Lewo Fiŋgee Na U Fnaa
4
Ndaa yiɛ wa mu nya, imi na pe leele fiŋge tra ŋga yiɛ na,a ndaa mblɛ praa fiŋge
kre nya na yetunyi pe fuu,
a pe nsra ndro ta mbe u pe bre,
ŋgi na hin? Jaŋga naa wa
pe fiŋgefɛɛnlɛ pre kɛɛ.
Ki tia ndro nsra sro mbe pe bre.
2 A ki tia ndaa yo na,
leele mblɛ pe ku
mu sɛ kre yiɛshɔ,
mu wɛ mblɛ pee wa
na le pre na.
3 La, ŋmba yɛshɔɔrɔ ki wɛ titi wi,
ŋmba pe n ta mu se tun.
A u n sisam ŋga leele pini,
tra ŋga nu ka nya tun.
4 Ndaa nya na tnumu ŋga lewo tuni, na wii na taa ŋga krɛrɛ, o ŋmbilɛ yirɛ nyjɛ pe ta kre nyibinyiɛ sisaa kii wa o na. Na mu kre kee ŋga jawa chɔɔ mu nya na ki n nɔɔ loo ni. Pan ki nyi na lewo fuflɛ nini.
5 Jijuo we kɛnyi fo mbe tni,
mbe klo u gbo.
6 Na mu ta kɛnyini
a wejiŋge nyjii mu na,
ki prɔ ŋga mu tnumu tun chiin,
mbe mu kɛnyi shiin nyi,
a mu n wejinyiŋge ni na.
Pan ki nyi na fuflɛ mu nini.
7 Ndaa ndru mu kee ka nya tra ŋga nu,
a kra pe yira waara.
8 Blɔ wa naa wa mu tni wre nunu.
U nsraa biblɔ ni,
a u nsraa lopɔ blɔ ni,
a nyjila kro nu tnumu u tuni,
a yira ŋga wra ta
kro nsra u yiɛ nyi.
A wra kna mna uyɛ wie mbo,
a kpain tnumu ŋga ni tuni
na chaa na teeri ŋga,
ŋmbi pan ni yi chaa na teeri wo.
Kena ŋgi ki tia ndaa fnai,
a mba niyɛ li ŋga hin?
Kre fooro kee kpɔɔ ŋga le rɛ,
na mu ki jawa ki n nɔɔloo ni.
9 Na e pe leele shiin,
ki nyu mu wɛ ndro nunu na.
Ŋgi na hin?
Na leele shiin tnumu tun,
pie ta nɛɛrɛ.
10 Na ki pan na nunu to kre,
u ŋmbrɔ we u yire.
La, kii fooro ni na mu to,
a ma ndro ta mbe u mu yire.
11 A na leele shiin sni mu mbra,
gbɛŋgɛ we le peyɛ nu.
A na ndro nunu wi,
ŋmbi gbɛŋgɛ kie le u nu hin?
12 Ndro nunu gbɔɔn n pe yaka,
la, na e da leele shiin,
ee jaa wi mbe eyɛ shɔ.
Na mu mɛnyi taarɛ tɛɛ na yira poo,
yi kɔɔn sheli mu wɛ nunu na.
Tnu Ka N Wa Yɛtaara Nu
13 Na nyanyjɛble shian mu kala chin, ki nyu mu wɛ ŋmba u lɛ mu ŋunumu li mu daŋga, a wraa jaaraa loo na. 14 Pie jaa nyanyjɛble yii mbe le nyuŋgo mbe u wɔ mbe u paan jɔɔn li, mbe nyanyjɛble se shianfɛɛnlɛ nu, mbe u yiri mbe jɔɔn li u waŋgra nu.