Kee Kro Na Ki Nyjila Yi
3
Yira kro na ki nyjila yi,a kee kro na ki nyjila yi
tra ŋga nu.
2 Lewo seble wa,
a u kumu blee wa,
yirɛ luu nyjilaa wa,
a yi kun nyjila wa.
3 Kumu nyjilaa wa,
a yira tra nyjilaa wa,
nyuŋgo sin nyjilaa wa,
a ki ja nyjilaa wa.
4 Titɛɛrɛ nyjilaa wa,
a yɛjeere nyjilaa wa.
Nyɛni nyjilaa wa,
a yɔɔrɔ nyjilaa wa.
5 Nyjila ŋga nu pe dnɛ faa
na blee wa,
a yi nyina nyjilaa wa.
Nyjila ŋga nu pe ndro yiri
na mbra wa,
a nyjila ŋga nu pe ndro ninii wa.
6 Nyjila ŋga nu ndro yirɛ chaa wa,
a nyjila ŋga nu yi yilii u kɛɛ wa,
a nyjila ŋga nu pe yirɛ gbeele
na teeri wa,
a nyjila ŋga nu pe yi kolii
na woni wa.
7 Nyjila ŋga nu pe tini na wlai wa,
a nyjila ŋga nu pe yi frai wa.
Nyjila ŋga nu pe pierii wa,
a nyjila ŋga pe paaraa wa.
8 Koroo nyjilaa wa,
a prara nyjilaa wa,
a ŋunɔ nyjilaa wa,
a wejinyiŋge nyjilaa wa.
9 Kpain tnumu nyjɛ lewo tuni ŋga, yira ŋgi u taa wo? 10 Ni nya na tuuro badaaŋga ka Nyiɛkpɔɔ lewo tio. 11 Nyiɛkpɔɔ yira kro pe a ki nyu ki nyjila nu. U tia lewo loloŋgo wa baŋga taa haa na, nde lewo n ja mu kee nyjɛ Nyiɛkpɔɔ pe mu yire yi gbeele nyjila, mu sɛ su yi nyukɔɔrɔ na yire nɔɔloo tun. 12 Ni chin na kee ŋga ki fna mbe lewo pe tnimu ŋga nu o nyi ŋga yi na, we ti mbe u yiɛshɔ, mbra chichie pini. 13 Nyiɛkpɔɔ kɛmu yi na lewo sro ta mbe li, mbe gbɔ, mbe uyɛ li tnumu ŋga u tuni nu. 14 Ni chin na yira ŋga Nyiɛkpɔɔ pe kro, we tni nyjila kro nu. Ndro wa jaa yaka pe mbe ya yi na, ndee mbe ka wɔ yi nu. Nyiɛkpɔɔ yire yirɛ nyjɛ krɛrɛ pe mbe ki ti lewo u fiɛ.
15 Kee nyjɛ o nyaa ŋga krɛrɛ,
yi da mu pe,
a nyjɛ yie kɔɔ pe kre,
yire yi pini aŋga kre.
Kee nyjɛ yi pan mu tro kre,
u ndru na yi pini na.
16 Ndaa kee ka nya tra ŋga yiɛ na, kala li ndoe nyjɛ nu ki fna mbe kpra lie, na frakaa naa lii wa kre, sisam kee bribri yi lii wa. 17 A ndaa yo ni loloŋgo nu na, Nyiɛkpɔɔ we sisampefɛɛnlɛ, na frakafɛɛnlɛ kro kpra kun. Ŋgi na hin? U nyjila tɛɛ yira kro pan, mu nyjila tɛɛ kee kro na. 18 A ndaa ndru mu jawa na, fuŋga ni nya na Nyiɛkpɔɔ lewo pini na le, mbe ki ti lewo chin na pan u nyi na yurɔ wi. 19 A kumu ŋga kie lewo gbo kre chɔɔ, kre kie yurɔ gbo na. O kro ŋumu nunu kii wa o nu, a o kro taahaa nunu, lewo n wɛ yurɔ na. Na mu kre kee ŋga jawa, ma jaa ki nɔɔ loo. 20 Lawee nunu nu o kro shie, tra nu o kro yili, a tra nu o kro we ndru mbe sɛ. 21 A ŋmbi u chin na na lewo ku, nyjeeri u ŋumu shie, a na yurɔ ku tra tapan u ŋumu shie hin?
22 Kena ŋga ni nya yi na, yira chichie ka n wa mbe lewo jaa ta, na ŋga we uyɛ li u tnumu ŋga u fna mu tun nu bɔkɔ. Ŋgi na hin? U kumu kɔkro wa jaa ŋga ki lii o kro chin na.