Tnu Ŋga Kii Wa Tiɛrɛɛ Nu
7
Ni pɔ, kee nyjɛ ni yuu mu panyire sɔɔnri,
a maa shia yi ka fɛɛ.
2 Taa ni kee yire na mu ŋmaa ta,
ni kee yire le chichie,
imi na mu mu nyibie dɔɔtaa,
na kɛ toni ki na kre.
3 Kee nyjɛ ni mu nyina kre,
ti mbe yi tni mu loloŋgo nu
nyjila kro nu.
4 Ti mbe kachindɛ pe mu pan
na mu jaa wi,
mu ti mbe nɔɔloo pe
mu nunu titi.
5 Yire yie ya mu na,
mbe chlɔ tɛtiɛrɔɔ wa jaa,
u nyutnamu tɛɛ mbe mu fana.
6 Ki ble ka ndaa wa mu yire,
ni nyuŋgo vromboo nu na le.
7 Bawa ndaa nyanyjɛbɛɛlɛ,
jawala lafɛɛnlɛ plɛ nya,
na pe tro,
a jijuo titi wa naa wa pe nu.
8 Wra nyaari mu to lete na,
mna sɛ tro kɔm ka nu,
lawee ŋga nu chlɔ tɛtiɛrɔɔ
wa nyuŋgo na nyi.
9 Kre nyjila kre na yila to,
a ndram kɔ.
10 Bawa chlɔ wre na yili,
mu pan mu u fni.
Yirɛ nyjɛ chlɔ wre na le uyɛ na
yire na nyina to, na tɛtiɛrɔɔ wi.
A wraa blɔ wre mbɛɛrɛ tuuri.
11 Wra pe chlɔ ŋmba u nyifɛɛrɛ la.
Na u yiri wa tni katoo,
12 kɔm nu u yire na bilɛ sri,
nyjila ka nu lete na u yire,
nyjila ka nu mbe u sɛ yire jafa na.
13 Kɔm kre nu wra nyanyjɛble wre
fa mu yii, mu u nyu shiun,
mna yiɛ yire mu u yiɛ kotolo le,
mu kna mbo,
14 “Aŋga ni sra wɔ,
a ni sra kaara yiree wa,
15 kre ni yili mu pan mu cha haa,
mu mu nya kre.
16 Sniyira chichie
ŋga ki yiri Egypt tra nu,
kre ni chan ni dɛŋglɛ yiɛ na.
17 A ni tlade ndiom taan titi,
nyaara yi na.
18 Kena pan mbe mi na ŋu sɛ,
koroo nyina oyɛ pan,
mbe sɛ su nyisee na,
o yiɛ we shɔ titi.
19 Ni plɔ n wa katoo,
u kolo kun mu sɛ haalee.
20 U swa wru nɛɛrɛ mu sɛ,
ki tia we da kranu shiin
mbe chiin pan.”
21 Chlɔ wre na nyutnamu tɛɛ,
mna nyanyjɛble wre fana.
22 Titɛɛ kre nu, a wra taa u na,
na nuu ŋmba pe yii na shie
mbe sɛ gbo wi,
pan wra nyi na sajeŋu ŋmba u yeni,
mbe sɛ to pɛlɛ nu,
mbe pe snimi tɛɛ mbe u ŋu wi.
23 Pan wra nyi to
na hanyini ŋmba u fiɛlɛ,
mbe sɛ to pɛlɛ nu wi,
na u n chin na ku haa u shie.
24 Kena ni pɔ, ndie tɛɛ ni pan,
kee ŋga mbe yo loo.
25 Maashia ti chlɔ ŋmba
sembremu mu ta,
maashia mu jawala wru,
mbe taa u na.
Na mu u nya, u klɛ mu tro.
26 Wre chlɔ ŋmba, bilɛ mblɛ u kla,
na mblɛ u gbo,
pia jaa tɔɔnri.
27 Na maa sɛ u katoo,
kena kuulo ndoo mu sɛ,
kolo gbru ŋga ki shie
na lewo ni kumu nu yi.