Kachiŋu Kee Ŋga U Pini
11
Chichie pe mu ki wamu fun aŋga,
baŋga mu ki fɔtɔɔrɔ ta.
2 Ŋga mu ta kre nyina
lawee tataara nu,
ŋgi na hin? Mu n chin sisaa
ŋga kie kɔɔ pan baŋga.
3 Na nyumu wa tloe nu nɛɛrɛ,
kie pan nyiɛ mbe wo tra.
La, kokoo ŋga na tiŋge we to
mbe sni kpan, bawa kie kro.
4 Maa ndram, ndee fuflɛ gbɔɔn le,
mbe chin mbe yirɛ luu.
Yi luu mu wa,
kre mu kɔɔ yirɛ ta
mbe kun yi kunyjila.
5 Nyiɛkpɔɔ wi yira kro gbeelefun,
a lewo wa jaa yira ŋga u pe
nɔɔ loo mbe kɔ,
ndee mbe jaa kolo ŋga na
lewo kuun sefoo nu chin.
6 Mu yirɛ luu bnimi,
mu tnumu tun
mu sɛ su yilakɔŋgɔ,
ŋgi na hin? Mu n chin
nyjɛ yie nyu, na nyjɛ yie kla,
aada yi kro we nyu.
Ŋmba U Mu Wa Wre Sɔɔnri Mu Yirifum Nyjila
7 Na nyini nyisee nya,
ki tna ki pan.
8 Yɛlɛ nyjɛ lewo we li kpan,
ki fna mbe u yɛshɔɔrɔ li yi nu kro,
la, ki fna mu sɔɔnri na,
wɔmu kprikpri ble tataara
yɛɛ wa mu yiɛ.
A ŋga kie kɔɔ pan kro,
nɔɔloo n wa ki nu.
9 Yirifuŋu, nyjila ŋga mu yirii ŋga,
ti mbe mu yiɛ na shio.
Mu ti mbe mu ndra tna mu na,
mu yirifum nyjila nu.
Yira ŋga mu nyini we nya,
mbe mu loloŋgo na ki chaa kpan,
taa ki na.
La, jawa na kee ŋga mu pe kro,
Nyiɛkpɔɔ we mu kpra kun
brikana.
10 Kena maa kawa na kee ka ni,
ŋgi na hin?
Mu yirifum nyjila tnimu kre,
we tro mu na fuŋgaami.