Micah Paara Israel Yɛkulo Pan
3
Yire Israel ŋulo e loo.E eyɛ pe na e kpra chin.
2 A nde e je mu chichie fun,
mu sisaa kori.
Imi na pe yurɔ ŋɔni,
mbe u kaara laala
u kajle na kre,
pan e ni leele pre pini.
3 E ni leele pre
kaara kunumu na kaa,
mbe pe kajle juari mbe le chɔ nu,
mbe yi sɔɔ mbe ka.
4 Ble yɛɛ wa na paan,
ee nyɛni
mbe o Tafun Nyiɛkpɔɔ yeeri,
mbe u yiɛ wɔ e na.
E sisam nyjɛ e pini yire na,
wa e nyiɛtalaa loo.
5 Kafinɛ keenyanyofɛɛnlɛ pre,
mblɛ pe sro taa na pe kaan,
pre pan pe nyu yuu,
na wejinyiŋge wa,
la, ŋmba u n yaka ta,
mbe pe ŋga kre,
mbe pe krɔ yii na wre ni.
Pre kee nyanyofɛɛnlɛ pre,
pre pan o Tafun Nyiɛkpɔɔ
yuu mbo,
6 “Yire kee nyjɛ e pini,
kre ndra na,
e ble nyu to, a e yila to.
Ŋga e ni leele pre
wa mu fun kre ndra na,
yaa kee nya nyiɛlɛ na na,
a yaa baŋga kee ka nya
mbe yo na.
7 Pre kee nyanyofɛɛnlɛ pre,
nyifɛɛrɛ we pe gbo,
a yire chlɛfɛɛnlɛ pre,
e yiɛ we le nyumu.
E kro we kɛnyi tɛɛ mbe yiɛ tɔ,
ŋgi na hin? Yaa kee ka ta
Nyiɛkpɔɔ pan mbe yo na.
8 La, mi rɛ,
Nyiɛkpɔɔ ni ŋga u Ŋumu,
na jaŋga, na gbuntitirem,
mbe ni tɛɛ mbe kpra li,
mbe jaa Israel leele sisam,
nyjɛ pe pini yo pe pan.
9 Yire Israel loplombo,
e kee ŋga loo.
E kee ŋga ki fraka fun,
na kpra fɛɛlɛ.
10 Jerusalem yi
Nyiɛkpɔɔ kakpɔɔ,
kpra fɛɛlɛɛ,
na linkuuro kolo na e tro,
na ki siin.
11 Chia loplombo pre,
dɔlɔɔ yirɛ pe shio
na chia kre le.
A pe srawɔfɛɛnlɛ pre na mbra
yire nyina na swa shio,
pan chɔɔ pe kee nyanyofɛɛnlɛ
pre kee nyaa na yuu swa na.
Nde pe kro je na yuu na
Nyiɛkpɔɔ wa pe kro,
ki tia sisaa ka wa pe da.”
12 Kee nyjɛ e pini yire ndra na,
pie nyua Zion gboori mbe wo,
mbe ki pe na fali haa yi,
mbe Jerusalem kaari
kramboe bri.
Mbe Suminyuŋgo kre lawee
kaari klɔ.