12
Mu gbeelefun wre sɔɔnri,mu yirifum nyjila nu,
mbe ble sisɛɛ nyjɛ yii wa
mu yiɛ yire chin mbe da,
yire yɛlɛ yire nu mu yo na,
fuŋga rɛ, ni yɛshɔɔrɔ kɔ.
2 Nyjila kaa wa na paan,
mbe nyisee na yila,
na yeŋge na wɔɛlɛɛ,
pe duu mu yiɛ na,
a na mu tloe le,
yie pe na titɛɛ yi nyi mu yire.
3 Kre nyjila kre, mu kɛnyi
nyjɛ ni mu muyɛ shio yire,
we na seeri,
mbe mu jeele nyjɛ yi sheli aŋga ŋga,
pe mu na yiɛyiɛ,
mbe mu ŋgaala kɔ mu nyuu,
ma jaa yira saan,
mbe mu nyiɛlɛ pe mu na duu,
ma na nyaa chiriri na.
4 Kre nyjila kre,
na pe gble lete na ma loo,
a na pe yirɛ trei,
ma yi tiŋge loo,
a na pe mɛɛ koni ma loo,
ŋga hanyiɛlɛ we nyɛni
nyisee nyu na,
mbe leele nyi kre,
na ŋu klu mu nyi fuŋga ma.
5 Kre nyjila kre mu na fiɛ
na mu nduu nyjeeri,
na mu yiri mbe nyaari
mbe fiɛrɛ na mu yiri,
a mu ndra nyjure we fniŋge
na kɔdɔli jiri,
kre nyjila kre ma jaa jɔŋgɔ mu titɛɛ,
titɛɛ mu yire mbra mɔŋɔi
na kpaa blɛlɔɔ wi,
mbe mu tnimu mu bin.
Na kre nyjila kre da lewo na,
we sɛ lawee ŋga nu ndro kro shie,
a wa ndru u kro na kre nu,
na ki pan ma mbe nyɛnɛɛ bɔ lete na.
6 Swafiŋge jlɔnyi yire we peeri,
mbe swanyiɛ kotolo kre ja,
mbe chɔkoo ŋga ni pe nyumu koori kre to mbe ja,
mbe kɔlɔ maŋa kre kun mbe to,
7 mbe pooro ŋga ni
pra lewo faanri kre,
ndru mbe sɛ chaa tra nu,
mbe ŋumu kre ndru
mbe sɛ Nyiɛkpɔɔ,
ŋmba pan kra yiri wre pan.
8 Ŋunu Solomon wra yo na,
“Yira kro pe finfin, na mu ki jawa,
mu chin na yira kro pe yira
waara kpokpo yɛŋgɛ,
a nɔɔloo n wa yaka nu.”
Kee Kre Nyukɔɔrɔ
9 Ŋunu Solomon na kala chin,
a ŋga wra chin kre,
wra leele nyina ki yi.
Wra yomɛɛlɛ kee twan chiriri,
mna kpra ŋga kii wa yi nu nya.
10 Solomon kee nyjɛ wraa yuu kre,
yira pe gbunyiŋge kee,
a kra tia kee nyjɛ wra nyunɔ
mu tɛɛ yire na fraka, mna pe kpra.
11 Kachiŋu kayooro pe na,
kɛɛn nyjɛ ni mbaala lefɛɛnlɛ teeri,
na pe mbaala kɔɔnri kre yi,
a yomɛɛlɛ nyjɛ u gbuun
yiree wa nyjila kro nu,
na ŋmaa ŋga ni pe yirɛ
kani na mbra yi.
A Nyiɛkpɔɔ ŋmba wi ndro kro
lefun wre u yire yomɛɛlɛ
yire gbun mu tɛɛ.
12 Ni pɔ, muyɛ dɔɔ ta,
maa shia ka ya yire kee nyjɛ na.
Hlɛ nyunɔ n wa nyukɔɔrɔ ni,
a na mu yo mu twan tataara,
muyɛ mu tɔɔra finfin.
13 Ni kee nyjɛ ni yo tataara
yire kɔkro ni,
kee haŋa ŋga ni ta mbe yo yi na.
Nyiɛkpɔɔ fiɛ,
mu li u mbra kee yire na,
ŋgi na hin?
Kee ŋga ki fna
mbe lewo pe kro yi.
14 Kee ŋga lewo we pe kpan,
ndrandra kee kro,
na chichie yi o,
na sisaa yi o,
Nyiɛkpɔɔ we yi kro kpra kun.