15
Na mu kee nyu wɔ bonyaa ni,ki gbun nyiŋgei,
la, krɔ yolo paan na kakrɔ ni.
2 Kachiŋu paaraa paan na jawala ni,
la, jijiere paaraa na pan
na kala chiriri ni.
3 O Tafun Nyiɛkpɔɔ nyaa
lawee kro nu,
mu na sisampefɛɛnlɛ,
na chichie pefɛɛnlɛ kee
nyjɛ pe pini kro le.
4 Nyu kee chichie ndro kaan ŋmaa,
la, denyjuu kee lewo sɔɔnrɔ kuu.
5 Jijuo lɛ we u jaari mbe u ki je,
a na kachiŋu lɛ u fraka we ki wru.
6 Lewo ŋmba u fraka yirɛ taa
u katoo tataara,
la, sisampefɛɛnlɛ yɛtaara,
paan na kanyana ni pe na.
7 Jawalafun u kachindɛ kee
leni leele nu,
jijuo wa jaa ki pe.
8 O Tafun Nyiɛkpɔɔ yiɛshɔ lewo,
frakafun nyiɛtalaa na,
la, u sisampefun sra yirɛ,
nyjɛ ni u paan u kaan yire,
nu yi fun.
9 O Tafun Nyiɛkpɔɔ sisampefɛɛnlɛ,
kooloe nyjɛ na pe tro yire fun,
la, mblɛ pe ŋga ki fraka pini kre,
u pe kori.
10 Na lewo kefɔɔn pe,
we ndie tiniɛ kpɔɔ ta,
a na lewo n na chaa mbe pe u fraka,
kuu we ku.
11 Kee nyjɛ yi pini kuulo ndoo kro,
Nyiɛkpɔɔ yi nyaa,
pan chɔɔ lewo lɛɛ kee,
wa jaa ndra u na.
12 Kplɛndɛlɛfun tataara n na chaa,
pe u yiɛ kee yo u pan,
a wa jawala shɔ kachiŋu pan.
13 Yɛshɔɔrɔ ki paan na titɛɛrɛ ni,
a yɛjeere ki paan na fooro lie ni.
14 Jawalafun kachindɛ haa chaa
nyjila kro nu,
la, jijiere kee na daŋgo yiɛ shio.
15 Lewo ŋmba pe fiŋge wre,
u kala nyaa u tnimu nu
nyjila kro nu,
la, yɛshɔɔrɔfun uyɛ lii
nyjila kro nu.
16 Na mu shian na Nyiɛkpɔɔ fiɛ,
ki prɔ ŋga mu muyɛ ta,
mbra kala nyaa na.
17 Na ŋu na mu korifun chiin wɛɛ li,
ki prɔ ŋga mu sɛ chintɛɛn li
mu loŋgo katoo na.
18 Ndro ŋmba gbun ki n nyu,
wre u kakrɔ kuun nyaanyaa,
la, frɔ ki paan na wejinyiŋge ni.
19 Gbashiafun u kanyana fni
lawee kro nu,
la, na mu pe kprafun,
mu kee kro nyɔɔ na mu kaan.
20 Pɔ kachiŋu u tii mbe u lɛ yiɛshɔ,
a pɔ jijuo na u lo le mu nya.
21 Daŋgoolo yiɛ ki shio
pe jijiere kee na,
la, kee ŋga ki fraka,
kre kachiŋu pini.
22 Na mu paaranyinafɛɛnlɛ nɛɛ,
mu kee kro we nyu mbe mu ŋga,
la, na mu n wa na pe ni mu to.
23 Ki pe yɛshɔɔrɔ,
na mu kee ŋga ki fna ta mbe yo,
nyjila ŋga ki fna nu.
24 Na kachiŋu ŋmaa kolo yii,
wa ndru u kro,
mbe sɛ kuulo ndoo kolo yii na,
25 O Tafun Nyiɛkpɔɔ
we yɛkpɔɔmufun kaloŋgo juari,
mbe kɛ tɔ lekuchɔ krɔyirɛ na.
26 O Tafun Nyiɛkpɔɔ
sisam jawala fun,
la, u yiɛ shɔ kee chiriri yofun na.
27 Jajaara sisaa paan
na tɔɔra ni katoo,
a na mu chaa mbe mu ŋmaa tnu,
maa na dɔli yirɛ shio.
28 Lewo ŋmba u fraka,
u jawai mbe chiin paara,
la, kefɔɔn yilii sisaapefun nyuu
nyaanyaa.
29 Nyiɛkpɔɔ na sisampefɛɛnlɛ
lalaa haa le,
la, mblɛ pe fraka pre,
u pe nyiɛtalaa ndru.
30 Na ndro titɛɛrɛ yiɛ tɛɛ,
kre ki nyina na u yiɛ shɔ,
a ketaan loo
ki tii mbe ndro wejiŋge saan u na.
31 Na pe lewo jaari a u ki loo,
kena kachiŋu wi.
32 Na mu paaranyinaa je,
kena mu muyɛ gbo,
a na mu tia pe mu kna,
mu pe kachiŋu.
33 Nyiɛkpɔɔ fiɛrɛ lewo nyina
kachindɛ,
a yɛnyjiimu ki lewo kaan buuro.