Tnu Ŋga Kii Wa Kachindɛ Nu
2
Ni pɔ, na mu li ni nyu kee na,mu tia ni mbra yire tni mu nu,
2 a mu ndie tɛɛ kachindɛ na,
mu nɔɔloo haa cha,
3 mu tia mu yiɛ nyina kachindɛ na,
a mna julo na nɔɔloo haa chaa,
4 mu tia mu yiɛ nyina ki na,
na swafiŋge mu chaa,
a mu ki haa cha na keshian
yira titi ka pe ndra,
a mna ki haa chaa kre,
5 kre mu o Tafun Nyiɛkpɔɔ wre
fiɛrɛ nɔɔloo,
mbe u jawala kee chin kpɔɔ.
6 Ŋgi na hin? O Tafun Nyiɛkpɔɔ
u lewo kaan kachindɛ,
a wre pan jawala,
na nɔɔloo yiri na paan.
7 A wre u tii mbe ŋmba u fraka
wre wi mbe yili,
a ŋmba na kala fɔɔn n wa kre,
wre na u kɛ toni.
8 Wre u frakafun kala lii na u kaan.
A mblɛ pe lii u kee na kpra ni kre,
u kɛ toni pe na.
9 Na mu kachindɛ kpɔɔ,
mu kee ŋga ki fraka,
mu nyu chin kolo kro na.
10 A kachindɛ we tni mu nu kpɔɔ,
mbe mu yiɛshɔ.
11 A nɔɔloo we kɛ tɔ mu na.
12 Kachindɛ we mu shɔ,
mbe yili sisampefɛɛnlɛ kɛɛ,
mbe mu wɔ mbe yili leele
mblɛ nyu kee ki paan
katala ni pre kɛɛ.
13 Pre pe kofrakaa kre wa,
mu na tro wɔmu kolo na.
14 Sisampee nu pe yɛshɔɔrɔ taa,
na peyɛ lii kepele fuɛn pee nu,
15 ndro wa jaa dankna pe na,
a ma jaa pe shɔ mbe li.
16 Kachindɛ we mu shɔ,
mbe yili chlɔ ŋmba
u yili u plɔ kro kɛɛ, mbe jaa
mu wɔ mbe yili leŋgefun,
sisampefun nyutnamfun kee nu.
17 Wre u u bichabim nyjila
tamfun wa, mu nyu nunu
ŋga wra pe Nyiɛkpɔɔ yiɛ kre je.
18 Na maa u katoo kolo yii,
kena ku haa mu shie,
na maa taa u kro,
kena u shie na mu ni kuulo.
19 Ndro n wa mbe sɛ u lawee,
mbe jaa ndru u kro,
mbe paan ŋmaa kolo wru.
20 Kena e leele chichiele le,
e pe kepele twan,
e na tro mna frakafɛɛnlɛ tro.
21 Ŋgi na hin? Leele mblɛ pe fraka,
a kee sisaa ka n wa pe na,
mbe ndro ta mbe yo kre,
pre pie tra ŋga ta mbe tni.
22 La, Nyiɛkpɔɔ we sisampefɛɛnlɛ
wɔ tra kre nu,
a ŋmba ndie ki kan kre,
we u kɔ tra kre nu
mbe wa na tiŋge yi.