Lewo Waa Uyɛ Wru Mbe Taa Yɛtaara Yirɛ Na
6
Ni kefɔɔn ka nya tra ŋga nu na, a kra ndro kro tɔɔra kpɔɔ. 2 Nyiɛkpɔɔ we jaa ti lewo swa ta, mbe uyɛ ta, mbe ti u buuro ta, mbe ki ti mbe u yira ŋga kii wa u loloŋgo na kro ta, la, Nyiɛkpɔɔ wa ti mbe u yi tɛɛ mbe uyɛ li, la, lefuŋu ŋmba u n chin yi nu we paan yi tɛɛ mbe uyɛ li. Na mu kre kee ŋga jawa, ki n nyu, a nɔɔloo n wa ki nu.3 Lewo we jaa mu waŋgra ŋga nu, mbe se biile lafaa, la, imi na u ŋmaa we tnu mbe da kpan, na wa jaa uyɛ li na yirɛ nyjɛ yii wa u pan ni, mbe ku mbe pe u le chiriri kre, kena bikpɔlɔɔ kuraa prɔ u na. 4-5 Wre bikpɔlɔɔ wre wa yaka nya tra ŋga nu, pia mɛɛ kuraa taa u na, a wɔmu ndoo kprikpri kre nu we ndru mbe sɛ. La, wre pɔ wre wuu mu wɛ wre ndro wre na. 6 Hali na ki pan na wre ndro wre li yɛlɛ kagbenyi shiin, a u n ja mu uyɛ li na u yɛtaara yirɛ ni, na u ku, titɛɛ ma wre na bikpɔlɔɔ wre kro we sɛ ra?
7 Yira ŋga lewo we ka
na u yila na tnumu tuni.
Nde lewo niŋge na ja
mu kɔ u na.
8 Yira ŋgi ni kachiŋu
wɛ jijuo na hin?
A na shianfun uyɛ le
mu chin u tnimu nu,
yira ŋgi tnu we ta hin?
9 Ti mbe ŋga mu ta kre mu yiɛ nyi,
mbe ma ti mu yiɛ nyina
fɔŋgɔ na,
kre kee ŋga chɔɔ,
tɔɔra kee yi mu lewo ŋga,
pan ki nyi na lewo fuflɛ nini.
10 Yira ŋga kii wa waŋgra
ŋga nu kro,
kii wa na mɛɛ ni fa,
a imi na lewo kepele nyi kpan,
Nyiɛkpɔɔ u chin.
Ndro wa jaa ŋmba u sheli,
mu wɛ u na nyu kaanri.
11 Na lewo paaraa nɛɛ, pan chɔɔ u kee yire tataara wa nɔɔloo ta, kena tnu ŋgi ŋmba u ndru mu pan kre we ta hin?
12 Ble nyjɛ lewo we li tnimu ŋga nu, pan yi nyi fiɛn imi, a tnu ka n wa yi nu, a pan ble yire shie nyaanyaa na yira ndile yi. A na lewo ku mu yili tnimu ŋga nu, mni we pe mbe kee ŋga ki lii tra ŋga nu chin na hin?