Chlɔ Wre
8
Na kra pe na maabiblɔ na wi ŋu,
a mna ŋgɔɔri maa pan
mu wa.
Kaa na ni mu fni lete na,
mbe na mu nyu shiun,
a ndro wa ki nya,
mbe ki pe u pan keesaa.
2 Mbe yiɛklu mbe sɛ
na mu ni ni lo katoo,
ni lo wre u ni nyina,
kee ŋga mu chin ŋga kro.
Bawa mbe mu ŋga
simi ndiom taan,
ŋga ni pe pomegranate sɛnyi ni,
mbe mu gbɔ.
3 Ni nyanyjɔ u kamɛŋɛ kɛ le,
ni ndra tapan,
mu u kalie kɛ tɛɛ mu ni yii,
mu mbra uyɛ na.
4 Jerusalem bichiɛlɛ,
e da e ni ŋga na
yaa ndro niŋge yire u nu,
fɔna ki nyjila da tun.
Nɔɔlɔ Pre
5 Chlɔ ŋmbi u yiri tablɔ tra nu,
na paan,
mu gbun u nyanyjɔ na ŋga hin?
Chlɔ Wre
Tiŋge liwo jaara,
bawa ni tia mu niŋge yiri mu nu,
tiŋge kre jaara mu lo na mu siire ta,
a bawa lɛɛ na u yaa,
a wra mu se mu wa wa.
6 Ti mbe ni pe mu loloŋgo nu,
mbe mu ni le kandala,
mbe kɛ kru mbe ni tɔ,
ŋgi na hin?
Koroo sheli na kumu yi.
Kii yenyjam ni,
pan ki nyi na pe yire kuulo ndoo,
na ndro yeeri,
ki nyini na kanhun yi,
mu na sroi.
7 Epo nyumu wa jaa ki nyu nyiŋge,
ndee mbe jaa ki foo sɛ.
Na swafun u katoo yirɛ kro prɛ,
mbe tɛɛ mbe koroo lɔ,
lewaa pie u le kuraa mbe ya.
Nɔɔlɔ Pre
8 Oo wa na jaa bichable fiɛn ni,
a u n ta mu nyinimi kpolo tun.
Na blɔ waa na u chaa mbe leŋge,
o n chin yira ŋga oo pe
mbe u ŋga.
9 Na mboo na wi o jaa wre,
oo na swafiŋge tɛɛ,
mbra nyuŋgo gedeŋge sin,
mbe taa u na.
A na jlonwee krɔ na wi,
oo na cedar tɛɛ mbra ki bie tɛ.
Chlɔ Wre
10 Pan ni nyi na mboo yi,
a ni nyinimi pe na,
ki nyinyi gedenyi yi.
Ni nyanyjɔ ŋmba ni kori wre,
pan u ni nya.
U chin na na ni u nya kena ni yɔɔ,
a wre nu ni wejinyiŋge taa.
Blɔ Wre
11 Solomon wa tre see ka ni,
kii wa Baal-Hamon na,
a u ki wru mu lefɛɛnlɛ ŋga,
a na pe ki yirɛ prɛ,
imi na pe nyu da kpan,
mbe pe kro pan na swafiŋge
kradnɛ fulo na kunɔ ni nununu.
12 Mi titi tre sɛnyi see kre rɛ,
mi nunu wo yi,
kena Solomon wo yi
swa kradnɛ fulo na kunu kre,
mbe see lefɛɛnlɛ pre ta kradnɛ kunɔ.
Blɔ Wre
13 Ni bichrɔ, ti mbe ni mu mana loo,
ni kagbla wa,
ni nɔɔlɔ wa mu yire wa,
na mu mana chaa mbe loo.
Chlɔ Wre
14 Ni nyanyjɔ pan ni pan,
fɛ mu pan ni pan na kafaa,
ndee na sable yirifuŋu
nyuɛ nyjɛ na pe tuwe ndiom tɛɛn
luu ta na ndru.