Kachindɛ
7
Mɛɛ chichie nyu,mu wɛ tlade ndrɔ shelee na,
a lewo kumu ble nyu,
mu wɛ u se ble na.
2 Na mu sɛ kumu katoo,
ki nyu mu wɛ,
ŋga mu sɛ katoo ŋga nu,
pe ble kpɔɔ lii nu na.
Ŋgi na hin?
Lewo fna mbra uyɛ sɔɔnri,
na kumu wa na u sri.
3 Fooro lie nyu mu wɛ titɛɛrɛ na,
a yɛjeere nyu mu loloŋgo ŋga.
4 Jijuo u tɛɛ nyjila kro nu,
a kachiŋu na kumu jawa.
5 Ki nyu na mu kachiŋu ta,
mbe u mu yiɛ kee yo mu pan,
mu wɛ ŋga jijuo
we na mu kaan mɛɛ na.
6 Pan jijuo titɛɛrɛ nyi na,
wuuro pe le kanhun yira fuuru,
tnu ka n wa u titɛɛrɛ kre nu.
7 Kie jaa pan na kachiŋu wi ŋu,
la, dnumu we jaa mu kaari jijuo,
a dɔlɔɔ we jaa mu kla.
8 Kee nyukɔɔrɔ nyu
mu wɛ ki nɔɔ hlehaa na,
a lewo ŋmba u frɔ taa kee nu kre,
u nyu mu wɛ
ŋmba u uyɛ kpɔɔri kee ni na.
9 Maa ti mbe mu krɔ na kuu
nyaa nyaa, ŋgi na hin?
jijuo u kala yiri na leni lɛɛ.
10 Kachindɛ kee ma na mu wie na,
yira ŋgi ki tia fa kre prɔ
aŋga na wo?
11 Ndro kro fna mbe pe kachiŋu,
ŋgi na hin?
Ki nyu mu wɛ krɔyira na.
12 Kachindɛ toni ndro na,
imi na swa toni ndro na kre.
Kachiŋu tnu ŋga u taa yi na,
jawala taa tii
mbe ndro ŋmaa tnu.
13 Kee ŋga Nyiɛkpɔɔ pe jawa,
ŋmbi we jaa yira ŋga
Nyiɛkpɔɔ kru fraka hin?
14 Na nyjila chichie mu da,
ti mbe ki tna mu pan,
la, na nyjila sisaa waa mu da,
mbe mu jawa na Nyiɛkpɔɔ wre
u tia yi kro na pini.
Ki tia lewo wa jaa u baŋga chin.
15 Ni tnimu ŋga nu ni nyi ŋga,
ki n pe yaka yira ni pan,
ni nya a lewo frakafun ku
u frakaa nu,
a sisampefun wa ŋmaa tnu,
nde kii wa na u sisam pini.
16 Kena maa fraka mbe tro,
ndee mbe kala chin mbe tro,
mbe kɔɔ muyɛ kla finfin.
17 A maa ti mbe sisam pee,
wɛ mu na mbe tro,
a maa daŋga,
na kre ma mu ku,
ma mu nyjila da.
18 Yire kee yire kro yii chɛchiɛri.
Ŋgi na hin?
Na lewo Nyiɛkpɔɔ fiɛ kre,
we kre kee ŋga pe.
19 Kachindɛ we ti
mbe ndro nunu faŋga ta,
mbe wɛ ŋulo kɛ,
mblɛ pe kakpɔɔ nunu le na.
20 Lewo frakafun n wa tra ŋga nu,
na kee ŋga ki fraka chiin pini,
a wa sisaa pe fio.
21 Maa ndie tɛɛ
kee nyjɛ leele yuu kro na,
na kre ma, mu kɔɔ loo na,
mu sumifun kuraa mu suni.
22 Ŋu titi kuraa chin mu lam,
na nyjila tataara nu
mu paara mu plɛ sun.
23 Ndaa ni jawala tɛɛ,
mu yire kee nyjɛ kro pe mu le,
a ndaa ni jawala pe na,
mbe kachindɛ haa cha, la,
ndaa nya na ki haa le na ni ni.
24 Imi na kachindɛ nyi kpan,
ki taa sheli,
a ki haa le na lewo ni.
25 Ndaa ni jawala pe na, mbe twan
mbe kachindɛ haa cha,
mbe ki ti kee, nyjɛ yi ni tɔɔra
jawala nu yire nyu to, mbe ki ti
mbe ni sisam na jijiere titi nɔɔloo.
26 Ni yira ka nya,
a kra yaa mu wɛ kumu na,
kre yi lewo chlɔ ŋmba u pe
na maŋa pɛlɛ yi.
U koroo ŋga we wɔ
mbe mu nyina kre,
we mu yii na jɔŋgi yi,
a u kɛnyi nyjɛ we le
mu lagboo yire,
we pe na jlɔnyi ni u mu gɔli.
Lewo blɔ ŋmba na,
Nyiɛkpɔɔ yiɛshɔ kre,
we shɔ mbe yili u kɛɛ, la,
sisampefun we to u pɛlɛ nu.
27 Kee ŋga Ŋunu Solomon yuu yi kre mbo,
“Kee ŋga ni twan mu nya yi kre,
28 ni twan mu blɔ nunu,
ŋmba u fraka nya
bilɛ kagbeŋge nu,
la, ni n chlɔ ŋmba u fraka
chiɛlɛ nu ma nya.
29 Kee ŋga ni nya kro yi na,
na mu le,
Nyiɛkpɔɔ lewo gbeele a u fraka,
la, lewo u uyɛ jawala kna
mu gbli.”