11
O Tafun Nyiɛkpɔɔ n na,dnumufɛɛnlɛ kee chaa,
la, u yiɛshɔ
mblɛ pe kpra lii pre na.
2 Leele mblɛ pe peyɛ kpɔɔri pre,
kia mu mbe nyifɛɛrɛ pe gbo,
a kachimblɛ we peyɛ nyjii.
3 Kpra lie ki yiɛ klu frakafun pan,
la, lewo kafnu rɛ,
wre titi kafinɛ kee ni u uyɛ klai.
4 Swa wa jaa lewo ŋga ŋmaa,
u kumu ble,
la, kpra lie we u ŋga ŋmaa.
5 Lewo ŋmba u fraka na kpra lii kre,
u kolo kro nyɔɔ na u kaan,
la, sisaapefun wre, sisam we u kla.
6 Frakaa lewo ŋmba u kpra lii wre,
shio kala nu,
la, lewo ŋmba na ma jaa dankna kre,
u jajaara we ti u to
pɛlɛ ŋga u pɛɛri nu.
7 Na sisaapefun ku,
u ku na u dankna kro ni,
ki tia na mu muyɛ taa yɛtaara na,
ki pe kewaa.
8 Nyiɛkpɔɔ kɛ toni leele mblɛ,
pe fraka pre na katala kɛɛ,
mbe ti yi kna
mbe to sisaapefɛɛnlɛ na.
9 Lewo ŋmba u n Nyiɛkpɔɔ chin,
wre u ketle yoo teeri
na u ŋmbrɔ klai,
la, frakafun kachindɛ
we jaa ndro ŋga ŋmaa.
10 Na leele mblɛ pe fraka nyu
pe tnimu nu,
chia leele yiɛ shio.
Pan chɔɔ na sisampefɛɛnlɛ kuu,
chia leele yiɛ shio.
11 Leele mblɛ pe fraka
dwamu ka yaa chia na,
la, sisampefɛɛnlɛ nyu kee chia jee.
12 Lewo ŋmba u kefuɛn yuu,
u ŋmbrɔ na kpan jijuo wi.
Lewo kachiŋu u u nyu yiri kala na.
13 Lewo wa jaa u lɛɛ kee yo,
ketle yofun pan,
la, lewo kprafun kee tii lɛɛ.
14 Na yɛkulo kachimblɛ
n wa chia na,
ki kaari kajaa.
A na chia yɛkulo kala chin,
pre pe chia kre shio
na waa kaalɛɛ nu.
15 Na mu n ndro chin,
maashia yire u fɔlɔ nyu na,
na kre ma mu kɔɔ ndachiɛn nyɛni.
16 Chlɔ ŋmba u yiɛ saanri ndro ni,
pe kaan buuro.
La, blɔ ŋmba u n foorochiɛn ni
we uyɛ ta,
la, wa buuro ta.
17 Na mu chichie pini mu ki pini
na muyɛ kaan,
a na mu ndra sheli kala mu nyaa.
18 Sisaapefun na tnu ta ki nu,
la, chichie pee ki ka yaa ndro na.
19 Lewo ŋmba u kefrakaa pini
wre ŋmaa taa,
la, lewo ŋmba u sisaa pini,
nyjila kro nu wre,
kumu nu u shie.
20 O Tafun Nyiɛkpɔɔ sisaapefun fun,
la, u ŋmba u chichie pini wre kori.
21 Ki pe kpra na Nyiɛkpɔɔ we
sisaapefɛɛnlɛ ndie tini,
la, we frakafɛɛnlɛ shɔ.
22 Na chlɔ nyu a u kepele n nyu,
pan ki nyi na pe prako mana vru,
mu swanyiɛ feelee le ki na.
23 Kee ŋga na frakafun yiɛ nyi,
kre ki nyɔɔ na u kaan.
A na sisaapefun yira ŋga u chaa ta,
leele krɔ kuun na u ni.
24 Leele plɛɛ wa mu ja na kee,
a pan pe taa nɛɛrɛ,
a plɛɛ wa, a pe kɛ sheli,
ande pe shian kpɔɔri na yaa.
25 Lewo ŋmba u kee nyaanyaa
wre we nyu,
a na mu ya plɛ na,
pie ya mu na.
26 Na mu mu sro tɛɛ
na ndrɔ kpɔɔ sri kre,
suni leele mu suni,
la, na mu yi wɔ fimi na
a leele yi ta mu lɔ kre,
pe mu kaan mɛɛ.
27 Ndro ŋmba u chichie haa chaa,
wre u buuro taa,
a ŋmba u sisaa jawa kre,
sisaa u taa.
28 Mblɛ pe peyɛ wru mu taa,
pe yɛtaara na kre we to,
la, mblɛ pe fraka kre,
pie yire gbiŋmbi.
29 Lewo ŋmba u paan
kebɛɛlɛ ni sele nu kre,
wa yaka ta sele kre nu.
A na mu daŋga,
kachiŋu we mu kaari tnu.
30 Lewo frakafun na ki yire,
mbe lewo ŋmaa ta,
a ŋmba u ŋmaa chaa kre,
kachiŋu wi.
31 Na frakafɛɛnlɛ we pe fɔtɔɔrɔ ta,
tra mna,
kena mu chin na,
pan pie sisampefɛɛnlɛ ndie tini na.