5
Jerusalem leele,e eyɛ kna.
Loŋgoolo pan mu yirɛ tle
e chia kre mboo na,
mbe nduu mbe le ki na.
Pie paan e ŋunu wre yiɛ ja
kaan ni.
Nyiɛkpɔɔ We Israel Leele Ŋga Ŋunu Fɔŋgɔ
2 O Tafun Nyiɛkpɔɔ wre yo mbo,
“Ŋu Bethlehem-Ephrathah,
ŋu mu pe chia fiɛn Judah tra nu.
La, ŋu nu mbe ŋunu wɔ
mbe u paan Israel waŋgra kre le.
Jle gbamm kre,
na uu wa.”
3 Kena o Tafun Nyiɛkpɔɔ,
we u leele pre wru mbe le
pe loŋgoolo kɛɛ,
mbe sɛ su nyjila ŋga chlɔ ŋmba
selɛɛ yaa wre we se,
a ŋmba pie se wre,
u wolo mblɛ pe yii,
mu sɛ waŋgrɛ nu pre,
we ndruu paan fni Israel tra nu.
4 Wre we yiri mbe u leele pre le,
na mbaala lefun wi,
we faŋga ta,
mbe o Tafun Nyiɛkpɔɔ wre
jaŋga kpɔɔ kre tɛɛ
mbe tnumu tun.
Kre nyjila kre,
pie tni wejinyiŋge nu,
mbe u kpɔɔmu da lawee kro nu
tra ŋga yiɛ na.
Israel Leele Ndie Tiniɛ Na Pe Klaa
5 Wre we pan na wejinyiŋge ni.
A na ki pan
na Assyria leele pan,
mbe wi na o ni,
mbe o tra ŋga shɔ kre,
oo o loplombo faŋgafɛɛnlɛ
titie wɔ,
mbe pe wi na pe ni.
6 Pie wi na pe ni,
hali mbe pe tolɛɛ
Nimrod tra kre shɔ.
Pre pie tra kre le,
na brɔfiɛn yiɛshiin ni.
Kena pre pie o shɔ,
mbe yili Assyria leele pre kɛɛ,
na ki pan na pe pan mu o tɔ,
o tra nu.
7 Jacob nanae
mblɛ lɛ Israel leele pre,
chiɛri mblɛ pie kro pre,
pie tni waŋgrɛ yire nu,
pie pe na Nyiɛkpɔɔ
u mɛŋɛ woni see yirɛ na.
A pia dankna lewo na,
Nyiɛkpɔɔ wre na pie na kaan.
8 A pe mblɛ pie kro waŋgrɛ nu pre,
we pe na blɛkpɔɔ
ŋmba u sro chaa klɔ,
ndee yurɛ kahaa nu wi,
na u yurɛ pre wa ta,
mbe u ye mbe to u na,
mbe u tini mbe wla,
wa ndro ta mbe u u shɔ.
9 Israel leele we wi
mbe pe loŋgoolo ja,
mbe pe kla kro.
10 O Tafun Nyiɛkpɔɔ yo mbo,
“Kre nyjila kre, mbe e soolo,
na e sookɛɛ yire kro kla.
11 Mbe e kakpɔɛ yire kla,
mbe lawee nyjɛ e sin
na ndra yi nu
ŋunɔ nyjila yire kro kla.
12 Mbe e yirɛ nyjɛ ni
e dobodobo woni
yire kro kla,
a yaa chlɛfɛɛnlɛ ta na.
13 Mbe e sɛɛnlɛ yire kla,
a dnɛ nyjɛ e yire mu yire sholo,
na yi peerii yire kro, mbe yi kla.
Yaa yirɛ nyjɛ yire titi gbeele
yire ta,
mbe sumi na.
14 E sɛɛn chlɔ Asherah
kɛɛn nyjɛ e kan kan yire kro,
mbe yi klɔ tra kre nu mbe wo,
mbe e kakpɔɛ yire kro ja.
15 Waŋgrɛ nyjɛ leele
pe n na lii ni kee na pre,
mbe krɔ sisaa tɛɛ,
mbe fɔlɔ tɔ pe na.”