Yomɛɛlɛ Hlɛ
Tnu Ŋga Kii Wa Yomɛɛlɛ Nu
1
Israel Ŋunu Solomon,Ŋunu David biblɔ wre,
yomɛɛlɛ nyjɛ wra gbun yi kre.
2 Yire yomɛɛlɛ nyjɛ,
yie jaa ti mbe lewo jawala ta,
mbe jaa uyɛ yii kala na,
mbe jaa kee nɔɔloo,
mbe ki lam chin.
3 Yie jaa lewo nyina
kachindɛ u tnimu nu,
mbe jaa ti lewo ŋga ki nyu,
mu fraka pe ki kolo na.
4 Yie jaa ti mbe ŋmba u n chin
kpɔɔ wre pe hachilafun,
mbe leele mblɛ pe n lɛ pre nyina,
mbe pe kee pe tnu ni.
5 Yire yomɛɛlɛ nyjɛ we jaa,
kachimblɛ ŋga jawala mbe ya,
mbe jaa ya hlɛ chinfɛɛnlɛ na.
6 Mbe jaa ti lewo yomɛɛlɛ,
na gondo kee nɔɔloo,
mbe kee nyjɛ ni kachimblɛ paan
yire chin.
Paaranyinaa
7 O Tafun Nyiɛkpɔɔ wre fiɛrɛ yi
jawala taa nɔɔhle haa,
la, jijiele n kachindɛ wru mu pe yaka,
ki tia pe n na chaa mbe twan.
8 Ni pɔ, ndie tɛɛ kee
nyjɛ mu lɛ mu nyina na,
a maashia kaalɛɛ nyjɛ mu lo yuu
mu pan yire wa.
9 Pe kee nyjɛ pe mu nyina yire,
yie ka ya mu kepele chichie na,
imi na sɛsɛ chichie, ndee lagboo
jlɔnyi ka yaa lewo nyumu na kre.
10 Ni pɔ, na sisampefɛɛnlɛ
mu nyu chaa, maashia li ki na.
11 Na pe yo mu pan na,
“Pan mbe o sɛ ndro cha mbe gbo,
ndee mbe sɛ ja mbe ndro
ŋmba u n sisaa pe cha,
mbe gbo yɛshɔɔrɔ na,
12 pe yiɛ ŋga na kain oo pe yii
mbe pe gbo,
pe n yaka pe, ande pie le faŋga.
13 Na o pe ma, kie ti mbe o yirɛ
titi nyininyini ta mbe foolo,
mbe o nyinyi nyi,
14 kena pan mbe wre na ŋu sɛ,
yirɛ nyjɛ oo ta yire oo yi yɔ
mbe yila.”
15 Ni pɔ, ŋu na pre waashia sɛ,
a maashia tro pe tro haa.
16 Ŋgi na hin?
Sisaa pe fiɛlɛ mbe sɛ pe.
A pee nyaanyaa
linkuuro kee pee na.
17 Na mu hanyini peerii pɛlɛ,
a uu wa mu tni na mu le,
mu chin na kewaara mu pini.
18 Leele mblɛ pe jee na plɛ sri kre,
peyɛ pe peerii pɛlɛ,
19 Mblɛ pe tro linkuuro kolo na,
na yirɛ taa kolo fɔɔn na pre chɔɔ,
kre kolo kre na pe troi
na kumu taa.
Kachindɛ Leele Yeeri
20 Kachindɛ leele yeeri lete na,
u mana kpɔɔ tɛɛ na pe yeeri
jafa lawee yire nu,
21 uu wa mu yire kakpɔɔ kre
jlonwee nyu na,
lawee ŋga nu leele fni kre,
bawa u nyi na yeeri.
22 Mbo, “Jijiele, nyjila ŋgi nu
ee daŋga mbe sɛ su wo?
Nyjila ŋgi nu ee kachindɛ pe
mbe tɛɛ mbe sɛ su hin?
Kena nyjila ŋgi nu ee jawala je
mbe sɛ su hin?
23 Na e na ni ŋga kolo,
a ndaa e yiɛ kee yo e pan,
mbe na lɛɛ wɔ mbra e ŋga,
a mbe na e nyina ni jawala kee.
24 La, ŋga ndaa e yeeri,
a e na je,
a e wa nsra shɔ ni pan,
a ndaa kɛ tini e pan, e nsra pan.
25 Ŋga e ni paaranyinaa je,
e n yire a ni e yiɛ kee yo e pan
kre ndra na,
26 na kala sisaa waa e da,
mbe na e pini mbra tɛɛ.
27 A na kala sisaa waa e li,
na lɔɔ yi, ndee na e le sisaa nu
na legboo fuflɛ ki e tɔ kre,
ndee na e kanyana waa wɛ e na,
28 kre ee nyɛni mbe ni yeeri,
la, mba shɔ e pan.
Ee ni chaa tro lawee kro nu,
a yaa ni nya.
29 Ŋga e kachindɛ je, a e n tia
o Tafun Nyiɛkpɔɔ wre fiɛrɛ
tni e nu,
30 a e n ni paaranyinaa wru,
a na ni e yiɛ kee yo e pan
mbe e na ni tɛɛ kre ndra na.
31 Ki tia kee nyjɛ e pini
yire fɔtɔɔrɔ ee ta,
a yire titi kefuɛn yire we e nyi,
mbe e kla.
32 Mblɛ pe n yaka chin pre we ku,
ŋgi na hin? Pe kachindɛ je.
A jijiele we kla,
ŋga pe kee ka ma
na kala ka ni kre ndra na.
33 La, ŋmba we ndie tɛɛ ni pan kre,
we tni wejinyiŋge nu,
a wa jini kee ka fiɛ.”