10
Imi na shunshɔɔnlɔ gboolo,we jaa ti mbe tlade ndiom yili,
na yira fɔɔn yi kre,
pan chɔɔ jijiere fiɛn,
we jaa kachindɛ kla.
2 Kachindɛ tii
mbe lewo kee chiriri pe,
a jijiere tii mbe lewo sisaa pe.
3 Na mu jijuo nya to,
mu chin na u n jawala ni,
u kepele we ti
mbe ndro kro chin na jijuo wi.
4 Na ki pan na mu lopom krɔ kun
na mu ni kre,
maa yila ki na mbe yire haa
ŋga u mu ŋga kre ti,
na mu muyɛ nyjii, kie jaa ti
u ŋga mu pe kre ti mbe mu kɛ.
5 Ni kefɔɔn ka nya waŋgra ŋga nu,
a ŋulo na ki pini.
6 Pe jijiele kaan kpɔɔmu lawee,
a pe n swafɛɛnlɛ le mu nya.
7 Ni tinlɛ nyaa soolo na,
a lekpɔɛ na nyaari tra na tinlɛ lɛ.
8 Na mu wee tuu mu wa,
mu jaa to ki nu,
a na mu mboo juari mu wo,
wɔɔ we jaa mu nu
yi kponkpon yire nu.
9 Lewo ŋmba u dnɛ jee kpan,
dnɛ yire yi u prai,
a ŋmba u kɛɛn yɔɔlɛ kre,
kɛɛn yire yi u prai.
10 Na gbana nyu pin,
a mu n ki nyu liɔ,
faŋga ni mu tɛɛ mbe tnumu tun,
la, penchiɛn we ti mu chin
ŋga mu pe mbe ki nyu.
11 Na mu jaa wɔɔ twan,
mbe wa mu nu,
kena maa ti mbe u mu nu mbe kɔ,
na kre ma, tnu ka n wa
mu twanraa kre nu.
12 Kee ŋga ki yilii kachiŋu nyuu kre,
ki paan na buuro ni,
la, jijio nyu kee u klai.
13 Na u nɔɔ hle kre,
u paara na jijuo wi,
a wre naa yo u nyu we to kre,
na ki pan na sisam kpɔɔ ni.
14 Na Jijuo paara u nyu na to,
a ndro n baŋga kee chin.
Kena ndro wa jaa u kumu
kɔkro kee chin,
mbe yo u pan.
15 Jijuo u uyɛ leni fnaa nu,
a wa chin kolo ŋga na we tro,
mbe pan katoo.
16 Waŋgra ŋga ŋunu u bimi lii,
a u loplombo na peyɛ lii
nyjila kro nu kre,
waŋgra kre kala nyaa.
17 La, waŋgra ŋga ŋunu uu jawala ni,
a u loplombo na lii
nyjila ŋga ki fna nu,
mu peyɛ le mu chin,
a pe n na gboo na tuuri kre,
kre waŋgra kre wo yi dwamu.
18 Na mu gbashia kpɔɔ,
mu nyuŋgo we le,
mbe ka mbe to.
19 Yɛliire na sigbɔɔrɔ
ki paan na yɛshɔɔrɔ ni,
a swa we jaa ti mu
ŋga mu chaa kro ta.
20 Maa shia paara mu jawala nu
mbe ŋunu taan,
ndee mbe tni mu nyuŋgo
mbe swafun sun,
na kre ma hanyini wa we sɛ
mu blami.