Israel Leele Kala Ta O Tafun Wre Pan
6
E loo kee ŋga o Tafun Nyiɛkpɔɔ wre yuu mbo,“Yire Israel leele,
e pan e e nyu wɔ mbe nyuɛ,
na nyambie yire kro ka loo.
2 Nyuɛ, na tra ŋga ki yire gbiŋmbi,
mu yire dnunya wa nyjila,
e ndie tɛɛ e ni kee ŋga loo.
Mi Nyiɛkpɔɔ na ni leele
Israel wolo pre o ta,
kena e ndie tɛɛ e ni kee ŋga loo.
3 Ni leele,
sisaa ŋgi ni pe e na hin?
Ndee tɔɔra ŋgi nu ni e le hin?
E kee ŋga nyu wɔ mbe ni loo.
4 Ndaa e wɔ mu yili Egypt tra nu,
mna e shɔ mu yili e tnibim nu.
Mi ndaa Moses, na Aaron,
na Miriam wɔ,
a pra yiɛklu e pan.
5 Ni leele,
e jawala ŋga Moab ŋunu Balak
na wru na e ni,
na kee ŋga Beor biblɔ Balaam
na yo u pan kre sɔɔnri.
E kee nyjɛ yira e da,
nyjila ŋga nu
e na yiri Shittim na,
na shie Gilgal na yire sɔɔnri,
kre ee chin na mi
e Tafun Nyiɛkpɔɔ wre
dɔɔ wa e na.”
Kepele Ŋga O Tafun Wre Chaa
6 Na ni shie o Tafun Nyiɛkpɔɔ
Jaŋgafun wre sumi haa,
yira ŋgi mbe tɛɛ mbe sra wɔ
mbe u ŋga hin?
Ni nabie ŋmba u li yɛlɛ nyu wɔ
mbe yurɛ sroo sra wɔ
mbe u ŋga ree?
7 Kena na ni mbaala
kagbenyi kagbenyi,
na olive simi ŋga ki fuu na lɔɔ yi,
tɛɛ mu sra wɔ mu u ŋga,
kie tna u pan ree?
Kena ni ni bijlo wru
mbe ni sisam sra wɔ,
mbe u ŋga ree?
8 O Tafun Nyiɛkpɔɔ wre,
u o nyina nyjɛ yi nyu,
na nyjɛ u chaa kro.
Yire yi na,
oo na kpra kuun ki kolo na,
mbe fooro chiɛn pe o keshian,
mbe ndie tɛɛ u pan.
Israel Leele Sisam Na Pe Ndie Tiniɛ
9 E loo, o Tafun Nyiɛkpɔɔ
yire mblɛ ee wa
kakpɔɔ kre na pre yeeri.
E ndie tɛɛ u pan,
e u ndie tiniɛ kre fiɛ.
10 Dnumu yirɛ bribri
sisampefɛɛnlɛ cha
mu tɛɛ pe kalonyi nu,
a yi nyi.
Pie yira kpɔɔ tɛɛ,
mbe yirɛ kra mbe lɔ,
mbe yira fiɛn tɛɛ mbe yi prɛ,
yire kee yire kee ni bin.
11 Mi e Tafun Nyiɛkpɔɔ wre,
mbe e ndie tini
dnumu kolo ŋga na e tro,
na yirɛ loni kre na.
12 Kakpɔɔ kre swafɛɛnlɛ pre,
pɔɔrɔ pe lii,
na kala fnɛ.
13 Ki tia e sisam ndra na,
mbe e kla,
mbe e dɔɔya.
14 Ee sro ta mbe li,
nde yaa yɔɔ.
Ee yirɛ cha mbe tɛɛ,
a yie yili e kɛɛ.
Ŋgi na hin?
Pie paan wi na e ni,
mbe yi shɔ e kɛɛ.
15 Ee yirɛ luu,
a yaa yi taa kun.
Ee olive simi wɔ,
a yaa yi ta mbe yaka pe.
Ee tre sɛnyi fɛɛrɛ,
a yaa yi simi ta mbe gbɔ.
16 Jerusalem leele,
yire kee nyjɛ krɛrɛ we yili e na,
ŋgi na hin? Sisam nyjɛ ŋunu Omri
na u biblɔ ŋunu Ahab
na pe yire kro e taa.
Yire kee yire ndra na,
mbe e kla mbe e dɔɔya.
Na ki pan ma, waŋgrɛ yire leele
we na e pini mbra tɛɛ,
mbra e tɛɛlɛ.