O Tafun Nyiɛkpɔɔ We U Leele Ŋga Wejinyiŋge
4
Ble nyjɛ yi kro tɔ yire nu kre,nyua ŋga na o Tafun Nyiɛkpɔɔ
Suminyuŋgo nyi kre,
we pe nyua ŋga kee ki shian,
mu wɛ nyuɛ nyjɛ
yii wa wa kro na,
mbe yɛnyiŋge ta
mbe wɛ yi kro na,
mbe waŋgrɛ kro
na tini mbra paan wa.
2 Mbe pe leele na yuu
peyɛ pan mbo,
“E pan mbe o sɛ
o Tafun Nyiɛkpɔɔ nyua kre na,
Jacob nanae pre
Nyiɛkpɔɔ katoo wa.
Wre we o nyina ŋga u chaa,
mbe o taa kolo ŋga u chaa na.
Ŋgi na hin? U mbra yire,
Jerusalem na yie yiri mbe pan.
Nyua Zion na we yire
mbe paara.”
3 We waŋgrɛ nyjɛ haa yi le,
na nyjɛ yi mbra yire kro lalɛɛ
kee li,
mbe pe lalaa kee gbeele.
Na ki pan ma,
pie pe brɔfiɛn yiɛshiin gbun,
mbe yi pe fali yirɛ,
mbe pe chombo pe
brɔfiɛn tinyi ndrɛ klu wee.
Waŋgra na waŋgra wa wi na,
ndee mbe ŋunɔ wiire twan na.
4 Ndro kro we tni
u tiŋge liwo jaara
wejinyiŋge nu,
a wa wa u ŋmbrɔ piɛri na.
O Tafun Nyiɛkpɔɔ
Jaŋgafun wre, u ki yo.
5 Waŋgrɛ yire yɛ
we taa pe sɛɛnlɛ kro,
la, wre rɛ,
o Tafun Nyiɛkpɔɔ wre na
oo taa nyjila kro nu.
O Tafun Nyiɛkpɔɔ We U Leele Pre Yiɛklu
6 O Tafun Nyiɛkpɔɔ yo mbo,
“Kre nyjila kre,
mbe ni leele mblɛ ndaa je,
mna pe ndie tini,
a pra kala nya waŋgrɛ nu pre
nyu ble titɛɛ.
7 Pe mblɛ pe kro pre,
mbe ndru mbe nɔɔ hle na pe ni,
mbe pe pe waŋgra kpɔɔ na,
mbe yire Zion nyua kre na,
mbe pe le nyjila kro nu.
8 Ŋu Jerusalem,
ŋu na Nyiɛkpɔɔ nyi mu tni,
na mbaala lefun wi,
na u leele le,
mu ndru mbe pe
mu ŋunumu kre kakpɔɔ na.”
9 Jerusalem, mni a mna nyɛni
kpɔɔ ma hin?
A mni mna kala nyaa
na chlɔ ŋmba selɛɛ yaa wi
ŋga hin?
Ŋga ŋunu n wa mu pan,
a mu paaranyinafɛɛnlɛ ku
mu kɔ kre na yi ree?
10 Yire Jerusalem leele,
e kanyana kre ndra na,
e na jiin lɛɛ na selɛɛ chlɔ yaa.
Nyjila da mbe e fɛ,
mbe yili kakpɔɔ kre na,
mbe sɛ tni nyaa.
Nde pie e yii
mbe sɛ Babylon tra nu.
Bawa o Tafun Nyiɛkpɔɔ we e wɔ
mbe yili e loŋgoolo pre kɛɛ.
11 Fuŋgaami ŋga,
waŋgrɛ tataara fni mu na paan,
mbe wi na e ni,
na yuu mbo,
“Ki fna o Jerusalem kla,
ki fna mbe ki kaari kajaa.”
12 La, yire waŋgrɛ yire, yi n kolo
ŋga o Tafun Nyiɛkpɔɔ
chaa na pe ni chin.
Pe n chin na wre u pe nyu ble titɛɛ,
mbe pe ndie tini.
Imi pe shɔlɔ ble shunshun na kre,
pan we pe ble titɛɛ.
13 O Tafun Nyiɛkpɔɔ wre yo mbo,
“Jerusalem leele,
e yiri e e loŋgoolo pre gbun,
na shɔlɔ yi, ŋgi na hin?
Mbe ti e faŋga ta, na nablɛm
ŋmba nyamblɛ yi pe
na tɔɔnrɔ yi,
a u yeŋgrɔɛ pe na swafre yi.
Ee waŋgrɛ tataara kla,
mbe yirɛ nyjɛ pe ta
mu koli yire shɔ,
mbe paan mi e Tafun Nyiɛkpɔɔ,
ŋmba wi tra kro Tafun
wre ŋga.”