbe mu ŋga.
4 Yira ŋga o Tafun Nyiɛkpɔɔ
wa kpan,
kii wa na ki taahaa ni,
la, sisampefɛɛnlɛ laalɔm yi klaa.
5 O Tafun Nyiɛkpɔɔ
yɛkpɔɔmufɛɛnlɛ fun,
a we pe ndie tini imi na ki fna.
6 Na ndro koroo na shɔnlie ta,
Nyiɛkpɔɔ nu,
we sisam tinkɛɛ ta.
O Tafun Nyiɛkpɔɔ fiɛrɛ ki tii,
mbe lewo sisam pee ti.
7 Na mu o Tafun Nyiɛkpɔɔ yiɛ nyi,
u tii mbe ŋu na mu loŋgo jaa tni,
wejinyiŋge nu.
8 Na mu nyaari kpra na mu ta fiɛn,
ki nyu mu wɛ ŋga mu nyaari
denyjuu na,
mbe ta nɛɛrɛ.
9 Lewo jawala wrui kee na,
la, Nyiɛkpɔɔ u u nyina,
kolo ŋga na we tro.
10 Na Nyiɛkpɔɔ yaa ŋunu na
wra paara,
u kee ŋga u yii kro we fraka.
11 O Tafun Nyiɛkpɔɔ chaa,
mbe yirɛ krafun u yirɛ kra kpra ni,
mbe prɛfun prɛ na kpra ni.
12 Ŋulo n fna mbe pe yiɛshɔ
sisam kepele na,
ŋgi na hin?
Kpra lie ki ŋunu kaan kpɔɔmu.
13 Kpra kee ŋunu chaa mbe loo,
ki tia ŋmba u kpra yuu kre,
ŋunu u kori.
14 Na ŋunu krɔkun ki ndro kuu,
la, kachiŋu tii mbe u yiɛshɔ.
15 Na ŋunu yɛshɔɔrɔ yiɛ tɛɛ,
ki tii mbe lewo ŋmaa li,
pan ki nyi na nyiɛ pan nyjila tloe yi.
16 Ki nyu mu tna na mu pe kachiŋu,
mu wɛ ŋga mu swa ta na.
17 Frakafun na nyaari sisam kolo na,
kena ŋmba u u nyaaraa dɔɔtaa kre,
we ŋmaa li.
18 Yɛkpɔɔmu lewo klai,
a mɛchaara sisaa tii mbe lewo to.
19 Na mu muyɛ nyjii mu shian,
ki nyu mu wɛ ŋga ŋu
na yɛkpɔɔmufɛɛnlɛ,
mblɛ pe juu pɔɔrɔ na pre we chaa,
mbe pe yirɛ yɔɔlɛ.
20 Ndie tɛɛ kee nyjɛ
pe mu nyina yire na,
mbe mu kee kro nyu mbe mu ŋga,
a ta kaan o Tafun Nyiɛkpɔɔ na,
mu dwamu ta.
21 Lewo ŋmba uu jawala ni,
mu kala chin kre,
u kee nɔɔ ndru,
a u paaraa tna ndie,
na ndro nyina kee na shie yiɛ.
22 Lewo kachiŋu pe ŋmaa kolo,
mu kachimblɛ ŋga,
la, daŋgo kala nyaa,
u jijiere ndra na.
23 Lewo kachiŋu jawa
mbe chiin paara,
a u nyu kee lewo nyina kee
na shie yiɛ.
24 Kala chichie ŋga ki yilii
lewo nyuu kre,
pan ki tnamu nyi na srɛ yi,
a ki ndro kaan faŋga.
25 Kolo kaa wa a lewo na jawa
na ki fraka,
la, ki kɔlɔ shie kumu nu.
26 Klo ŋga kie lewo ta,
tii mbe u tnumu tun kpɔɔ,
Na u yaka chaa mbe ka.
27 Sisaapefun sisam jawa mbe pe,
a u nyu kee pe sisam bribri.
28 Lewo sisaa u lewo kro yuu,
mbra ki kpali,
na kanyaa leni kee nu,
na nɔɔlɔ klai.
29 Lewo sisaa u u ŋmbrɔ fana,
na u leni kala nu,
na shie na u ni mna ki n fna.
30 Na ndro mu le,
mu nyini nunu fɛɛri,
mu nyu mɛɛri,
mu chin na kee chichie ma
u jawa na mu ni.
31 Frakafun u ŋmatitnɔmu taa,
a nyjofinyi pe yɛnyiŋge yira,
mu ki fun ŋga.
32 Frɔ nyu mu wɛ jaŋga taara na,
a na mu jaa mu yɛ yii ki nyu,
mu wɛ ŋga mu na
waŋgra poŋgo le na.
33 Lewo kɛɛn teeri,
mbe yire yi na mbe jawala cha,
la, Nyiɛkpɔɔ u kala kro nɔɔ chin.