Keesɛɛ Nyjɛ Israel Leele Pre Pini
7
Fooro ni yii kpɔɔ.Pan ni nyi na klo ndro ta,
a u sɛ sɛŋgɛ cha tiŋge na mu la,
ŋgi ndra na hin?
Pe ki sɛnyi yire knumu ki na pei,
mu yi yaa kro.
2 Kprafɛɛnlɛ kɔ tra kre nu,
a Nyiɛkpɔɔ chinfɛɛnlɛ n wa na.
Pe sɛ ja na pe ŋmbilɛ sri mbe gbo,
na peyɛ peerii pɛlɛ.
Ndro kro u ŋmbrɔ chaa,
mbe u pe sisaa.
3 Sisaa pee na pe kro yiɛ nyinai.
Pe kpra kunfɛɛnlɛ,
na pe yɛkulo kro dɔlɔɔ shio.
A pe jaŋgafɛɛnlɛ,
na yirɛ shio leele pan pɔɔrɔ na.
4 Pe mblɛ pe nyu,
mu fraka pe nu kuraa kre,
pan pe nyi pe nu na wuuro yi,
tnu ka n wa pe nu.
Ble ŋga na Nyiɛkpɔɔ
we e ndie tini kre da,
kre na u yila,
mu u kee nyanyofɛɛnlɛ wɔ,
a praa e jaari,
a tutom wo e na kre.
5 Maa shia mu tnifun shɔ mbe li,
ndee mbe kaan mu nunu na.
Kee ŋga mu yuu mu chɔ,
ndee mu plɔ pan kuraa dɔɔta.
6 Ŋgi na hin?
Nyjila ŋga nu o nyi ŋga,
bibilɛ pe lɛɛlɛ le na jijiele lɛ,
a bichiɛlɛ yiri,
mu pre titi loolo taan.
A najɔ n u najɔ le mu nya na.
Lewo loŋgo titi wi u katoo ndro.
7 La mi rɛ,
o Tafun wre na ni kaan.
Ni ŋmaashɔfun Nyiɛkpɔɔ wre,
yiɛ ni le na we loo ni pan.
O Tafun Wre We U Leele Shɔ
8 Ni loŋgoolo, yaa ti
mbe e yiɛ shɔ ni too na.
Kii wa na ni to,
nde mbe yiri.
Na ki pan na nii wa mu tni
wɔmu nu kuraa kre,
o Tafun Nyiɛkpɔɔ
wre wi ni kania.
9 Ni sisaa pe,
mu o Tafun Nyiɛkpɔɔ taan,
kena na u ni ndie tinii kre,
mbe frɔ ta,
mbe sɛ su na we ya ni na.
We pan na ni ni nyisee nu,
mbe ni u frakaa kre nya.
10 Na ki pan ma,
a ni loŋgoolo pre we ni nya,
mbe nyifɛɛrɛ pe gbo.
Pre pe yuu ni pan mbo,
“Sena mu Tafun Nyiɛkpɔɔ
wre nyi hin?”
Mbe pe too nya,
pie pe taanla mbe mbra tra
na frɛrɛ yi,
mbe ni yiɛshɔ.
11 Jerusalem, nyjila da,
mbe pe mu mbokuɛn
yire gbeele mbe sin.
Kre nyjila kre,
mu sam we vala mbe ya.
Nyiɛtalaa Haŋa
12 Kre ble kre,
leele we yiri Assyria tra,
na Egypt tra nu,
na Euphrates lɔɔ kre lawee,
na epo nyu chiɛ yire na,
na lawee tataara nu,
mbe pan mu pan.
13 Kre nyjila kre nu,
leele sisam we ti
mbe tra ŋga sni waara.
O Tafun Nyiɛkpɔɔ Fooro Chiɛn
14 O Tafun Nyiɛkpɔɔ,
mu leele mblɛ mu wɔ pre le,
na mbaala lefun wi.
Kii wa na pee wa mu tni peyɛ na,
klɔɛ lawee yire nu,
a tra taan,
na yurɛ kahɛɛ pe fɛ mu kun.
Sɛ na pe ni Gilead,
na Bashan trɛ nu,
mbe pe sɛ kahɛɛ ta wa
na fa kre yi.
15 O Tafun Nyiɛkpɔɔ,
kawako kee pe mbe o nya,
imi na mna yi pe Egypt tra nu,
nyjila ŋga nu mna o wɔ
mu yili wa kre.
16 Na ki pan ma,
waŋgrɛ nyjɛ nu faŋga nyi pre,
pie o nya,
mbe nyifɛɛrɛ pe gbo,
mbe pe kɛnyi taa taa nyu na,
mbe yire mbra le na kpoolo lɛ.
17 Pie fulo gbun na na wɔɔlɔ lɛ,
mbra tra lala.
Pie yili pe sni hɛɛ nu,
mbra seeri mbra paan
ŋu o Tafun Nyiɛkpɔɔ wre pan.
A mu kee we pe fiɛrɛ ni pe pan.
18 O Tafun Nyiɛkpɔɔ,
ŋmbi u pe na ŋu wi hin?
Ŋu mu sisam tii na kee,
a mu leele mblɛ pe kro chiɛri,
mu na yiri na mu taanla pre,
ŋu mu nyɔɔ pe na.
Mu krɔkuɔn na kro ma
nyjila kro nu,
a mu mu koroo woni na nyina
nyjila kro nu.
19 Mu ndru mbe o fooro le na.
A mu o sisam,
na o kefuɛn kro pɔ mbe laa o na,
mbe sɛ wo epo latɛɛ nu.
20 Mu kpra li,
mbe mu koroo kre wɔ
mbe mu leele Abraham,
na Jacob nanae pre nyina,
imi na mna nyu yo
o tolɛɛlɛ pre pan fa kre.