Blɔ Wre
5
Ni bijɔ, ni jaa,ni le ni kagbla kre nu,
nii wa na ni kroboo,
na tuwe ndiom tɛɛn yoori.
Nii wa na na ni srɛ lii ki zezee nu,
na simi, na nɔnɔ gboo.
Nɔɔlɔ Pre
E li, e gbɔ,
e sɛ su na koroo we e yɔɔ.
Chlɔ Wre
2 Ndaa sni mna ŋunɛ ŋunu,
na ni nyanyjɔ wre pan,
mu yire krɔ kro
na ki kori mbo,
Blɔ Wre
“Ni jaa, ni bichrɔ,
krɔ nyaa ni pan,
ni katoo kotro,
ŋu wi ni kee kro rɔ,
ndroo mɛŋɛ ni ndra nyjuro nyiŋge,
kena krɔ nyaa ni pan.”
Chlɔ Wre
3 Ni dodonyi wɔ niyɛ na,
kena ni yi le na ree?
Ni ni jeelee je mu kɔ,
kena ni nyaari mbe yi wɔ na ra?
4 Ŋga mbe nya,
na ni nyanyjɔ kɛ tini,
mu krɔ kre nyaa yira yii,
a bie na ye ni na.
5 A ndaa taan mu yiri ŋunɛ yire nu,
mbe sɛ krɔ nyaa ni nyanyjɔ pan,
ŋga ndaa krɔ kre yii kre,
ndaa nya na kroboo ŋga ki ni kɛ,
na ni kambɛɛlɛɛ,
na krɔ kre nyaa yira kre kro,
mana mu na nuni.
6 A ndaa krɔ kre tini mu nyaa,
na ni nyanyjɔ wre n wa,
na u sɛ.
Kra tia ni yiɛ na je,
a ndaa u le le ni nsra u nya,
a ndaa gble le mna u yeeri,
u nsra shɔ ni pan.
7 Ŋga ndaa u yeeri ma kre,
chia shiefɛɛnlɛ pre na ni nya.
A pra ni yii mna ni gbun mna laala,
mna ni dodoŋgi fimi wo wɔ ni na.
8 Kena Jerusalem bichiɛlɛ,
e da e ni ŋga na,
na e ni nyanyjɔ wre nya,
ee yo u pan,
na u koroo chaa ni gbo.
Nɔɔlɔ Pre
9 Bichrɔ nyɔɔ,
kolo ŋgi na mu nyanyjɔ wre
nyumu yili kiyɛ
na bilɛ hamblɛ pre ni hin?
A mna yuu o pan na o da
mbe mu ŋga kre kolo ŋga na hin?
Chlɔ Wre
10 Ni nyanyjɔ wree?
U yire, mu nyu titi,
na uu wa mu yire leele kagbenyi kɛ nu,
u yili uyɛ na pe ni.
11 Pan u ndra chiɛnri na swanyiɛ yi,
a u ndra nyjure kulo kulo
mu nyu,
mu wɔ gɔɔgɔɔ wɔmu yi.
12 Pan u nyiɛlɛ bie nyu na kotulo,
wa nyumu nyi lawee,
pan u nyiɛlɛ bie yire nyi na,
kotulo blu nɔnɔ nu,
mu yili mu tni mu tɛni peyɛ na,
na lagboo kaari yi.
13 Pan ni nyanyjɔ wre gbenyi
pe niŋge ni,
na kagbla ŋga lam
pe tuwe ndiom tɛɛn luu yi.
A u nyu hlɛ na chiɛnri,
na kroboo ndiom taan nyumu,
ki nuni ki na na woni.
14 Na mu kɛnyi nya,
mu yo dnɛ chichiele ni pe tɛɛ,
mu kɛgbrɛ pe mu le yi na.
A u wejiŋge pe plɔplɔ na hlo ŋgaala,
ŋga na pe dnɛ chichiele to
mu hlu yi.
15 Pan u jeelee pe na pilaasi
nyjɛ pe pe na dnɛ fiŋge titi ni yi,
mu yi kan swanyiɛ yirɛ na.
Pan u yire na Lebanon nyuɛ nyjɛ na
cedar tinyi chichiele nyi yi.
16 Na ni u nyu shiun,
tnamu wa ki nu,
a ki tia u kee kro tna ni pan mu tro.
Jerusalem bichiɛlɛ,
ni nyanyjɔ wre ni e nyina kre.