Nyanyjɛbɛɛlɛ Paaranyinaa
3
Ni pɔ, maashia kee nyjɛni mu nyina yire fɛɛ,
la, li yi kro na nyjila kro nu.
2 Kee nyjɛ ni mu nyina yire,
we mu ŋga ŋmatitnɔmu,
mbe ti mu nyu mu tnimu nu.
3 Maashia ti mbe koroo,
na kpra lie mu wa mbe tro.
Ti mbe yi pe mu pan
na lagboo jlɔnyi yi,
mu ti mbe yi tni mu loloŋgo nu.
4 Na mu pe ma,
mu kee we Nyiɛkpɔɔ yiɛ nyi,
a lewo yiɛ we shɔ mu kepele na.
5 Dankna o Tafun Nyiɛkpɔɔ na.
A maashia muyɛ taa
kee ŋga mu chin na.
6 O Tafun Nyiɛkpɔɔ sɔɔnri,
kee ŋga mu pini kro nu,
we mu nyina kolo ŋga ki fraka.
7 Maashia muyɛ le na mu kala chin,
mu wɛ imi na mu nyi na,
la, li o Tafun Nyiɛkpɔɔ kee na,
mu muyɛ wɔ sisaa pee nu.
8 Na mu pe ma,
Nyiɛkpɔɔ we mu ŋga faŋga,
na fufam.
9 Muyɛ taara yirɛ,
na mu see yirɛ jle tɛɛ mu
o Tafun Nyiɛkpɔɔ le yɛnyiŋge.
10 Na mu pe ma, mu shɔlɔ ta,
mbe mu sro tɛɛhaa nyi,
mbe simi gbɔwo bɔ mu na.
11 Ni pɔ, na o Tafun Nyiɛkpɔɔ
mu frakai, ndie tɛɛ.
Na u mu yiɛ kee yuu mu pan,
maa ti mbe ki mu bin.
12 Ŋgi na hin? Ŋmba o Tafun
Nyiɛkpɔɔ kori, wre u frakai,
imi na lɛ u pɔ ŋmba u kori
frakai kre.
13 Lewo kachiŋu,
ŋmba uu nɔɔloo ni kre,
wre wo yi dwamu.
14 Ŋgi na hin? Kachindɛ tnu kpɔɔ,
mu wɛ swafiŋge,
na swanyiɛ taara na.
15 Tnuu wa kachindɛ nu,
mu wɛ lagboo jlɔnyi na.
Kre yira n wa,
a lewo na ki chaa,
a ki da na kachindɛ ni.
16 Kachindɛ lewo kaan ŋmatitnɔmu,
na buuro, na yɛtaara.
17 Kachindɛ tii mbe lewo
yɛshɔɔrɔ ta u tnimu nu,
mbe u ŋga wejinyiŋge.
18 Mblɛ pe kachindɛ taa,
mbe ki yii kɛ shiin kre,
pie yɛshɔɔrɔ ta, mbe ŋmaa ta.
19 O Tafun Nyiɛkpɔɔ wre,
u kachindɛ wra tɛɛ mu tra ŋga wa,
mna jawala tɛɛ mu nyjeeri pe,
a kii wa ki lawee.
20 U kachindɛ ki tia lɔɛ na fuu,
a kre ki tia nyumu
na yilii tloe nu na paan.
21 Ni pɔ, kachindɛ na hachila
yii kɛ shiin,
maashia ti mbe yi yili mu kɛɛ fio.
22 Yie mu ŋga ŋmaa
mbe ti mu yɛnyiŋge ta.
23 A mu nyaari mbe tro,
yaka wa mu ta,
a ma gbro.
24 Na mu sni blee ma fiɛ,
a mu ŋnu mbe fɛɛ.
25 Na kewrɛŋgɛ fo
mu mu da kuraa, maa fiɛ.
A sisampefɛɛnlɛ klaa
ŋga kie pe da kre wa mu gbun yɔ.
26 O Tafun Nyiɛkpɔɔ wre
we pe mu dankna,
a wa ti mu to pɛlɛ nu.
27 Nyjila kro nu na mu ja,
ŋmba u fna mu pe chichie
wre pe chichie.
28 Na mu jaa ya mu tnifun na aŋga,
ya u na,
maa yo u pan na u ti baŋga.
29 Mu tnifun ŋmba
ŋu na wree wa titɛɛ,
a wra kaan mu na kre,
maashia sisaa jawa na u ni.
30 Na ndro n mu pe sisaa ka,
maashia tun na u ni finfin.
31 Maashia ti mbe mu yiɛ nyina,
mbe mu kakɔtuŋu kepele twan.
32 Ŋgi na hin?
O Tafun Nyiɛkpɔɔ wre,
u lewo ŋmba u n fraka fun,
la, mblɛ pe fraka pre,
wre na pre pe bɔɔnri.
33 Nyiɛkpɔɔ suŋgɔɔ wa
sisampefɛɛnlɛ katoo,
la, u dwamuu wa
mblɛ pe fraka pre katoo.
34 Mblɛ pe leele pini na tɛɛ pre,
pan Nyiɛkpɔɔ pe le na pe tɛɛ na.
La, mblɛ pe peyɛ nyjiri pre,
u pe fooro chini.
35 Kachimblɛ we buuro ta,
la, nyifɛɛrɛ we jijiele gbo.