Nahum Hlɛ
1
Praa blɔ wa yeeri Nahum, a wra yiri chia ŋga pe yeeri Elkosh kre na, ki ble ka, wra kee yɛ nya nyiɛlɛ na mu wru Nineveh chia kre haa.2 O Tafun Nyiɛkpɔɔ pe yenyjamfun,
mblɛ pe u nyu kaanri pre,
u pe ndie tinii.
A u pe sisam fɔlɔ toni
krɔkuɔn ni.
3 O Tafun Nyiɛkpɔɔ wre,
u krɔ na kun nyaanyaa,
nde u jaŋga kpɔɔ,
a wraa pimi lifɛɛnlɛ ti,
mbe wa pe ndie tini.
U jaŋga wa nyiɛ fuflɛ,
na legboo fuflɛ nu,
a u jeelee bloŋgo yi tloe.
4 Wre u paara mbe epo yua,
wre u tii mbe lɔɛ kro yua.
Wre u tii mbe Bashan tra,
na Carmel nyua kre tinyi nyaara,
a wre u tii
mbe Lebanon totoe nyumu kla.
5 Nyuɛ yire seeri u yiɛ,
a nyambie yire na nyani u yiɛ.
Tra seeri u yiɛ,
a pan waŋgra ŋga,
na mblɛ pee wa ki nu
kro seeri u yiɛ na.
6 Na u krɔ kun,
ndro ŋmbi we ŋmaa li hin?
Ŋmbi we jaa yire
u krɔkuɔn sisaa kre yiɛ hin?
U krɔkuɔn kpɔɔ
kre nyini na kanhun yi,
na u krɔ kun ma kre,
mbe dnɛ badɛnyi
na juari mbruru u yiɛ.
7 O Tafun Nyiɛkpɔɔ wre nyu,
a wre wi kanyana nyjila
fɛnkaarifun,
mblɛ pe kaan u na pre,
u kɛ toni pe na.
8 We pe na lɔɔ ki nyi mu prɛrɛ ja,
mbe sɛ le Nineveh leele nu,
we u loŋgoolo pre kɔŋgɔ ni,
mbe sɛ pe le ndramwɔɔ nu.
9 Loŋgoolo pre,
yaashia jawala fɔɔn wru
na o Tafun Nyiɛkpɔɔ wre ni,
na kre ma, we e kla.
Ŋgi na hin?
Ndro wa jaa u nyu kaanri
mbe taala gbee shiin.
10 Pan ee pe na gbɔgbɔɔlɔ lɛ,
mbe eyɛ mbiile
na wuuru pe mbiile mu tɛɛ,
a ee shɔ na kpakpɛɛ yi.
11 Nineveh, ndro wa yiri mu na,
mu jawala sisaa le
na o Tafun Nyiɛkpɔɔ ni,
u sisam kee nyjɛ u nu yire
wa jaa tɔɔnri.
12 Kee ŋga o Tafun Nyiɛkpɔɔ
wre yuu yi kre mbo,
“Kii wa na Assyria leele
pree faŋga ni,
mu nɛɛ woi, la, mbe pe kla,
mbe ndro wa pe nya na.
Ni leele Israel wolo,
ndaa tia e na kala nya fa,
la, fuŋga rɛ, mba ki pe ma na.
13 Fuŋga mbe e shɔ
Assyria leele pre jaŋga kɛɛ,
mbe e eyɛ ta.”
14 Kee ŋga o Tafun Nyiɛkpɔɔ
wre yo, mu wru Assyria
leele pre haa yi kre mbo,
“Yaa nanae ta
mbe e mɛɛ taa pe na.
Mbe e sɛɛnlɛ nyininyini nyjɛ
yii wa yi sumindoe nu yire kla.
Nii wa na e fanyi gbeele,
ŋgi na hin? Tnu ka n wa e nu.”
15 Yire Judae, e yiɛ wa
e le nyuɛ yire na,
bituŋu wa yiri wa na paan,
u paan na ketaan,
ŋga kie pan na wejinyiŋge ni,
e na e ble kpɔɛ yire lii,
e na nyu nyjɛ e yo ni pan
yire woni.
Ni e loŋgoolo pre kla,
pia jaa pan, mbe wi na e ni
mbe e tra kre shɔ e pan na.