14
Na chlɔ kachiŋu u katoo gbeele,mbe chlɔ jijuo na u wo klai.
2 Ndro ŋmba u fraka
o Tafun Nyiɛkpɔɔ fiɛ,
la, lewo ŋmba u n fraka
wre n na u fiɛ.
3 Jijuo paaraa u leni kala nu,
la, kachiŋu nyu yolo
u woni kee nu.
4 Na falifun n nui ta mbe fali,
u sro tɛɛ ndoe we tni waara,
la, na u nui ta mu fali,
shɔlɔ we bɔ u na.
5 Kpra dansiɛrɛ n na ndro fana,
la, denyjuu dansiɛrɛ nu kafinɛ nyi.
6 Na kplɛndɛlɛfun kachindɛ chaa,
wraa ki ta,
la, lewo jawalafun kachindɛ taa.
7 Muyɛ kun mu laa jijuo na,
ŋgi na hin? Ma kachindɛ kee
ka ta mbe yili u pan.
8 Ŋgi ki tia pra jawalafun yeeri
kachiŋu hin?
U dɔɔtaa kee kro nu,
la, jijuo jawala yi na,
kee ŋga u pini kro nyu.
9 Na jijuo sisaa pe,
u kee ka ma,
la, na ndro chiriri sisaa pe,
u tinkɛɛ tali.
10 Lewo yɛshɔɔrɔ,
na u yɛjeere kro,
wre chiin nu ki nyi,
wre na ndro wa jaa yi yɔ.
11 Nyjila ŋga ni sisaapefun
katoo jee kre,
na chichie pefun katoo wa
mu yire gbiŋmbi.
12 Kolo kaa wa mu fraka
lewo yiɛ na,
la, ki nyukɔɔrɔ kre shie kumu nu.
13 Titɛɛrɛ tii mbe ma lewo yɛjeere,
ŋga u nu nya,
la, yɛshɔɔrɔ kre kɔkro,
yɛjeere kree wa tɛ.
14 Lewo sisaa we fɔtɔɔrɔ
ŋga ki fna na u ni ta,
a lewo chiriri we u chichie
ŋga u pini fɔtɔɔrɔ ta.
15 Jijuo kee kro shio na lii,
a kachiŋu na u nyaaraa dɔɔtaa.
16 Kachiŋu dɔɔtaa,
na uyɛ woni sisam nu,
la, jijuo kee kro faa, wa dɔɔta.
17 Lewo ŋmba krɔ kraa mu
mbe kun,
wre u jijiere kee pini,
la, kachiŋu u frɔ taa kala na.
18 Na mu daŋga, jijiere tnu mu taa,
la, kachiŋu rɛ,
tnu ŋga u taa yi hachila.
19 Sisampefɛɛnlɛ we paan kosie kan,
frakafɛɛnlɛ yiɛ mbe pe tali.
20 Shianfun na nunu ta,
u kee u tnifɛɛnlɛ kuraa bin,
la, swafun wre nɔɔlɔ taa tataara.
21 Ki pe sisaa na mu
mu tnifun le fiɛn,
la, ŋmba u shianfun pini chichie,
wo yi dwamu.
22 Na mu leele jawa chichie ni,
pie mu shɔ mbe li,
mbe mu ŋga buuro,
la, na mu keesɛɛ jawa
mu fun kolo na.
23 Na mu tnumu tuni kpɔɔ,
mu muyɛ ja mu tnimu nu,
la, na mu tni finfin,
na kewɛɛ yuu,
shian kie mu gbo.
24 Tnu ŋga kachiŋu taa yi wejiyirɛ,
la, jijuo jijiere ni pe u chini.
25 Dansiɛfun kprafun lewo
ŋmaa shio,
a na waa kala fnɛ naa,
mbe u ndro wɔɔ ŋga.
26 O Tafun Nyiɛkpɔɔ wre fiɛrɛ,
lewo na u biile kaan faŋga,
mbe pe yire gbiŋmbi.
27 O Tafun Nyiɛkpɔɔ wre fiɛrɛ
yi ŋmaa kolo,
kre ki lewo shio kumu pɛlɛ nu.
28 Na lenɛɛmu wa ŋunu kro,
kre ki u kaan kpɔɔmu,
la, na u n leele ni
wa jaa yaka pe.
29 Lewo ŋmba u frɔ kpan,
kachiŋu wi,
la, ŋmba nu krɔ sisaa nyi kpan,
u jijiere u nyina.
30 Latom tii mbe lewo faŋga ta,
la, yenyjam tii mbe lewo yaa.
31 Na mu ndrashelee lii shianfun na,
kena Nyiɛkpɔɔ ŋmba,
u u gbeele wre mu le fiɛn,
la, na mu shianfun fooro chin,
kena mu Nyiɛkpɔɔ ŋga buuro.
32 Sisaapefun sisam ki u klai,
la, lewo chiriri kumu kɔkro kre,
uu wa na kaan haa ni.
33 Jawala wa kachiŋu ndra,
jijiele rɛ, pre n kachindɛ kee
ka chin.
34 Na waŋgra ka leele fraka,
ki waŋgra kre kaan mɛɛ,
la, sisam pee tii
mbe nyifɛɛrɛ ki leele gbo.
35 Ŋunu sumifun,
ŋmba u ŋga u chaa pini kre,
u yiɛshio u na
la, sumifun ŋmba
u ŋga ki n fna pini wre,
u ndie tiniɛ taa.