Tiɛrifɛɛnlɛ Jaaraa
5
Ni pɔ, ndie tɛɛni kachindɛ kee, na jawala kee
nyjɛ ni mu nyina yire na.
2 Kre mu kepele chiriri wru,
a mu nyu kee we nyina na
jawalafun wi ŋu.
3 Pan chlɔ tɛtiɛrɔɔ nyutnamu nyi
na srɛ yi,
a u nyu kee pe plɔplɔ
mu wɛ simi bibre na.
4 La, na u mu ta mu kɔ,
ŋga mu ta yi susrom,
na wejiwrɛm.
5 Na mu taa u na,
we sɛ na mu ni kuulo ndoo,
kolo ŋga u yii shie kumu nu.
6 U jawala ma na
we tro ŋmaa kolo na.
Kolo ŋga u yii kre ŋmaala,
ande u n ki chin.
7 Kena ni biile, e ndie tɛɛ ni pan,
yaashia kee nyjɛ
ni yuu e pan yire fɛɛ.
8 E ti mbe yire na wre chlɔ ŋmba
sembremu lalaa le,
yaa shia tro u jlonwee kple.
9 Na kre ma,
ee e buuro wa mbe fun,
mbe kɔɔ sɛ ku
bilɛ foorotefɛɛnlɛ kɛɛ.
10 Na kre ma, lefumblɔ we
e katoo yirɛ wru, mbe ta finfin,
mbe e fnaa kɔɔ sɛ li
lewaala plɛ katoo.
11 Na ki pan ma, na e waa lɛlɛ,
a e kaara pe yiɛyiɛ e na,
a e mbra kumu na kre,
taanri ee na taanri.
12 Bawa ee yo na, “Yira ŋgi kra tia,
o na paaranyinaa je,
a o n nsraa chaa
mbe pe o yiɛ kee yo
o pan ŋga hin?
13 A o nsra ndie tɛɛ
o nyinafɛɛnlɛ pan,
a o nsra pe nyu kee wru ŋga hin?
14 Kre ki tia fuŋgaami,
nyifɛɛrɛ na o kuu
lenɛɛrɛ yiɛ na kre.”
15 Kpra li na mu chɔ ni,
mu mu koroo wru
mu wre nunu chom ŋga.
16 Biile mblɛ mu se,
chlɔ fɔŋgɔ na pre wa ya mu na.
17 Mu biile pie lɛ mbe yirii ya mu na.
La, pia ya lewaa na.
18 Kena ti mbe mu yiɛshɔ
mu chɔ na,
mbe u mu yiɛ nyi.
19 Ti mbe u kee pe niŋge ni
mu pan, mbe u koroo pe
mu pan yɛshɔɔrɔ ni.
20 Ni pɔ, yira ŋgi ki ti,
mbe mu mu koroo bali
mbe tɛtiɛrɔɔ ŋga hin?
Ŋgi ki tia wa chɔ kee mu pe
niŋge ni ŋga hin?
21 Kee ŋga mu pini kro,
o Tafun Nyiɛkpɔɔ wre ki nyaa.
A mna mu tro kpan,
u nyibie wa mu na.
22 Sisaapefun kro,
sisaa ŋga u pini kre,
pe pɛlɛ mu wre titi ŋga.
Sisaa ŋga u pini kre,
ki pɛlɛ nu chɔɔ we ndruu to,
mbe ki u yii.
23 A we ku, ŋgi na hin?
U n ja na uyɛ yiri kee na.
U jijiere kie u gbo.