13
Na pɔ kachiŋu lɛ u jaari,u ndie teeri u pan,
la, pɔ ndikaŋu na jaaraa loo.
2 Lewo chichuo we u nyu kee tnu li,
la, ŋga denyjuufun nyiɛ chaa yi,
jiɛnlɛ kee bribri.
3 Lewo ŋmba u u nyu
kee dɔɔtaa kpan,
u u ŋmaa le chichie,
la, ŋmba wra paara mu dɔɔta kre,
uyɛ u klai.
4 Gbashiafun kɛ na to
u niŋge yira na,
la, ŋmba u tnumu tuni kpɔɔ kre,
u ŋga u chaa taa.
5 Lewo frakafun
n na kafinɛ kee chaa,
la, lewo sisaa,
nyifɛɛrɛ na yɛkuuro kee u yuu.
6 Lewo ŋmba u fraka,
kee nyjɛ u pini yire yaa u na,
la, sisaapefun sisam ki u klai.
7 Leele plɛ peyɛ pe na swafɛɛnlɛ lɛ,
ande yaka n wa pe pan,
a plɛ peyɛ pe na shianfɛɛnlɛ lɛ,
ande swafɛɛnlɛ lɛ.
8 Swafun u u swa teeri
na uyɛ ndra loni,
la, shianfun rɛ,
ndro wa u tɔɔra kee ka ni.
9 Lewo ŋmba u fraka kre,
pan u nyaa chasi na nyisee yi,
la, sisampefun pan wre lawee nyi,
na wɔmu ndoo kprikpri yi.
10 Yɛkpɔɔmu rɛ,
kakrɔ ni kre paan,
la, ŋmba u ndie teeri,
paaranyinaa na kre kala chini.
11 Na mu n fna mu swa ta,
kia mu mbe soo,
la, na mu kafue kun mu wa,
mu chin mu ki ta rɛ,
kie yire mu kɛɛ.
12 Yira ŋga na lewo kaan kre,
na u n na ki nyaa,
ki ja na u gbuun yira ni,
la, na u kɛ waa to ki na,
ki u kaan yɛshɔɔrɔ.
13 Na mu paaranyinaa chichie je,
kala mu chaa na muyɛ kaan,
la, na mu ki loo mu tnu ta ki nu.
14 Kachiŋu kee nyjɛ u nyina
yire pe ŋmaa kolo,
yie jaa mu shɔ kumu kɛɛ.
15 Kachiŋu lewo kaan buuro,
la, ŋmba ma jaa shɔ mbe li kre,
to dɔɔya kolo na.
16 Jawalafun dɔɔtaa
mbe chiin kala pe,
la, jijuo u kee kro pini jijiere ni.
17 Bituŋu ŋmba u n pe danknafun,
we jaa kala kla,
la, bituŋu ŋmba na mu jaa kaan wre,
paan na wejinyiŋge ni.
18 Lewo ŋmba u n na chaa
mbe tuan kre,
shian kie u yii mbe nyifɛɛrɛ u gbo.
A ŋmba u paaranyinaa wrui kre,
u buuro taa.
19 Na lewo yira ŋga u chaa ta,
ki taan u nyiɛ pan.
La, lewo jijuo rɛ,
wre wa laa sisam pee kro fio.
20 Ŋu na kachiŋu e nɔɔlɔ wru,
kre mu kala chin,
la, ŋmba na jijiele pe nyaari kre,
u kala nyaa.
21 Mna sisaapefun we tro kpan,
kanyana u kɔŋgɔ nini,
la, lewo frakafun rɛ, taan wre lii.
22 Lewo chichuo we krɔyirɛ ta,
mbe tɛɛ u nanae pan,
la, sisaapefun krɔyirɛ
we to frakafun kɛɛ.
23 Shianfun we fali mbe sro ta,
la, denyjuufun wa ti u yi ta mbe li.
24 Na mu n na mu pɔ gbuun,
kena mu n u kori,
na mu u kori,
kena u fraka kee kro nu.
25 Lewo ŋmba u fraka
we li mbe yɔɔ,
la, klo kie sisaapefun gbo.