Kachindɛ Kiyɛ Pni
8
E loo, kachindɛ ki nɔɔloo tɛɛ,na leele yeeri.
2 Kii wa mu yire nyuɛ ndra na,
na kolo mbɛɛ na,
na kochiɛnlɛ na,
na leele yeeri.
3 A kakpɔɔ kre jlonwee nyu
krɔɛ yire mbɛɛ na,
bawa u yire na pe yeeri,
na yuu mbo,
4 “Leele mblɛ pee wa tra ŋga nu kro,
yire pan ni paara kre.
5 Kena biile lɛ yire tɛ ra?
Na pan e jawa,
kena e tuan e chin na e lɛ.
Jijiele lɛ yire ra?
Kena e tuan e kala chin.
6 E kee chiriri nyjɛ ni yuu,
e pan ŋga loo.
Kee ŋga mbe yo kro fraka.
7 Ni kafinɛ fun,
kena kee ŋga mbe yo kro pe kpra.
8 Kee ŋga ni yuu kro pe kpra,
a kafinɛ n wa ki nu,
a ni nyu kee wa ndro wa
mbe fun fio.
9 Lewo ŋmba uu nɔɔloo ni kre,
ni kee chasi u fun pan.
10 Ti mbe ni nyu kee sna mu pan,
mbe wɛ swafiŋge,
na swanyiɛ na.
11 Ŋgi na hin? Kachindɛ nyu,
mu wɛ lagboo jlɔnyi na.
Kre yira n wa,
a ndro niŋgee wa ki na,
a ki wɛ kachindɛ na.
12 Mi kachindɛ na hachila oo wa,
nii jawala ni,
na kala kpra kuun.
13 Nyiɛkpɔɔ buuro,
kre ki tii mbe lewo sisaa fun.
Kee nyjɛ ni fun yi,
yɛkpɔɔmu na mɛchaara,
na kefuɛn pee,
na kafinɛ.
14 Na ni kee jawa mu tɛɛ,
na mbe ki pe kre,
mbe le na mbe ki pe.
Nii wa nɔɔloo ni,
a faŋgaa wa ni nu.
15 Mi ni yaa ŋulo na,
pra pe leele le.
A mi na pe yire,
na mbra chichiele leni.
16 Mi ni yaa loplombo mblɛ,
pee wa tra ŋga kro na,
pra pe leele le,
hali waŋgra ŋga lekpɔɛ,
na jaŋgafɛɛnlɛ kro.
17 Mblɛ pe ni kori pre,
ni pe kori na,
a mblɛ pe ni haa chaa pre,
pie ni nya.
18 Mbe jaa ti ndro uyɛ ta,
mbe u mɛɛ yili,
mbe kee ŋga mu pini kro,
nyu mbe mu ŋga.
19 Yira ŋga lewo we ta,
mbe yili ni pan kre,
wɛ swanyiɛ,
na swafiŋge titi na.
20 Kee ŋga ki fraka,
kre kro ni taari.
21 Na mblɛ pe ni kori pre,
kaan yirɛ nyjɛ pe chaa,
mbe pe krɔyirɛ ta,
mbe pe nyinyi nyi.
22 O Tafun Nyiɛkpɔɔ,
na klu mu ni gbeele,
yirɛ kro kro na.
23 Jle gbamm kre, wra ni gbeele,
mu chin mu dnunya nɔɔhle.
24 Nyjila ŋga nu Nyiɛkpɔɔ,
nsra ta mu epo,
na lɔɛ krokro wa kre,
na nii wa.
25 Ndaa wa,
a wra chin mu nyuɛ,
na nyambie krɛrɛ wa.
26 Hali tra ŋga,
na lawee nyjɛ mu chin ŋga kro,
ndaa wa a yira chin mu pe.
27 Nyjila ŋga ni wra yo,
nyjeeri ki sɛ tni ki lawee,
a wra nyjeeri na epo sam gbun,
na nii wa.
28 Nyjila ŋga ni wra tloe wa,
mna tia yira sɛ pɔ nyjeeri,
a wra blo wɔ tra tapan,
29 mna sam gbun epo pan,
mbe ki ti kia nyi,
mbe wɛ imi na u yo na kre,
na nii wa.
Ndaa wa,
a wra chin mu tra nɔɔ le.
30 Ndaa wa u jaara,
na kɛnyu tnumu chinfun titi wi.
Mi na wi u yɛshɔɔrɔ,
a ndaa yɛshɔɔrɔ lii u yiɛ,
nyjila kro nu.
31 Ni yiɛ na shɔ waŋgra,
na lewo na nyjuro gbeelee na.
32 Ni biile, e ndie tɛɛ ni pan,
e li ni kee na,
kre ee dwamu ta.
33 E ndie tɛɛ ni kee na,
yaashia ki wa mbɛɛ na,
kre ee kala chin.
34 Ŋmba u ndie teeri ni kee na,
na ni sri ni jlonwee nyu na,
nyjila kro nu kre,
we dwamu ta.
35 Lewo ŋmba u ni nya kre,
ufun ŋmaa nya.
A o Tafun wre yiɛ we shɔ u na.
36 La, ŋmba u n ni nya kre,
u fun uyɛ gbo.
Ŋmba u ni pra wre kumu kori.”