Blɔ Wre
7
Ni bichrɔ,mu jeelee nyu kpawrɛ nu titi.
Ŋunu bichlɔ,
pan mu jesinyi nyu
na tɛtɛŋu kɛ nyu tnumu yi.
2 Pan mu kuŋo nyi na lagbuju yi,
simi gbɔwo taan na la ki nu.
Pan mu lɛɛ nyu,
na yua zezee pe pɔ,
na lɔɔ chia toto ni,
mu yi ble ble na flom yi.
3 A pan mu nyinimi nyu,
na kafaala atae lɛ,
ndee na sabɛɛlɛ shiin lɛ.
4 Pan mu yulɔ kaan nyu plɔm,
na hlo ŋgaala tɛɛ mu
nyuŋgo gedeŋge sin.
A pan mu nyiɛlɛ bie nyi na,
Heshbon tapla ŋga ki mbra,
Bath-Rabbim jlonwee nyu na
kre yi.
A pan mu makaan nyu na,
Lebanon nyuŋgo gedeŋge
ŋga pe sin,
a ki yiɛ ka Damascus na kre yi.
5 Mu ndra yiri nyjeeri,
kama na nyua Carmel yi.
Mu ndra nyjure nyjɛ mu tin
yire tla,
mu nyu titi,
ki tia mu ŋunu ta mu yii,
a wa jaa shɔ.
6 Ni bichrɔ, mu nyu titi,
a muu niŋge ni ni pan,
a ki tia mu koroo tna ni pan.
7 Pan mu kumu nyi ni pan
na shuɛ tiŋge yi,
a mu nyinimi pe na tinyi sɛnyi
yi chrɔ yi yɛ nu.
8 Ndaa yo niyɛ pan na,
“Mbe shuɛ tiŋge kre nduu,
mbe sɛ ki sɛŋgɛ yii kɛ ni.”
Ni chaa mbe mu nyinimi
na pe chusii na tre sɛnyi yi.
A na mu ŋu mbe ki ndiom tna
na tiŋge liwo,
ŋga ndiom ki tna yi.
9 A na ni mu nyu shiun,
mbe kra tna na simi taan titi yi.
Chlɔ Wre
Na pan mu yo mu kɔ,
kena simi kre ki fo brɛmm,
mbe ni yili ŋgaala ndoolo,
mbe tro ni nyu hlɛ na,
mbe sɛ le ni nyanyjɔ nyuu.
10 Ni nyanyjɔ ŋmba ni kori wre,
u wo wi mi,
a ni kee niŋge ni u pan.
11 Ni nyanyjɔ pan,
pan mbe o sɛ nyaa lam ka nu,
mbe sɛ blee nunu li
seechiɛ yɛ na.
12 Na o da wa oo gbolo mbe yiri,
mbe sɛ tre seele yire nu,
mbe se le na yi chaa mbe fin,
ndee na yi jiri mu toto pe,
ndee mbe le na yi chaa mbe kpolo,
bawa mbe ni koroo wɔ mbe mu ŋga.
13 Ni nyanyjɔ, bawa
mu mandrake ndiom tɛɛn yire,
ndiom loo,
mbe yi sɛnyi tɛɛn yire ndiomu,
o krɔ nyu shɔ mbe ta poŋgo.
Yi lɛɛlɛ na yi fɔnyi nyjɛ ni tɛɛ,
mu pan yire kro
mu yi ndiom loo kro.