Solomon Yomɛɛlɛ
10
Solomon yomɛɛlɛnyjɛ wra gbun yi kre.
Pɔ kachiŋu tii mbe u lɛ yiɛshɔ,
la, pɔ jijuo tii mbe u lo yiɛ je.
2 Yirɛ nyjɛ mu tro kolo sisaa na,
mbe ta yire wa mu nyu,
la, kpra we mu wɔ
mbe yili kumu nu.
3 O Tafun Nyiɛkpɔɔ wa ti,
mbe klo ŋmba u fraka wre gbo,
la, wa ti mbe sisaapefun
ŋga u chaa ta.
4 Gbashia na shian ki nyaari,
la, na mu tnumu tun kpɔɔ
mu swa ta.
5 Kachiŋu u sro chaa na teeri,
sro kun nyjila,
la, ŋmba u sni na ŋnu
sro kun nyjila wre,
nyifɛɛrɛ we u gbo.
6 Lewo ŋmba u fraka we dwamu ta,
la, sisaapefun rɛ,
kekpɔɛ yi yilii u nyuu.
7 Lewo ŋmba u fraka
sɔɔnrɔ pe dwamu,
la, sisaapefun mɛɛ wa mu
mbe fun.
8 Kachiŋu yiɛ shio,
paaranyinaa na,
la, jijuo rɛ, uyɛ u klai.
9 Lewo ŋmba u fraka,
nyaari gbuntitirem ni,
la, ŋmba u n fraka wre,
u nyaaraa we u wɔ mbe ŋga.
10 Ŋmba u nyiɛlɛ kee na waa,
kala na wre paan na kala ni,
la, ŋmba u kala nyaa mbe ki yo kre,
u paan na wejinyiŋge ni.
11 Lewo frakafun,
u nyu kee ŋmaa kaan,
la, sisaapefun,
kekpɔɛ yi yilii u nyuu.
12 Prara ki paan na kakrɔ ni,
la, koroo sisaa kro tii na kee.
13 Kachiŋu u jawala kee yuu,
la, jijuo rɛ, fwa ki fna na u ni.
14 Lewo kachiŋu u frɔ u nyu na,
la, na jijuo paara,
kia mu na kakrɔ kun.
15 Swafun faŋga yi u yɛtaara,
a shian ki shianfun klai.
16 Chichie pee fɔtɔɔrɔ yi ŋmaa,
la, sisampee fɔtɔɔrɔ yi kanyana.
17 Lewo ŋmba pe fraka,
mbe u ndie tɛɛ
wre to ŋmaa kolo na,
la, ŋmba u n na chaa,
mbe pe u fraka wre fun kolo na.
18 Lepra ŋmba u u lepram
ndra kpan pe kafnu,
a ŋmba u lewo kro yuu kpan
jijuo wi.
19 Ndro ŋmba u paara tataara kre,
wraa mu mbe sisaa yo,
la, ŋmba u ja na frɔ
wre kachiŋu wi.
20 Pan lewo chiriri nyu kee nyi,
na swafiŋge yi,
la, sisampefun jawala kee n tnu ni.
21 Lewo chichie nyu kee tnu ni,
mu leele tataara ŋga,
la, jijiere we jaa ti jijuo uyɛ gbo.
22 O Tafun Nyiɛkpɔɔ dwamu,
ki tii mbe ndro uyɛ ta,
la, tnumu tɔɔn tataara ma ki tii
mbe ndro swa ta.
23 Jijuo yiɛ ki shio sisaapee na,
la, kachiŋu yiɛshio kachindɛ na.
24 Yira ŋga na lewo frakafun
yiɛ nyi u taa,
la, kee ŋga sisaapefun fiɛ titi
kre ki u dani.
25 Na mapini kee pan
kie sisaapefun li,
la, lewo ŋmba u fraka wre
wa jɔŋgɔ u titɛɛ.
26 Imi na simi taan wo,
nyanya ŋgaala pini,
ndee imi na wree yaa nyini kre,
na mu gbashiafun le tnumu nu,
pan we mu pe.
27 Li o Tafun Nyiɛkpɔɔ nyu kee na,
kre mu ŋmaa we tnu,
la, sisaapefun wa u nyjila da.
28 Lewo chichie dankna,
ŋga ni u nyi kre,
ki shie na u ni yɛshɔɔrɔ nu,
la, sisaapefun yira ŋga na u yiɛ nyi
we pe waara.
29 O Tafun Nyiɛkpɔɔ kɛ toni
frakafɛɛnlɛ na,
la, sisaapefɛɛnlɛ rɛ,
we pe kla.
30 Leele mblɛ pe fraka
pre we lawee ta,
la, sisampefɛɛnlɛ pre
wa tra kre ta mbe tni.
31 Leele mblɛ pe fraka kre,
pre pe kachindɛ kee yuu,
la, ndile ŋga ki sisam kee yuu kre,
we paara mbe pra.
32 Leele mblɛ pe fraka,
pre pe kee ŋga ki tna ndie yuu,
la, kee ŋga ki yaa ndie,
kre sisampefɛɛnlɛ yuu.