12
Ndro ŋmba u kachindɛhaa chaa kpan, na u punu,
u chaa mbe pe u fraka,
la, ŋmba u n na chaa,
mbe pe u fraka kpan, jijuo wi.
2 O Tafun Nyiɛkpɔɔ
yiɛshɔ lewo chiriri na,
la, mblɛ pe sisam jawa kre,
u pe gbun pimi ni.
3 Sisaa pee na ti mbe lewo yire,
la, na ndro fraka,
ki tii mbe u yire gbiŋmbi.
4 Chlɔ ŋmba kepele ki nyu kre,
u plɔ kaan u na kpɔɔ,
na yɛshɔɔrɔ ni,
la, chlɔ ŋmba u tia nyifɛɛrɛ
na u plɔ kuu kre,
u tii mbe u plɔ sɔɔnrɔ ku,
mbe le u kajle nu.
5 Lewo ŋmba u fraka kre,
u jawala ŋga u wrui kre nyɔɔ,
la, lewo sisaa, fanafun wi wre.
6 Linku kee yi yilii sisaapefun nyuu,
la, frakafun kee ja na ndro shio.
7 Sisaapefun sele nɔɔ na mu
mbe fun,
la, frakafɛɛnlɛ sele nɔɔ
wa nyjila kro nu.
8 Na mu kala chin
leele we mu ŋga mɛɛ,
a na mu daŋga pie mu le fiɛn.
9 Na mu kɛ nyu,
a mu muyɛ pe fiɛn,
ki nyu mu wɛ na mu muyɛ kpɔɔ,
a yaka n wa mu pan
mbe mu ka na.
10 Na lewo chichuo yurɛ poorii,
u pe le chichie,
la, lewo sisaa ndrashelee lii
u yurɛ na.
11 Falifun ŋmba u tnumu tuni kpɔɔ,
wre u sro taa nɛɛrɛ,
la, ki pe jijiere kee,
na mu nyjila kla tnumu waa na.
12 Kee ŋga sisampefɛɛnlɛ chaa yi na,
pie hakɛ kee ta mbe pe,
la, frakafɛɛnlɛ we yire gbiŋmbi.
13 Sisampefɛɛnlɛ nyu kee
kna na pe yiri na pɛlɛ yi,
la, frakafɛɛnlɛ peyɛ woni
na yilii katala nu.
14 Lewo kee nyjɛ u yuu,
na nyjɛ u pini kre,
yire fɔtɔɔrɔ u taa imi na ki fna.
15 Jijiele pe jawai na,
kee nyjɛ pe pini kro nyu,
la, kachimblɛ rɛ,
pre ndie teeri paaranyinaa na.
16 Na jijuo krɔkun to,
ndro kro we ki chin,
la, jawalafun u frɔ yi u tɛɛlɛɛ na.
17 Lewo kprafun u kpra dansiɛrɛ lii,
la, lewo denyjuufun
u kafinɛ dansiɛrɛ lii.
18 Nyu susrom kee ja na ndro kuun,
na brɔfiɛn yiɛ shiin yi,
la, kachindɛ yolo
paan na wejinyiŋge ni.
19 Kpra ŋmaa tnu,
la, kafinɛ ŋmaa fiɛn.
20 Mblɛ pe sisaa jawa mbe pe kre,
kafinɛ kee bribri yii wa pe nyuu,
la, mblɛ pe wejinyiŋge chaa kre,
yɛshɔɔrɔ taa.
21 Katala na lewo ŋmba u fraka da,
la, sisaapefun katala nɛɛ tataara.
22 O Tafun Nyiɛkpɔɔ kafnu fun,
la, U yiɛshɔ ŋmba u kpra lii na.
23 Jawalafun na kee ŋga
u chin kro yo,
la, jijuo u jijiere prɛ lawee kro nu.
24 Na mu tnumu tuni kpɔɔ,
kie ti mbe mu pe jaŋgafun,
la, na muu gbashia ni,
mu kaari tnu.
25 Jawala sisaa tii mbe lewo yiɛ je,
la, ketaan tii mbe lewo yiɛshɔ.
26 Lewo ŋmba u fraka kpan,
u u ŋmbrɔ nyina kolo,
la, sisaapefun lewo waa na fɔɔn.
27 Gbashiafun na
yira ŋga na u yiɛ nyi ta,
la, na mu tnumu tuni kpɔɔ,
mu kɛ we kan yira
ŋga ndrɔ ki sheli na.
28 Frakaa kolo na ŋmaa nyi,
la, sisam kolo na kumu nyi.