Kachindɛ Leele Yeeri
9
Kachindɛ katoo sin,ki lam pilɛɛsi kɔɔnashin.
2 A u yurɔ yii mu gbo,
mbe ble kpɔɔ li.
U simi cha,
mu tuwe ndiom tɛɛn chaa ki nu,
mu yi tɛɛ lihaa.
3 Mu u sumifɛɛnlɛ tun,
na pe sɛ yire chia kre kotum haa,
mbe leele yeeri,
4 leele mblɛ pe n yaka chin,
mu daŋga daŋga pre,
5 e pe yeeri mbe pe paan sro,
ŋga ni pe kre li,
mbe ni simi kre gbɔ.
6 E laa jijiere kro,
e taa kachindɛ na,
kre ee ŋmaa ta.
7 Na mu kplɛndɛlɛfun fraka kala na,
tɛɛlɛɛ mu ta.
Na maa sisaapefun yiɛ kee
yo u pan mu wo yi sisaa.
8 Maashia kplɛndɛlɛfun kna kee na,
na kre ma mu kee we u bin.
La, na mu kachiŋu kna kee na,
we mu kori.
9 Kee ŋga mu yo kachiŋu pan kpan,
kie ka ya u kachindɛ na.
A kee ŋga mu yo lewo
frakafun pan kpan,
kie ka ya u jawala na.
10 O Tafun Nyiɛkpɔɔ fiɛrɛ,
kre ki paan kachindɛ ni.
A na mu Nyiɛkpɔɔ ŋmba,
u pe cheche wre chin,
kre mu nɔɔloo ta.
11 A na mu taa kachindɛ kro,
mu ŋmaa we tnu.
12 Na muu kachindɛ ni,
mu ki tnu li,
a na mu ki kolo je mu kala nya.
13 Chlɔ ŋmba u paara tataara kre
jijuo wi,
u n nyifɛɛrɛ chin,
a u n yaka chin.
14 Wre chlɔ ŋmba, u jiin
u katoo jlonwee nyu,
na chia kre lawee ŋga nu
leele tro nɛɛrɛ,
15 mbra leele mblɛ pe tro,
na shie pe lawee chiɛn nu
pre yeeri,
16 mbo, “Yire mblɛ e n yaka chin
kre, e tro mna.”
A kee ŋga u yuu jijiele pan
yi kre mbo,
17 “Na mu nyumu ju mu gbɔ,
ki tna kpa,
a na mu sro ju mu li,
a kre tnamu wɛ.”
18 La, leele pre n chin,
na gboolo lawee u nyi,
a ki tia mblɛ pe lee u pan
pre le kuulo ndoo.