Yɛshɔɔrɔ Pe Yira Waara
2
Ndaa ni jawala pe na mbe na niyɛ nyu li, mbe ki ti ni chin yira ŋga kii wa yɛshɔɔrɔ nu. Ŋga ndaa nya yi na, yire kee yire krɛrɛ kewɛɛ yi. 2 Ndaa nya na titɛɛrɛ pe jijiere kee, a ndaa niyɛ wie na, yira ŋgi kuraa ni yɛshɔɔrɔ paan wo? 3 Ni kachindɛ na tia ndaa ni jawala pe na mbe simi tɛɛ mbe yiɛshɔ, mbe niyɛ nyu li. Ndaa jawa na kre kolo ŋga na lewo we jaa tro mbe uyɛ li nyjila chiɛri ŋga we li tra ŋga nu.4 Ndaa kekpɔɛ pe, mna kalonyi sin sin, mna tre seele pe. 5 Ndaa kagblɛ pe, mna lawee pe mu tinyi li wee nyininyini luu yi nu. 6 Ndaa lɔɛ tuu a nyumu naa yire yi nu, a ndaa nyumu ta na woni tinyi yire na. 7 Ndaa bilɛ, na chiɛlɛ lɔ tinlɛ, a pra tinlɛ pre plɛ se ni katoo. Pɔɔri yurɛ naa wa ni pan mu wɛ leele mblɛ pra yiɛklu ni na Jerusalem na pre kro na. 8 Waŋgrɛ nyjɛ yiraa wa ni jaara kre ŋulo na paan na ni kaan swafiŋge, na swanyiɛ tataara. Chiɛlɛ na bilɛ mɛkɔmblɔ naa wa ni pan, pre praa mɛɛ koni na ni yiɛshio. Lewo blɔ loloŋgo yira ŋga u chaa kro wi u chɔ, a ndaa wa na chiɛlɛ ni tataara. 9 Ndaa wɛ Jerusalem leele mblɛ pra yiɛklu ni na kre kro na, a ndaa kala chin mu ya.
10 Yira ŋga ndaa nya nyini ni
na ki chaa kro, ndaa ki ta,
a yɛshɔɔrɔ ŋga ndaa chaa kro
ndaa ki li.
A ndaa niyɛ kpɔɔ
yira ŋga ndaa pe kro ni.
Kre na yi fɔtɔɔrɔ ŋga ndaa ta,
tnumu nyjɛ ndaa tun yire kro nu.
11 Ŋga ndaa tni mu yirɛ
nyjɛ ndaa pe yire kro le,
mna yiɛ wa mu ni fnaa le kre,
ndaa nya na yi kro pe finfin,
kra ni pe na fuflɛ ni nini.
Ndaa nya na tnu ka n wa yi nu,
tra ŋga yiɛ na.
Kachindɛ Na Jijiere Kro Yirɛ Wɛɛ Yi
12 A ndaa yo ni jawala nu na,
kee ŋgi ŋunu ŋmba we pan
mbe ni krɔ li kre we jaa pe,
a ni n ki ka pe tun hin?
A kra tia ndaa kachiŋu,
na jijuo damatii lalaa kee jawa.
13 Ŋga ndaa nya yi na,
imi na nyisee nyu
mu wɛ wɔmu na kre,
pan chɔɔ kachindɛ prɔ jijiere na.
14 Ndaa nya na kachiŋu rɛ,
wre baŋga nyaa.
A jijuo na nyaari wɔmu nu
jukajuka,
la, kachiŋu o, jijuo o,
pe kro kɔlɔ nunu.
15 A ndaa yo ni jawala nu na,
imi na ni kala chin mu da ŋga,
nde ŋga kie ni da kre chɔɔ
kie jijuo da na.
Kena ŋga ni wi kachindɛ na chiin ŋga,
tnu ŋgi kii wa ki nu hin?
A ndaa kna mna yo ni jawala nu na,
kre kee ŋga chɔɔ,
kee waara yi ni pe.
16 Ŋgi na hin?
Kachiŋu o, jijuo o,
kia mu na pe o kro kee fɛɛ,
pia wa sɔɔnri na.
Imi na jijio we ku,
pan chɔɔ kachiŋu we ku.
Lewo Fnaa Pe Kala Waara
17 Ki tia lewo tnimu kee na ni bin, ŋgi na hin? Kee ŋga o pini tra ŋga nu kro pe kanyana mu o ŋga, a yi kro pe kewaara, fuflɛ o nini finfin. 18 Yirɛ nyjɛ ni fna mu cha tra yiɛ na kre kro kee ni bin, ŋgi na hin? Mbe ku mbe yi ti ni krɔ lifun pan. 19 A ŋmbi u chin na ŋmba we ni krɔ li kre, we pe kachiŋu, ndee jijuo hin? A nde wre we paan yirɛ nyjɛ ni kachindɛ tɛɛ mu wi mu cha tra ŋga yiɛ na yire kro wru mbe ta. Kre kee ŋga chɔɔ kewaara yi. 20 Ki tia ni jawala na ni tɔɔra, ni fnaa tnumu ŋga ni tun tra ŋga yiɛ na kre na. 21 Ŋgi na hin? Lewo we kachindɛ, na jawala tɛɛ mbe kɛ nyu tnumu tun, mbe krɔyirɛ ta mbe tɛɛ ŋmba u n fna yi na pan. Kre kee ŋga chɔɔ ki n nɔɔloo ni, jawala tɔɔra kee titi yi. 22 Kena lewo fnaa tnumu ŋga u wii na tuni na nyibinyiɛ ni tra yiɛ na ŋga, yira ŋgi u taa ki nu wo? 23 U ble nyjɛ we li tra ŋga nu kro, kanyana na fooro kee bri yi, hali na ble wɔ, u jawala wa jaa wuu. Kre kee ŋga chɔɔ kewaara yi.
24 Kee ŋga lewo we jaa pe kro yi na, we li, mbe gbɔ, mbe yɛshɔɔrɔ ta u kɛ nyu tnumu nu. A ŋga ni kre kee ŋga le kre, ni nya na Nyiɛkpɔɔ kɛmu yi. 25 Na Nyiɛkpɔɔ bɔkɔ, ŋmbi we jaa mu ŋga yaka mbe mu ka, ndee mbe jaa ti mu muyɛ li hin? 26 Lewo ŋmba na Nyiɛkpɔɔ yiɛshɔ kre, wre u kaan kachindɛ, na jawala, na yɛshɔɔrɔ. La, lewo sisam pefun rɛ, wre we fna mbe yirɛ cha mbe tɛɛ ŋmba na Nyiɛkpɔɔ yiɛshɔ wre pan. Kre kee ŋga chɔɔ, kewaara yi, pan ki nyi na fuflɛ o nini.