8
Ŋmbi u pe na kachiŋu,ŋmba u ja na kaalɛɛ nɔɔ chini
wre wi hin?
Kachindɛ tii mbe lewo yiɛ chiɛnri,
mbe ti mbe titɛɛrɛ pe u yiɛ na.
Ndie Tɛɛ Ŋunu Pan
2 Ndie tɛɛ kee ŋga ŋunu we yo na, ŋgi na hin? Mu yire mu da mu Nyiɛkpɔɔ da mu u ŋga. 3 Na ŋunu jawala wru kee na mu kɔ, maa shia fiɛlɛ mbe u nyu kee je, ndee mbe u nyu kaanri. 4 Kee ŋga ŋunu we yo kro jaŋga u lii, kena ŋmbi we jaa u nyu kaanri ŋga u pini na hin?
5 Ŋmba u lii ŋunu nyu kee na kre,
kala wa u li.
Kachiŋu chin kolo ŋga na we tro,
na nyjila ŋga na ki fna
u kala pe.
6 Kee kro pe nyjila wa,
na ki pee sembremu ni, la,
leele kanyana nɛɛ mu wɛ pe na.
7 Lewo n ŋga kie pan baŋga chin,
ki tia ndro n wa
mbe ŋga kie pan yo u pan.
8 Ndro n wa jaŋga ni fuflɛ na,
ndee mbe jaa ki nyu yii.
Ki tia ndro n wa jaŋga ni
u kumu ble na.
Pan chɔɔ na ŋunɔ to,
pia jaa wa kɛ wɔ mbe wa.
Pan chɔɔ sisam wa jaa
sisam pefun shɔ.
9 Ndaa yire kee nyjɛ krɛrɛ nya,
mna tni mu kee nyjɛ yi lii tra ŋga nu kro jawa.
A ndaa niyɛ wie na,
yira ŋgi ki tia leele plɛ
na jaŋga lii plɛ na,
mu tia pra kala nyaa ma hin?
10 Ŋga ki ya na yi na, ndaa sisampefɛɛnlɛ nya a pra ku, a pra sɛ pe le, la, ŋga pra sɛ pe le mu ndru na paan kre, a leele pre naa pe pni kakpɔɔ ŋga na praa sisam kepele yire pini kre na. Na mu kre kee ŋga jawa chɔɔ nɔɔloo n wa ki nu.
11 Na ndro pimi li kee ka na, a pe n u ndie tini imi na ki fna nyaanyaa, kie ti mbe leele na chaa mbe kre sisam kre ka pe na. 12 Kii wa na sisam pefun we jaa keesɛɛ pe gbee lafaa, mbe u fun ŋmaa je mbe tnu, la, ni chin na kee kro we nyu kpɔɔ mbe ŋmba u Nyiɛkpɔɔ fiɛ kre ŋga, ŋgi na hin? U fraka Nyiɛkpɔɔ yiɛ. 13 Nyjɛ krɛrɛ kɔkro ni, ŋga sisampefun n na Nyiɛkpɔɔ fiɛ kre ndra na, kia nyu mbe u ŋga, a u ŋmaa wa tnu.
14 Kee nunu ŋga ki n nɔɔ loo ni waŋgra ŋga nu yi na, nyjila ka nu, ndie tiniɛ ŋga ki fna mbe sisampefun ta kre, kre frakafun taa, a sisampefun na fɔtɔɔrɔ chichie ŋga ki fna mbe frakafun ta kre taa. 15 Kena ŋga ki nyu waŋgra ŋga nu kro yi na, lewo we sro ta mbe li, mbe gbɔ, mbe uyɛ li. Kre kie ti mbe o jaa tni mbe tnumu tun yɛshɔɔrɔ ni nyjila ŋga Nyiɛkpɔɔ we ti o li tra ŋga nu.
16 Ndaa niyɛ fna mu kachindɛ haa cha, ni nsraa ŋunu lafo na blee, na chaa mbe kanyana tnimu ŋga nu lewo nyi ŋga nɔɔ loo. 17 Ndaa yiɛ wa mna yira ŋga Nyiɛkpɔɔ pe kro le, ŋga ndaa nya yi na ndro n wa mbe jaa kee nyjɛ u pe tra ŋga nu nɔɔ loo fio. Mu jaa pe kachiŋu, la, imi na mu gbeŋmba mbe da kpan, ŋu na mu kachindɛ kro, ma jaa kee ŋga Nyiɛkpɔɔ pe kro nɔɔ loo.