Blenyini Wejinyiŋge
2
Kee ŋga Nyiɛkpɔɔ na yo Amoz pɔ Isaiah pan mna wru Judah, na Jerusalem haa yi kre.2 Ble nyjɛ yi kro tɔ yire nu kre,
nyua ŋga na o Tafun Nyiɛkpɔɔ,
Suminyuŋgo kre nyi kre we yire,
mbe wɛ nyuɛ kro na,
mbe pe nyuɛ nyjɛ yii wa wa,
yire kro ndra,
a waŋgrɛ kro we pe,
na lɔɔ ki fuu na shie wa.
3 Leele tataara we pan wa,
mbra yuu peyɛ pan mbo,
“E pan mbe o sɛ,
o Tafun Nyiɛkpɔɔ nyua kre na,
bawa yi Jacob Nyiɛkpɔɔ wre katoo.
Na o sɛ we o nyina,
ŋga u chaa mbe o pe,
a oo nyaari kolo,
ŋga we o nyina na.
O Tafun Nyiɛkpɔɔ mbra yire,
Jerusalem na yi yiri na paan,
ŋgi na hin? Zion nyua kre na,
we paara na u leele ni.”
4 O Tafun Nyiɛkpɔɔ,
we waŋgrɛ yire lalɛɛ kee kpra kun,
mbe leele tataara lalaa kee gbeele.
Na u pe lalɛɛ kee yire gbeele mu kɔ,
pie pe brɔfiɛnlɛ yiɛshiin,
na pe chomboolo,
nyjɛ ni pe wii yire gbun fɔnyi,
mbe yi kna fali yirɛ,
na tinyi ndra klu brɔfiɛnlɛ.
A waŋgrɛ yire ka wa wi,
na ka ni na,
mbaa yo ŋunɔ wiire pie tuan.
5 Kena Jacob nanae,
e ti o nyaari nyisee,
ŋga O Tafun Nyiɛkpɔɔ o ŋga
kre nu.
Nyiɛkpɔɔ We Yɛkpɔɔmufɛɛnlɛ Kla
6 O Tafun Nyiɛkpɔɔ,
mu mu leele Jacob nanae pre je.
Ŋgi na hin?
Waŋgrɛ nyjɛ yii wa yilafinhaa yire,
dobodobo kee nyjɛ,
pe pini yire na pe taa,
mu na Philistine chilɛ kee yire pini.
A pre na fumblɔ biile na fni,
na nyu nunu pini.
7 Swafiŋge, na Swanyiɛ bribri,
yi pe tra kre nyi,
a pe krɔyirɛ wa jaa tɔɔnri.
Soolo bɔ pe tra kre nu,
a pe sookɛɛ wa jaa tɔɔnri.
8 Sɛɛnlɛ bri yi pe tra kre nyi,
pre titi kɛ nyu yirɛ,
nyjɛ pe gbeele yiɛ,
pe suulo na yi sumi.
9 Ki tia o Tafun Nyiɛkpɔɔ,
we leele pre le fiɛn,
mbe nyifɛɛrɛ pe gbo.
O Tafun Nyiɛkpɔɔ,
maa shia pe sisam ti mbe pe kɛ.
10 Nyuɛ weele, na nyuɛ dnɛ ndoolo,
pie sɛ le mbe ndra,
ndee mbe weele tuu tuu tra,
mbe ndra yi nu,
imi kie pe mbe pe jaa shɔ,
o Tafun Nyiɛkpɔɔ krɔkuɔn kre nu,
mbe ndra mbe pia u faŋga,
na u yɛnyiŋge kre nya.
11 Ble kaa wa na paan,
mbe lewo nyukpɔɔmu kee nyu to,
a ŋmba u uyɛ kpɔɔri wre,
we uyɛ nyjii,
o Tafun Nyiɛkpɔɔ chiin,
we kpɔɔmu ta.
12 Ki ble kre,
o Tafun Nyiɛkpɔɔ Jaŋgafun wre,
we ndro ŋmba uu jaŋga ni,
na yɛkpɔɔmufun,
na kpoŋmboorofun pe fiɛn.
13 We cedar tinyi gedenyi,
nyjɛ yii wa Lebanon tra nu,
a leele yiɛ taa yi na yire kla.
A pan chɔɔ we Oak tinyi,
nyjɛ yii wa Bashan tra nu yire pe.
14 We nyuɛ gedenyi,
na nyambie yire pe mbrɛrɛ.
15 A pan we nyuŋgo gedeŋge kro,
na mboo ŋga pe sin gbiŋmbi,
mu pe loŋgoolo tɔ kolo yire pe.
16 Hali epo krɔɛ,
nyjɛ ni pe jafa lii yire,
na krɔɛ badɛnyi chichiele yire kro,
we ti yi mbe yi tii lɔɔ.
17 Kre ble kre,
lewo yɛkpɔɔmu ki nyu we to,
a ndro wa ja mbe uyɛ nyina na.
O Tafun Nyiɛkpɔɔ chiin,
pie na kpɔɔri,
18 a sɛɛn wa pe na.
19 Leele we sɛ ndra,
nyuɛ nyjɛ nu dnɛ weele nyi nu,
ndee mbe weele tuu tuu tra,
mbe ndra yi nu.
Imi kie pe mbe pia o Tafun
Nyiɛkpɔɔ krɔkuɔn na u jaŋga,
na u yɛnyiŋge kre nya,
na waa pan na tra ŋga nyaara.
20 Ki ble kre, pie pe swanyiɛ,
na pe swafiŋge sɛɛnlɛ,
nyjɛ pe gbeele yire koli,
mbe wa tulo, na krotee pan.
21 Na O Tafun Nyiɛkpɔɔ wre,
waa pan mbe tra ŋga nyaara kre,
leele we ndra weele,
na dnɛ ndoolo,
imi kie pe mbe pia u krɔkuɔn,
na u jaŋga, na u yɛnyiŋge nya.
22 Kena yaa shia dankna lewo na na.
Kia mu mbe u ku,
kena yira ŋgi yira wi lewo hin?