Assyria Kakpɔɔ Nineveh Kre We To
2
Nineveh, pe paanmbe wi na mu ni,
kena yiri,
mu mu fɛndra hɛɛ yire shie,
muyɛ kna chichie,
mu yire kolo na.
2 O Tafun Nyiɛkpɔɔ wre we ti,
mbe Israel ndru
mbe ki yɛnyiŋge lɛɛ kre ta.
Kii wa na loŋgoolo
na pe chia kre ja,
mna pe tre seele kla.
3 Ŋunɔ wi yirɛ nyiɛ pe loŋgoolo pre,
na tɛɛ mu peyɛ tɔ,
mna dodonyi nyiɛ le le.
Pe peyɛ kna na paan,
a tɔɔnrɔ nyjɛ yii wa
pe sookɛɛ na yire,
na nyini plipli,
a praa pe chomboolo viŋge,
a pe soolo na fiɛlɛ
na shie na paan.
4 Pe sookɛɛ chia kre lete shɔ
mu ta, mu na fiɛlɛ
na shie chia kre lenɛɛmu fnihaa
na paan.
Na mu pe nya, pan pe nyini
na muɔɛnlɛɛ pe mu,
na pini na nyiɛ ki nyini.
5 Pe ŋunɔwifɛɛnlɛ lopom
wre kɛ wa mu pe yeeri,
a pra fiɛlɛ na gbroi na paan,
mbe sɛ ndra haa gbeele,
chia kre mboo ŋga pe
sin mu ki fɛ mu kun kre krɔ.
6 Chia kre jlonwee nyjɛ yii wa
mu yiɛ kan lɔɔ na kre,
pe yi gbun mu nyaala,
mu ŋunu katoo kre ja mu wo.
7 Pe chia kre ŋuchlɔ wre yii
mu sɛ,
a u sumifɛɛnlɛ pre na jiin lɛɛ
na kotulo lɛ,
a fooro tia pra gbun frɛ.
8 Imi na pooro wee we wali
mbe ki nyumu na fuu
mbra shie kre,
pan Nineveh leele fiɛlɛ
na yilii chia kre na.
Pe gble leni na peyɛ yeeri mbo,
“E yire ɛ! Jande e yire ɛ!”
La, ndro n na kna
mbe le u kro.
9 Loŋgoolo ŋunɔwifɛɛnlɛ
pre gble na yuu mbo,
“Yɛtaara yirɛ bɔ,
yirɛ kro bɔ chia kre na.
E pe swafiŋge foolo!
E pe swanyiɛ kro foolo e ta!”
10 Nineveh kla, mu kaari kajaa,
hali yaka n kro ki na.
Fiɛrɛ ki leele yii a pra seeri,
a pe kosie na gbro,
a wejinyi na yoo pe na,
a pe yiɛ pe fwaa.
11 Sena kakpɔɔ ŋga kra pe
na jirae snihaa yi kre nyi
fuŋga hin?
Pan bawa na nyi na jirae
pe pe biile kaan sro wa.
A na jirae pre yili
mu pe biile ti kuraa kre,
yaka wa jaa pe ta.
12 Jira blɔ wre we yili
mbe sɛ kaara cha,
mbe paan u knumu bujibuji
mbe u biile, na u chɔ ŋga,
mbe ki ti mbe kaara knumɛɛ bɔ
u snihaa wa.
13 O Tafun Nyiɛkpɔɔ Jaŋgafun
wre yo mbo,
“Nineveh leele, mi wi e loŋgo.
Mbe e sookɛɛ yire kro
sro putuu.
A e ŋunɔwifɛɛnlɛ pre we to ŋunɔ,
a yirɛ nyjɛ e na foolo
ŋunɔ yire kro,
mbe yi shɔ e kɛɛ.
A ndro wa e bitumblɔ mblɛ
pe shie na leele piɛri pre,
mana loo tra ŋga nu na.”