Kachindɛ Tnu Kpɔɔ
4
Nyanyjɛbɛɛlɛ,e kee nyjɛ e lɛ e nyina yire loo,
e ndie tɛɛ yi na,
kre ee nɔɔloo ta.
2 Kee nyjɛ ni e nyina yire kro nyu,
ki tia e yi sɔɔnri.
3 Ni lɛ, na ni lo na ni se
biblɔ nunu chom,
a nyjila ŋga nu ndaa pe pɔ kre,
4 ndoo na yo ni pan mbo,
“Ni pɔ, kee ŋga
mbe yo mu pan kpan,
maa shia ki fɛɛ,
kee ŋga mbe yo mu pan kre pe,
kre mu ŋmaa ta.
5 Kachindɛ ta, mu nɔɔloo ta,
maashia kee nyjɛ ni yo yire fɛɛ,
a maashia yi je.
6 Maashia kachindɛ wa mbɛɛ na,
ki kori, kie mu le mbe mu shɔ.
7 Kachindɛ kee shian titi,
kena ki haa cha,
a kolo kro na,
wi mu nɔɔloo haa cha.
8 Kachindɛ kori,
kie mu pe lekpɔɔ,
ki yii kɛ shiin,
kie ti mu buuro ta.
9 A kie ti mu yɛnyiŋge kpɔɔ ta.”
10 Ni pɔ, li ni nyu kee na,
ti mbe kee ŋga ni yuu
mu pan kre mu shian,
kre mu ŋmatitnɔmu ta.
11 Ni mu nyina kachindɛ kolo,
na kolo ŋga na mu tro
mbe ŋmaa ta.
12 Na mu nyaari kachindɛ kolo na,
yaka wa jaa mu ta kolo,
a na mu feni ma gbro.
13 Kee nyjɛ pe mu nyina yire,
yi yii kɛ shiin,
maa shia yi wa.
Yire yie mu ŋga ŋmaa,
kena yi le chichie.
14 Maashia tro sisampefɛɛnlɛ tro haa,
a ŋu na pre waashia nyaari.
15 Maashia pe kolo wru,
pe klɛ mu tro mu sɛ mu lawee.
16 Ŋgi na hin? Sisampefɛɛnlɛ na sni,
fɔna pe sisam kee ka ta mu pe tun.
Praa ja mu ŋnu,
fɔna pe ndro wa ta mu chan tun.
17 Sisam pee tna pe pan,
na sro na simi yi.
18 Imi bnimi yila yilii,
mbe lawee nya chasi
mbe sɛ su lafo na kre,
pan lewo ŋmba u fraka wre,
kolo ŋga na u troi pe chasi.
19 La, sisampefɛɛnlɛ
kolo ŋga na pe troi kre,
ki pe wɔmu kprikpri.
Pie gbro mbe to,
a pia yira ŋga na pe gbro kre nya.
20 Ni pɔ, ndie tɛɛ ni nyu kee na,
mu li ni mayolo na.
21 Maashia ti mbe yi fun mu ndra,
yi sɔɔnri mu yi tɛɛ mu ndra
nyjila kro nu.
22 Ŋgi na hin? Na mu taa
ni kee yire na, yie mu ŋga ŋmaa,
na fufam mu wejikaara nu.
23 Nyjɛ krɛrɛ kɔkro kre,
kee nyjɛ mu jawa yire le chichie,
ŋgi na hin? Kee nyjɛ yii wa
lewo jawala nu yire u pini.
24 Maashia kee
ŋga ki n pe kpra yo fio,
Mu nyu wɔ mu yili kafinɛ,
na fana kee kro nu.
25 Ti mbe mu jawala pe nunu,
kee ŋga mu pini na,
maashia kna mbe le mu kro.
26 Kee ŋga mu chaa mbe pe kpan,
ki jawa chichie tun.
Kee ŋga mu pini kre
we nyu mbe mu ŋga.
27 Muyɛ wɔ mu yili sisam nu,
maashia klɛ mbe kofrakaa wa.