Ndro Kro Taahaa Nunu
9
Ŋga ndaa tni mu yire kee nyjɛ krɛrɛ jawa kre, ŋga ndaa nya yi na lewo ŋmba u fraka o, na ŋmba u kala chin o, kee nyjɛ pe pini yire kro wa Nyiɛkpɔɔ kɛɛ. Lewo n chin ŋga kii wa na u sri, na chichie yi o, ndee na fɔɔn yi o, u n ki chin. 2 Ndro kro taahaa nunu, ŋmba u fraka o, sisampefun o, lewo chichie o, lewo sisaa o, ŋmba u pe cheche o, ŋmba u n pe cheche o, ŋmba we jaa sra wɔ o, ŋmba wa jaa sra wɔ o, pe kro taa haa nunu. Ŋga kie lewo chichie da kre chɔɔ, kre kie lewo sisaa da. Ŋmba we jaa yire Nyiɛkpɔɔ yiɛ mbe da, na ŋmba u fiɛ na we yire Nyiɛkpɔɔ yiɛ mbe da kre kro, wa wo n prɔ wa na. 3 Na mu kre kee ŋga le, ma jaa ki nɔɔ loo na ndro kro taa haa nunu. Na mu lewo le, sisam kee, na jijiere kee bribri yi yilii o loloŋgo nu, a nyjɛ krɛrɛ kɔkro kre, kumu kie paan lewo wru. 4 Lewo ŋmba u wa mu tni ŋmaafɛɛnlɛ tra ŋga nu kre, uu wa na kaanhaa ni, pan ki nyi na nyukuan ŋmba u le wi, u prɔ blɛkpɔɔ ŋmba u ku na. 5 Ŋgi na hin? Lewo ŋmba uu wa na le kre, u chin na kumu wa u yiɛ, la, ŋmba u ku wre n yaka chin. Yaka n wa mbe u pe mbe fɔtɔɔrɔ ta ki nu. U ku mu sɛ, a pe u kee fɛɛ. 6 U koroo, na u prara, na yenyjam ŋga u nu kro, u ku mu sɛ na yi ni. U n wa na yaka pee ni waŋgra ŋga nu na.7 Kena yɛshɔɔrɔ tɛɛ mu mu sro li, mu muyɛ li na mu simi ŋga mu gboo ni, ŋgi na hin? Fuŋgaami ŋga, Nyiɛkpɔɔ nyu mu na tnumu ŋga mu pini kro na. 8 Nyjila kro nu muyɛ san, mu nyu. 9 Ŋu na mu chɔ ŋmba mu kori kre, e eyɛ li, tnimu ŋga nu o nyi ŋga nu, kre chiin ee jaa pe kanyana tnimu ŋga nu lewo nyi ŋga nu. 10 Tnumu ŋga mu na pini kpan, ki pe na mu faŋga kro ni. Ŋgi na hin? Lawee ŋga nu mu ku mbe sɛ kre, tnumu, ndee jawala wruu, ndee jawala taara, ndee kachindɛ n wa wa.
11 Ni kee ka nya tra ŋga nu, jetnam ma tafɛŋgɛ, a nyjila kro nu ma faŋgafun wii mbe yili, a kachiŋu ma u sro taa na lii, a jawalafun ma u swa taa, a mblɛ pe jani kre ma pe kpɔɔmu tnihaa taa nyjila kro nu. Ndro kro wa na u nyiɛnyɔɔrɔ ble ni.
12 Kre ndro n wa mu nyjila ŋga kii wa u yiɛ chin. Imi na asau mbro foni na u yiri, ndee jɔŋgi hanyini foni na u yiri kre, pan lewo lee kefɔɔn nu nyjila ŋga u n ki kra nu.
Kachindɛ Prɔ Jijiere Na
13 Ndaa nya imi na leele kachindɛ jawa mu da, a kra ni jawala pɔ. 14 Chia fiɛɛn ka naa wa, a leele mblɛ praa wa ki na pre nsra nɛɛ. A ŋunu faŋgafun wa na pan mna pe tɔ, mna yirɛ badɛnyi koli mu tle ki mboo ŋga pe sin mu ki fɛ mu kun na, mbe nduu mbe le chia kre na mbe wi na pe ni. 15 Kre nyjila kre na blɔ shianfun kachiŋu waa wa chia kre na, a wra tro kachindɛ kolo na mna chia kre shɔ ŋunɔ kre nu. La, nyjila ka na kɔ mu da, ndro nsra wre blɔ wre kee sɔɔnri na. 16 Ni yuu na kachiŋu prɔ faŋgafun na, la, imi na shianfun kachindɛ kpɔɔ mu da kpan, ndro na ndie tɛɛ u kee na.