Maa Shia Fiɛlɛ Mbe Nyu Yo
5
Na mu sɛ Nyiɛkpɔɔ katoo, le na mu ndie tɛɛ mbra ndru, mbe ma kɔɔ jijiele mblɛ pe n chichie, na sisam lalaa chin pre sra nyjɛ pe woni yire ka wɔ.2 Maa shia ti mbe mu nyu
yiɛklu mu pan,
jawa mu chin mu paara,
maa shia fiɛlɛ
mbe nyu yo Nyiɛkpɔɔ pan.
Nyiɛkpɔɔ wa nyjeeri,
a ŋuu wa tra,
kena maa ti
mbe mu paaraa nɛɛ.
3 Na lewo jawala nɛɛ,
pan u ŋunɛ ŋunu nɛɛrɛ,
kena na jijuo paara nɛɛrɛ,
pan jijiere kee yili u nyuu.
4 Na mu danyi da mu Nyiɛkpɔɔ ŋga, maa shia mu yi wɔɔ na. Nyiɛkpɔɔ yiɛ n shɔ jijuo na, kena li mu danyi na, imi na ki fna. 5 Na mu n nyu yo Nyiɛkpɔɔ pan, ki nyu mu wɛ ŋga mu nyu yo u pan, a ma li mu nyu yoo kre na. 6 Maa shia ti mbe mu nyu mu tini mbe sɛ le sisam nu. Mbe ki ti mu kɔɔ yo Nyiɛkpɔɔ srawɔfun pan na, kaa ndaa lii mna nyu yo Nyiɛkpɔɔ pan. Kena maa shia ti Nyiɛkpɔɔ krɔ kun na mu ni, mbe u mu tnumu kla mu kɛɛ. 7 Ŋunɛ tataara ŋunɔɔ, na kayooro tataara, yi krɛrɛ yirɛ wɛɛ yi. Kena ki fna mbe lewo Nyiɛkpɔɔ fiɛ.
8 Na mu nya pra shianfun fiŋge tra ka nu, na kpra fɛɛlɛ kre, maa ti mbe kre kee ŋga mu fo, ŋgi na hin? Loplombo mblɛ pe yire kee yire pini kre, pe loplombo mblɛ pe wɛ pre na kre, pre pe le na pini. A pre loplombo shiin pre, ŋmba u wɛ pre na pre le na pini na. 9 Yirɛ nyjɛ pe taa tra kre nu pe kro lii, a tra kre nu ŋunu wre tnu taa.
10 Ŋmba u swa kori kre,
imi na we swa taa da kro,
wa yɔɔ.
A lewo ŋmba u wejiyirɛ kori kre,
na u swa ta, kraa u yiɛnyi.
Kre kee ŋga chɔɔ,
na mu ki jawa ma ki nɔɔloo.
11 Na mu taa nɛɛrɛ,
mbe mu lifɛɛnlɛ na nɛɛi
mbra yaa.
A tnu ŋga kii wa ki nu,
mu yɛtaarafun wre ŋga yi na,
ŋga we na yi le nyini ni bɔkɔ.
12 Na paalifun li mu yɔɔ o,
ndee na u n li mu yɔɔ o,
na u sni, ŋunumu taan u pan.
La, swafun ŋmba pan
yirɛ nyi nɛɛrɛ kre,
na u sni, wa ŋunu mbe yɔɔ.
13 Ni kanyana kpɔɔ kee ka
nya tra ŋga yiɛ na,
kre yi na, lewo swa taa tataara
mbe tɛɛ mbra uyɛ sri,
la, kala kie kɔɔ cha mbe u ŋga,
14 ndee mbe ndrapɛɛnrɛ kee
ka kɔɔ ti mbe u yɛtaara yirɛ
yire kɔɔ yili u kɛɛ.
Na u biblɔ kɔ mu yiri kuraa kre,
wa yaka da u lɛ krɔ nu.
15 Wejinwaara pra lewo se,
imi na wra pan kre,
pan chɔɔ we ndru mbe sɛ.
U tnumu ŋga u tun krɛrɛ,
wa jaa yaka wru ki nu mbe sɛ.
16 Kee ŋga ki yaa titi yi na,
imi na pra lewo se,
pan we ndru mbe sɛ.
Kena tnumu ŋga lewo pan mu tun,
mu na fuflɛ nini finfin ŋga,
tnu ŋgi we ta ki nu hin?
17 Nyjila ŋga lewo we li
tra ŋga nu kro,
pan ki nyi na wɔmu nu
u tni na lii,
a yɛjeere sisaa, na yira,
na krɔkuɔn, yi u fɛ mu kun.
18 Kee ŋga ni nya na ki nyu mu lewo ŋga yi na we sro ta mbe li, mbe gbɔ, mbe uyɛ li u tnumu ŋga u tun tra ŋga yiɛ na ni, nyjila chiɛri ŋga Nyiɛkpɔɔ u ŋga ŋga nu. Ŋgi na hin? Tnu ŋga we ta kro yi. 19 La, na Nyiɛkpɔɔ tia lewo swa ta, mu uyɛ ta, mu tia wra uyɛ lii kre, kena u ti mbe u yiɛshɔ u tnumu ŋga u tuni kre na. Ŋgi na hin? Nyiɛkpɔɔ kɛmu yi. 20 Nyiɛkpɔɔ we ti mbe u yiɛshɔ titi, a wa tni mbra kawa kee ŋga kie pan baŋga ni.