Jaaraa
6
Ni pɔ, mu ŋmbrɔ swa jin,a mu ki nyu yii ra?
2 A mu nyu yo,
a ki kaari mu pan pɛlɛ ra?
3 Na ki pan ma,
kena ndro ŋmba pan
mu nyu yo wre,
u jaŋga mu pɔ.
Kena kee ŋga ki fna mu pe,
mbe shɔ u kɛɛ yi kre,
fɛ mu sɛ to u na mu u tali,
mbe u mu wa.
4 Maashia tni mbe wuu,
ndee mbe sni ŋnu.
5 Muyɛ shɔ mu yili u kɛɛ,
imi na hanyini,
ndee kafaa feni
mbe shɔ bɔfɔ kɛɛ kre.
6 Gbashiafun, miuŋu le,
mu kachindɛ tuan u pan.
7 Wre u n wa na yɛklo,
ndee ŋunu, ndee lefun ni,
8 ande u ja na u sro chaa
na teeri tla nyjila,
mbe koo chiin le.
9 Gbashiafun, nyjila ŋgi nu mu sni,
mbe sɛ su hin?
Nyjila ŋgi nu mu yiri
dɛŋglɛ na wo?
10 Gbashiafun u yuu mbo,
“Mbe sni chiɛri,
e ti mbe ni kɛnyi pɔɔ tni,
mbe wuu chiɛri.”
11 Nyjila ŋga ni mu sni na wuui kre,
kre nu shian we mu yii,
pan kie pe na kokɔɔn
u mu chrɔ kolo.
12 Lewaa ndrasheleefun,
wre u kila na kala fnɛ na tro.
13 Wre u paara nyiɛlɛ,
na jekambɛlɛ,
na kambɛlɛ ni.
14 Kafinɛ na sisam kee bribri,
yire yii wa u loloŋgo nu,
na kanyaa leni kee nu
nyjila kro nu.
15 Kre kepele nyjɛ ndra na,
kala we u da mbe u fo,
mbe u kla,
yaka wa jaa u shɔ.
16 Yirɛ kɔɔnanu yɛɛ wa,
a Nyiɛkpɔɔ yi fun,
a wraa yi kee dumbrɛ,
17 yire yi kpɔɔmu chaara,
na kafinɛ, na linkuuro.
18 Sisam jawala,
na kefuɛn pee nyaanyaa,
19 na kafinɛ dansiɛrɛ lie,
na kanyaa lee
ndro na u ŋmbrɔ lalaa.
Nyiɛkpɔɔ O Jaari Tiɛrɛɛ Na
20 Ni pɔ, ndie tɛɛ mu lɛ, na mu lo,
kee nyjɛ pe mu nyina na,
maa shia yi fɛɛ.
21 Ti mbe kee yire tni
mu loloŋgo nu,
mbe mu yi to mbe le lagboo
nyjila kro nu.
22 Na mu nyaari,
kee yire we yiɛklu mu pan,
na mu sni blee mbe yira mu le,
a lafo na yie mu ŋga jawala.
23 Pe kee nyjɛ pe mu nyina yire,
yi pe nyisee mu mu ŋga,
mbe jaa mu kna mu tnimu nu.
24 Pe paaranyinaa we jaa mu,
shɔɔ yili chlɔ tɛtiɛrɔɔ,
blɔfun nyutnamfun kɛɛ.
25 Maashia ti
mbe u nyumu niŋge mu yii,
ndee mbe u nyiɛlɛ bie tɛɛ
mbe mu ta.
26 Yira ŋga chlɔ tɛtiɛrɔɔ
lewo blɔ kaan yi shian.
A na mu ndro chɔ cha,
tnu ŋga mu ta yi kumu.
27 Lewo we jaa kanhun fo gbun na,
mbe kia u sro ra?
28 Ndee mu jaa nyaari naŋgua nu
mbe kia mu jele be ra?
29 Na mu n chin to, pan ki nyi
na ndro u ŋmbrɔ chɔ ju mu cha.
Lewo ŋmba we kre kee kre pe
we kala nya kpɔɔ.
30 Na klo juo ta,
a u sɛ ju mu li,
praa u gasi kpɔɔ,
31 la, na pe u yii,
pie ti u yira kre fɔlɔ tɔ,
ma gbee kɔɔnashin,
hali na u krɔyirɛ kro we prɛ,
mbe ki fɔlɔ tɔ, we ki pe.
32 La, blɔ ŋmba u u ŋmbrɔ chɔ chaa
wre n jawala ni,
ŋmba u ma pini kre, uyɛ u klai.
33 Na lewo pini ma, gbɔɔn,
na nyifɛɛrɛ yi u tnu ŋga u taa.
A nyifɛɛrɛ wa laa u yiɛ na fio.
34 Na blɔ yenyjam wii u chɔ na,
ki tii mbe krɔ kuɔn kro u nu kpɔɔ.
A na u yo we u sinyjaa wre pe
kee sisaa, wa u fooro le.
35 A yaka n wa mbe u jaa tɛɛ,
mbe u gbun nyiŋge,
ndee mbe u dɔli
mbe ki ti u krɔ nyjii, hali imi na
yira kre we kpɔɔ mbe da kpan.